No Libro A Amos
No Pakatonngan so Paytābwan no Nya Libro
Si Amos, ki asa propīta a yapo do idi a Tekowa do abagatānen idi a Betlehem do Joda. Siraw inpadto na, ki inbahey na dyirad tawotawowaw do pagāryan do Israel do ammyānan no Joda. Do dya chimpo, nakapagāryaw no maikadwaw a Jeroboam do Israel (7:10-11), kan si Ossias a āri do Joda do tawtawen 792-740 sakbay no nakaiyanak ni Āpo Jeso-Kristo.
Do chimpo dayan dadwa saya āri, ki matalna kan maasinso pagtorayan da. Ki aran komwan, ki iya paw nyaw chimpo no kapagkōsit kan kapangidadanes dan mababaknang siras mapopobri. Sinsinan kapagdaydāyaw da di Āpo Dyos. As kan siraw pista da, ki chimpo no kapaybobok kan kapaysarasaraw. Myan paw kapagdāyaw da do didyosen da kan kapangat-atang da, kapaysin-iipsok kan kapaydidiman, kapatohos so inawan, kan kadwan pa akma sira syay.
Binallaāgan ni Amos siraw tawotawo a basta magbabāwi sa kan maybidi sa do kosto a kapagdāyaw da do Dyos. Machita malinteg kan masingpet kaparin da do katayitayisa dyira. Masisīta a ipsok daw marahet, kan pagāryen daw kinalinteg do pangokoman (5:15). An dyi sa magbabāwi, makakāsi sanchi a tabo. Ta iyaw arawaw a kangay ni ĀPO, ki sari lang a abaw soho. Araw anchi nawri a makalidliday, kan aba polos sēdang (5:20).
Aran siraw nasnasyonaw do omdibon no Israel kan Joda, ki binallaāgan sa pa ni Amos a īto danaw karārayaw da a maynamot ta rinanggasan daw Israel kan Joda. Imbes a si Āpo Dyos a sibibyay a abos pandan dināyaw da, ki basbāli a pinatnek daw didyosen daw, as kan dināyaw daw bolto saw a ladawan no somayasayap kan komayakayab do tana. Siraw nasnasyon saya, ki siraw tawotawo do Aram, as kan Damasko iyaw sintro da. Mairāman saw tawotawo do Pilisteo do Gasa kan Tiro, as kan siraw tawotawo do Moab, Edom, kan Ammon, as kan no sintro da, ki Rabba.
No Naychakarwan no Nya Libro
No kaokom dan karoba no Israel (1:1-2:5)
No kaokom no Israel (2:6-6:14)
No dadima parmata (7:1-9:15)
Amos
1
1 Nya saw minsāhi a inpakatoneng no Dyos a maynamot do Israel a inpaiparmata na di Amos a asa magpaspastor a yapo do idi a Tekowa. Rinawat na saw nya minsāhi dadwa a katawen sakbay no gin-ginedaw* 1:1 No gin-gined, ki naparin do tawen a 760 sakbay no nakaiyanak ni Āpo Jeso-kristo. do kayan pa ni Ossias a āri do Joda, as si Jeroboam† 1:1 2 Ār. 14:23-29; 15:1-7; 2 Kron. 26:1-23 a pōtot ni Joas, ki āri do Israel.
2 Binata ni Amos a kāna,
“Kapaychirin ni ĀPO, komalebkeb a yapo do Sion,
kan akmay adey tīmek na do Jerosalem.
Do kasoli no Dyos, nagtīkag saw pagpaspastoran saw,
kan nahayo saw tamekaw do Tokon a Karmel.”
Okomen no Dyos Siraw Karoba no Israel
Sirya mana Aram
3 Bata ni ĀPO a kāna, “Nāw da maygaygatos no tawotawo do syodad a Damasko. As dawa, sigorādo a dosāen ko sanchi, ta taywara a makamwamomo karanggas a pinarin da dyirad tawotawowaw do tana a Gilead. 4 Maynamot do dyaya, ipanamay konchiw palasyowaw a pinatnek ni Āri Hasael,‡ 1:4 2 Ār. 10:32-33 kan temtemen ko sanchiw kōta ni Āri Ben-hada.§ 1:4 2 Ār. 13:3; Jer. 49:27 5 Rakraken konchiw rowangan saw no Damasko. Ipadiman ko sanchiw tawotawo do Payahosongan no Aben kan iyaw mangigpet so baston a iyaw pangōlo no Bet-eden. On, siraw nya tawotawo no Sirya, ki maakaw sanchi do tana a Kir a mabahod.”
Pilisteo
6 Bata ni ĀPO a kāna, “Nāw da maygaygatos no tawotawo do syodad a Gasa. As dawa, sigorādo a dosāen ko sanchi, ta inakaw daw tabo tawotawo no asa kanasyon a sibabahod, as nakailāko da sira a tagābo dyirad tawotawowaw do tana a Edom. 7 Maynamot do dyaya, ipanamay konchi iyaw pinakaahad no Gasa, kan temtemen ko sanchiw kōta na. 8 Ipadiman konchiw āri do syodad a Asdod.* 1:8 2 Kron. 26:6-7 Masaw do mangigpetaw so baston do syodad a Askelon. Dosāen ko panchiw tawotawo do syodad a Ekron,† 1:8 Ok. 1:18 kan siraw nakalāsat a Pilisteo, ki madiman sanchi.” Nyaw bata ni Āpo a DYOS.
Tiro
9 Bata ni ĀPO a kāna, “Nāw da maygaygatos no tawotawo do syodad a Tiro. As dawa, sigorādo a dosāen ko sanchi, ta inparawat da tabo tawotawo no asa kanasyon a sibabahod, as nakailāko da sira dyirad tawotawo do tana a Edom do nakainonolay daw so tōlag no kapaysisīt. 10 Maynamot do dyaya, ipanamay konchi iyaw pinakaahad no Tiro, kan temtemen ko sanchiw kōta na.”
Edom
11 Bata ni ĀPO a kāna, “Nāw da maygaygatos no tawotawo do Edom.‡ 1:11 2 Sam. 8:11-13; 2 Ār. 8:20-22; 14:7 As dawa, sigorādo a dosāen ko sanchi, ta linakatan da saw kakakteh da saw a Israelita§ 1:11 Siraw Israelita, ki kapotōtan ni Jakob a kakteh ni Esaw a iyaw kapoonan dan Edomita. so ispāda, kan aba polos kāsi da sira. Nāw da makasoli, kan polos sa a dya homanebneb. 12 Maynamot do dyaya, ipanamay konchiw Teman,* 1:12 Teman, ki asa idi do Edom, kan pinakainawan da pa tabo no tawotawo do Edom. kan temtemen ko sanchiw kōta no Bosrah.”
Ammon
13 Bata ni ĀPO a kāna, “Nāw da maygaygatos no tawotawo do Ammon. As dawa, sigorādo a dosāen ko sanchi, ta do kapachigobat da a maynamot do kakey da mayāgom so tana no matarek, binochakan da a iniwangan bodek dan mabōgi saw a mababakes a myan do Gilead. 14 Maynamot do dyaya, ipanamay konchi iyaw pinakaahad no syodad a Rabba, kan temtemen ko sanchiw kōta na. Do dāwrinchi a araw no kapaggobat, maychangēngengey sanchi, as akmanchi so mayitaw a bagyo iyaw mapasāmak a gobat. 15 Maakaw sanchiw āri na kontodo siraw opisyalis na a sibabahod, kan maiyangay sanchi do matarek a tana.” Nyaw bata ni ĀPO.
*1:1 1:1 No gin-gined, ki naparin do tawen a 760 sakbay no nakaiyanak ni Āpo Jeso-kristo.
†1:1 1:1 2 Ār. 14:23-29; 15:1-7; 2 Kron. 26:1-23
‡1:4 1:4 2 Ār. 10:32-33
§1:4 1:4 2 Ār. 13:3; Jer. 49:27
*1:8 1:8 2 Kron. 26:6-7
†1:8 1:8 Ok. 1:18
‡1:11 1:11 2 Sam. 8:11-13; 2 Ār. 8:20-22; 14:7
§1:11 1:11 Siraw Israelita, ki kapotōtan ni Jakob a kakteh ni Esaw a iyaw kapoonan dan Edomita.
*1:12 1:12 Teman, ki asa idi do Edom, kan pinakainawan da pa tabo no tawotawo do Edom.