1 Sota kangeto‐an na pari ni Hodiyos, emeshotokin medepo met laeng shi too, ja mengita‐shel met laeng ni totoo so nen Apo Shiyos, jet si‐kato pay i mengileton nonta kai‐akan ni totoo, ja animal la mepadti, ono kompormi, ja idaton sha so nen Apo Shiyos, say mepekawanan i basbasol sha. 2 Jet sajay ya pari ni Hodiyos, mebedin ngon amta toy pesing ton mengaasi so nonta ira emanbesol ja eg etod‐an ni kosto, ta angken si‐kato ngo, eshakel i toka pankodangi. 3 Isonga no mengileton ni daton ja kabol ni kepekawanan ni basol ira nonta totoo, kapiditan na mengileton ngo met laeng ni para so nonta basol ton mismo nem sina‐shom. 4 Jet sotan na pari, aliẃen si‐katon shorog i emili ni bakdang to ja manbedin ni kangeto‐an na pari; si Apo Shiyos i kaonshotok so ni toon manbedin ni kangeto‐an na pari. Inges to si Aaron nonta bayag da: si Apo Shiyos i shimotok son si‐kato ja manbedin ni pilmiron pari.

5 Jet angken si Cristo, aliẃen si‐kato shorog i engingeto ni bakdang to ja manbedin ni kangeto‐an na pari tayon emati, no diket say emili son si‐kato, si Apo Shiyos ja engikowan met laeng son si‐kato ey, “Si‐kam i anak ko, jet niman, si‐kak may amam.” Kowan nen Apo Shiyos, 6 jet ẃara pay i eshom ma esel nen Apo Shiyos ja naysolat ja kowan to ey, “Si‐kam i pari ni olay ingkatod ingka ja inges to si Milkisidik.”

7 Jet nonta kawasha nen Jesus shiya dobong, toka inangis tan toka ikedsang no sina‐shom i toka pansheẃat so nen Apo Shiyos, ta si Apo Shiyos bengat i makabaal ja memiyag mowan son si‐kato nem metey, jet intenengan nen Apo Shiyos, ta si Jesus, toka i‐onod ni olay i piyan nen Apo Shiyos ja dag‐en to. 8 Angken na si‐kato ket Anak nen Apo Shiyos, nanda‐kam pay laeng ni digat, ja sotan i inamta‐an ton pasiya ja mengi‐onod ni emin na piyan nen Apo Shiyos. 9 Jet nontan ma, enshiy kolang to, jet mebedin ma ja si‐katoy mengisedakan ingkatod ingka ni emin na memati son si‐kato. 10 Jet inkowan ma nen Apo Shiyos ey si‐kato may kangeto‐an na pari ja inges to si Milkisidik nonta bayag da.

11 No sota maypangkep iren jay den banag, eshakel i mebedin na maykowan, nem edigat ja may‐odog son si‐kayo, ta eg jo mala koston eẃatan. 12-13 Niman na timpo, istay mebedin na tod‐an jo ngo may eshom koma, nem mesepol la ẃaray mengitosho mowan son si‐kayo ni maypangkep nonta kapangdo‐an na ma‐ashal ja esel nen Apo Shiyos; eg jo kabaalan na eẃatan i na‐oneg ga toro. Arig jo sota nga‐nga ja katas bengat i mebedin na kenen to, ta eg to kabaalan sota apag. Jet sota toon sajay i itsora sha, kolang i amtaren kekosto‐i nen Apo Shiyos. 14 Sota apag, si‐katoy kakena ni na‐tengan men too, jet may‐eshig sotan so nonta na‐oneg ga toro ja anam nonta toon naydowam ma mandeka ni mapteng, ta mebedin ton idasin i ngaaw.