8
Mini bayale gigabi wuleneme biaganego ogo
1 Mini bayale gigabi wuleneme wandari mbira heyu howa olaradagua ina olalu ka.✡ Min 1.20-21
Manda buleneme bi larago ina hale habehe kama.
2 Ibugua hariga bare hombene ngarunagabi
hariga gebage ngarunagabi heyu howa ina olalu ka.
3 Tanoha anda pole wali agali ubanda tagi biaga panga haraba dugu a̱i̱ kagoria howabi
inahondo agua lalu ka.
4 Dindi wali agali kamiru bibahendehondo i̱na tí olalu kogoni.
5 Wali agali miniha boga nabi kamiru
tí ogoni mo yule i̱ kogoria ibidaba.
Wali agali mitangi bayuwa tigabi nabiaga kamiru
tí ogoniore mo yule i̱ kogoria ibai hadaba, lalu ka.
6 I̱na tíhondo bi baya buruguleorebi tigabiorebi langigi berogo
bayuwa hale hadaba.
7 I̱na horo bibahendengi bi henenego hangu laga kogoni.
Ke̱ holenebi bi yole ko tara tara ngarubi i̱ hame nalagaore kogoni.
8 I̱na bi laga bialu kogoni bibahende tigabi hanguore lalu kogoni.
Bi ke̱ howabi wali agali mo guya holebi mbira nalagaore kogoni.
9 Wali agali tinaga mitangi bulenebi manda bulenebi wále tigabi karume
i̱na bi larogonaga tenego manda biai ka.
Tigua i̱na bi larogoni henene laralo manda bulebira.
10 I̱naga bi tíhondo langialu kogoni muni ngolo silibabi ale ndo
i̱naga bi ogoni ibu galone daligaore pale ngago
tígua ogoni duniniore lowa yamilimu.
11 I̱ mini Bayale Gigabi kogoni.✡ Yob 28.15, Iba 19.11, 119.127
Dindini to̱le̱ ale tara tara ngiringarale palido hene duguwa
muni milo wabu ngarubi ndo kogoni.
Mbirale mbira baya tí hame lagane ale dindini ngarubi ndo
i̱ baya gibi daligaore kogoni.
12 I̱ mini Bayale Gigabi kogoni.
Mana bayale wále agua bialu holene nga lalu
i̱na manda bidogoni.
I̱na mbirale bibahende bayuwaore manda biai howa
mbirale baya hangu dabaga bulenego manda bidogoni.
13 Wali agali Anduane Homogo andaneha howa ibugua laradagua bialu haga karume
mana ko bulene handabe manga holebira.
Mine holeneru i̱ninaga mini mo yaraga holeneru mana ko tara tara buleneru ke̱ holeneru
mana uruni aleru i̱ hame nalagaore kogoni.
14 I̱na mbirale bule lalu manda mandabu wuwa bule ledogonidagua biruli.
I̱ mitangi bayuwa tigabiore biaga howa hongo gibihe kogoni.
15 Kini agali karumebi agali haguane karumebi tininaga dindi bayuwa hondo helo
i̱na biamogo bialu dindi mo baya holenenaga bi mana bayuwa wabu wilo biamogo biruli.
16 Dindini wali agali hondo haga agali haguane karu damenego bibahendeore ta nabi i̱na biamogo bigi berogome
tigua wali agali haru kagoni.
17 Wali agali i̱ hondole lowa hongo howa taya bialu karume
i̱ handa walia holebira.
Wali agali i̱ gubalini haga karu i̱na ti gubalini timbuniore haga kogoni.
18 I̱na wali agali mo homogo holene mbirale dewaorebi
mini mo yaraga holenebi tihondo mule kogoni.
Ti mana bayale tigabi bima pialu ti homogo holenenaga mbirale bayale bayale handa walia helo hamelo kogoni.
19 I̱na mbirale tihondo miagane ngogo
muni ngolo silibaru emene bayale lowa baya daligaore miaga kogoni.
20 Horo bibahendengi i̱na mana tigabi hangu bialu haga kogoni.
Dabolene tigabi dege dabaga kogoni.
21 Wali agali i̱ gubalini haga karu i̱na tihondo homogo holenenaga dewa mialu
ti andagani mbirale bayale bayaleme wu to̱lo tagi helaruli.
22 Ala bambaore Anduane Homogohanda mbirale wabule lowa i̱ore ala wabini.✡ Min 3.19, Yo 1.1, Mo 3.14
Ani buwa mani ibugua mbirale maru maru wabini.
23 Ala bambaore Anduane Homogohanda dindi nawabi howa
piganengi i̱ore ala wabiyagola i̱ ala hene.
24 Anduane Homogohanda iba solowarabi iba bedaru damene bibahendeorebi nawabi howa
i̱ore ala tagira íbu helenego kogoni.
25 Hari emene wedarubi timbuni wedarubi nawabi howa
i̱ore ala wabu helenego kogoni.
26 Dindi bibahende ngarubi mabu wima pedarubi uruni bibahende nawiaha i̱ ala wabini.
27 Anduane Homogohanda hari daliga li kago wabialu howa
hari ligonime iba solowara mo mabu bupe helayadagoningi
i̱ ibula hene.
28 Ibugua beraliba li harini ngelalu dindiha howa iba dugu dagadaga bilalu
dindi biru namu lalu iba solowara tagira íbu berelayadagoni
i̱ hewane dege ani bini.
29 Iba solowara ibu birairi helogoria tu bo mialu
tu o werogo bolodaga holeni lalu lamiyangi i̱ hene.
Dindi timbuni ogoni wabu wulenaga gumuni ala ibu pelayangi i̱ hene.
30 Anduane Homogohanda biabe uruni bigi biyangi i̱ ibu heba henego
ibugua i̱ mbirale mandabi biabe de hondo haga haradagua helaya.
Ibugua mbirale wabigi biyaru hondowa i̱na turu gibiore ho harugome
Anduane Homogo ibu mo turu haga biru.
I̱na Anduane Homogo ibu deni turu timbuniore ho haru.
31 Dindi ogo bibahende wabu wiyagobi
wali agali dindi ogoriani wabu helayagobi hondowa
i̱ turu timbuniore ho haru.
32 Anigo ai mini bayale gigabi ibugua bi agua latago hara.
I̱naga waneiginiru-o tígua i̱naga bi larogo baya hangu hale halu
i̱na biagane mana ngodagua tígua talialu bilimu.
Anidagua birimiyagua tí turuho holeberami.
33 I̱na tí lawai haga berogoni baya hangu hale haga bilimu.
Ani birimiyagua tí mini bayale gigabiwi holeberami.
Mana ogonidagua bulenego hado wanahalimu.
34 Wali agali i̱naga bi larogo hale halu biaga karu
ti turu holene nga.
I̱na ti horo bibahendengi lawai holiya ibuwa
i̱ ubanda tagi biaga anda harabani íbu haabo haga karu
ti turu haga kagoni.
35 Wali agali i̱ yamu yu karu ti holeneore yu holebira.
Ani bialu Anduane Homogo ibugua tihondo turuore ho holebira.
36 Wali agali i̱ yamia nabi karu
ti tinime tini mo ko halu ka.
Mbirali i̱ handabe mangaho kago ibu homolene hamelo kagoni.