1 Ra malabungbung ra Sade ing baa ga kankado taar, Maria nong ma Magadalen ga haan ukatika tano midi gaam a nas bia di gata pulek sei tar no haat tano matanangas tano midi. 2 Io, ga hilau tupas Saimon Pita ma no mes na bulu na hausur nong Iesu ga sip tar ia, gaam tangai bia, “Di ta kap lah no Watong maram tano midi ma pa mital palai bia di ta bul ia aha!”

3 Io, Pita ma no mes na bulu na hausur dir ga taman tut laah wara ukarawa tano midi. 4 Dir ga hilhilau haan, senbia no mes na bulu na hausur ga hilau naluai tane Pita gaam a luena hanuat karawa tano midi. 5 Ga rora laka uram ta ira sibana maal diet ga sua taar kaia, senbia pa ga laka. 6-7 Io, Saimon Pita um nong ga murmur haan tana ga me hanuat gaam haan laka tano midi. Ga nas ira sibana maal diet ga sua taar kaia tikai ma no maal na bunbusaan di ga pulus no wali Iesu ma ia. Iakano maal ga sua sisingen taar at ma ga tapuli timaan taar. 8 Io, no mes na bulu na hausur nong ga luena hanuat kaia tano midi ga haan laka mah. Ga nas ma ga nurnur. 9 (Pa dir ga palai baa bia ira nianga ta Kalou di ga pakat i tangai bia Iesu na tamat tut at talur ra minaat.)

10 Io, ira airua bulu na hausur dir ga tapukus balin taar ta ira ngasia dir tikatikai. 11-12 Senbia Maria ga tur taar at nataman tano midi ma ga susuah. Ing ga susuah, ga rora laka uram tano midi ma ga nas lah airua angelo. Ira nudir maal ga palpalana ma dir ga kis taar tano sibaan di ga hakuban tar baa no palatamai Iesu kaia. Tikai ga kis taar urau ra nuna ulalang ma nong tikai ga kis taar uras tano nuna kinakadus.

13 Dir ga tiri Maria bia, “Ai, u susuah warah?”

Ma Maria ga balu dir hoken: “Di ta kap lah no nugu Watong ma pa iau nunurei bia di ta bul ia ha.” 14 Ing ga tangai tar hua ga tahurus gaam nas Iesu ma ga tur taar kaia. Senbia pa ga nas kilam ia bia Iesu mon.

15 Ma Iesu ga tangai, “Ai, u susuah warah? Siga iakanong u nanaas tana?”

Maria ga lik bia ia no tena harbalaurai ta iakano matana dahai, kaikek gaam tangai tana bia, “Maris, bia u ta kap lah ia, hasasei iau bia u ta bul ia aha, iau naga a kap lah ia.”

16 Iesu ga tangai tana, “Maria.”

Maria ga talinganei ia ma gaam tangai tana hoken: “Rabonai!” (a kukuraina bia ‘Tena Hausur’ tano nianga gar na Iudeia.)

17 Io, Iesu ga tangai bia, “Waak u palpalim iau kanong pa iau tapukus baa uram hoing Mama. Senbia haan uras ta ira tasigu ma u na hasasei diet bia iau hanahaan um uram tano ragu Sus ma no adiet Sus mah, uram tano nugu God ma no nudiet God mah.”

18 Io, Maria nong ma Magadalen ga haan tupas ira bulu na hausur ma iakanin ra hasahesa: “Iau ta nas no Watong!” Ma ga hasasei diet bia Iesu gata tangai tar kaiken ra linga tana.

19 Ta iakano Sade ra matarahien rawarawa ira bulu na hausur diet ga kis hulungai taar narako tiga hala. Ma diet gata banus bat hadadas tar ira matanangas kanong diet ga burtei ira Iudeia. Ma Iesu ga hanuat ma ga me tur nalamin ta diet gaam tangai bia, “A malum ta muat!” 20 Ing ga tangai tar kaiken ga haminis ira airua lapara limana ma no binabatina ta diet. Ma ing ira bulu na hausur diet ga nas no Watong diet ga manga guama sakit.

21 Tiga pakaan balin Iesu ga tangai bia, “A malum ta muat! Hoing Mama gata tulei iau, io, iau mah, iau tultulai muat hua.” 22 Io, namur, ga manasung taar ta diet ma ga tangai, “Muat hatur kahai lah no Halhaliana Tanua. 23 Ing bia muat lik luban sei ira magingin sakena gar tikai, io, Kalou i ta lik luban sei ira nuna magingin sakena. Ma ing bia pa muat lik luban sei ira magingin sakena gar tikai, io, Kalou pai lik luban sei ira nuna magingin sakena.”

24 Tomas, nong di kilam ia bia no Kasang, ma ia tikai ta ira sangahul ma irua, pa ga kis tikai taar ma ira bulu na hausur ing Iesu ga hanuat. 25 Io, ira mes na bulu na hausur diet gaam hasasei ia bia, “Mehet ta nas no Watong!”

Senbia ga tangai ta diet hoken: “Ing bia pa iau na nas ira matana nil ta ira irua lapara limana ma bia pa ena bul no kaskas na limagu kaia, ma bia pa ena bul halaka no limagu tano binabatina, taia tutun at pa ena nurnur.”

26 Ma ra liman ma itul na bung namur ira bulu na hausur diet ga kis taar baal narako tano hala, ma Tomas tikai ma diet. Ma ira matanangas diet ga banus bat hadadas tar senbia Iesu ga hanuat ma ga tur nalamin ta diet gaam tangai ta diet bia, “A malum ta muat!” 27 Io, ga tangai ta Tomas hoken: “Bul no limaam kai. Nas ira lapara limagu. Tul sei no limaam ma u na bul halaka ia tano binabatigu. Waak u lilik irirua senbia u na nurnur!”

28 Io, Tomas gaam tangai tana, “Uga no nugu Watong ma no nugu God!”

29 Io, Iesu ga tangai tana bia, “U ta nurnur kanong u ta nas iau. Senbia diet daan ing pa diet nas iau ma diet nurnur at.”

30 Io, Iesu ga gil ra haleng mes na dadas na hakilang ra matmataan ta ira nuna bulu na hausur ing pa iau pakat halaka ta iakan ra pakpakat. 31 Senbia iau ta pakat kaiken waing muat naga nurnur um bia Iesu ia at no Mesaia, no Nati Kalou, ma bia muat na nurnur tana, io, muat na hatur kahai no nilon tutun nong i kis tana.