No Airua
na Pakpakat ta
IOANES
Ioanes no patuana apostolo ga pakat iakan ra pakpakat. Ta iakano pakana bung ira tena warawai diet ga hanahaan harbasiai wara warawai ma no tahut na hinhinawas. Ma Ioanes ga nem bia ira Kristian diet na harmarsai hargilaas ma diet na balak lah kaikek ra tena warawai. Senbia ga hatumarang mah diet ta ira tena hausur bisbis ing pa diet ga lik bia no tunatuna Iesu ia no Mesaia tutuna ma no Nati Kalou. Ioanes pa ga nem bia ira Kristian diet na balak lah diet ta ira nudiet hala, kaba diet gi harahut ira nudiet hausur bisbis.
1
Dahat na marsei hargilasanei dahat
1 Iau no patuana lualua na lotu, iau pakat iakan ra nianga ukatika tano numuat lotu nong Kalou i ta pilak ia hoing tiga bilai na hahina, ma ukatika ta muat ira mataniabar na lotu hoing ira natina. Ma iau, iau marsei muat haruat ma ira tutuna Kalou i ta hapuasnei ta dahat. Ma pai iau sena mon. Taia. Diet bakut ing diet nunurei ira tutuna ta Kalou ma diet ta kap timaan lah kaikek ra tutuna, io, diet marsei mah muat. 2 Kanong ira tutuna i sala kis taar ta dahat ma pa na panim laah.
3 Io, a harmarsai ma ra malum na kis tikai ma dahat maram ta Mama Kalou ma Iesu Karisito no Nati Mama kanong dahat kis tikai ma ira tutuna ma dahat marsei hargilasanei dahat.
4 Iau ga manga guama ing iau ga hadadei lah bia aring ta muat, muat sala lonlon murmur ira tutuna hoing no adahat Sus ga kurei tar ta dahat. 5 Ma kaiken iau saring no numuat lotu bia dahat na marsei hargilasanei dahat. Ma iakan ra warkurai iau pakat ia ukatika ta muat, pai sigarina ia. Taia. Ia mon iakan dahat ga kap ia naluai ra hathatahun. 6 Ma no magingin na harmarsai ia hoken: dahat na mur ira warkurai ta Kalou. Ma iakano warkurai nong muat ga hadadei ia naluai ra hathatahun ia hoken, bia dahat na hanahaan ma ra harmarsai harbasiai ta dahat.
Ira tena hausur bisbis
7 Iau saring muat hua kanong a haleng diet ta haan tano ula hanua ma diet lam habisbis ira mataniabar. Diet kaikek ing diet harhus bia Iesu Karisito ga hanuat ukai hoing tiga tunatuna. Ma ing bia tikai na harhus sei Karisito, a ebar ia tane Karisito ma ia nong i lamlam habisbis ira mataniabar. 8 Muat na harbalaurai, kaba ira linga dahat ta papalim uranai gi panim laah, iasen muat na hatur kahai ira hunuena bakut ira numuat mangason. 9 Siga tikai pai sala kis taar tano hausur ta Karisito ma i ta haan longai talur ia, io, pai hatur kahai Kalou. Ma iasen bia siga tikai i la kis taar ta iakano hausur, i hatur kahai Mama ma no Natina. 10 Ing bia tikai na hanuat tupas muat ma pai hanuat ma iakano hausur, io, waak muat balbalak lah ia ta ira numuat hala ma waak muat balbalaan ma ia. 11 Nong i harbalaan ma ia i harahut ia ta ira nuna sakana pinapalim.
12 Iau nem bia ena hasasei muat ta haleng na nianga senbia iau mola bia ena pakpakat. Ma iau lik bia na tale iau bia ena haan tupas muat dahat naga wor tikai ma naga kidilona no nudahat gungunuama.
13 Io, ira mataniabar ta iakano lotu ing Kalou ta pilak diet ma diet harbalaan ma muat, diet tula harmarsai ukatika ta muat.