6
Da Nasareta Yeisu siikatae tetelina
(Madiu 13:53-58; Luke 4:16-30)
1 Yeisu itaoya amo dadavayana ikalave go, ikaluvila ina toinina ina kasa, e ina tovatotowanayao sisabokuliye. 2 Sabati goi Tauyana ina Diyuu idi kaba tugúguna goi isiu ivatowo ivaatulúkwana. Ago tomota badabadaidi vadayana goi ina vatulúkwana sinovenove sikainaopa sidigo kadi,
‘Amo Tauyana ina nanamsa nako goi ikabi? Nakae ina guinuwa toogagaidi nimana goi iguuinuwedi manakaena iguinuwedi? 3 Iyaa! Amo Tauyana vada ana toyówana! Sinana Meri, senao moe Yemesa, Iyosese,‡ Iyosese: Madiu 13:55 goi ame youyana moe Iyosepa. Ame geya Meri monena Iyosepa geya. Ame Meri natuna tayamo. Da Giriki niyadi ameko goi geya imavadeta. Kopi maniyedi kadi, ‘Iyosese’ go, maniyedi kadi, ‘Iyosepa.’ Geya tayagoiyeta nako moitamo. Saimoni be Yuda. Niunao ameko sikaaiyaka tayaagoidi. Tauyana kita nakae.’
Tuwo gamodi igoyo, e Tauyana sikatae. 4 Go kina Yeisu idigo kana,
‘Yaubada ina tokabivalavala ana wowoina asa liliudi goi iibabane go, toinina ina kasa goi be toinina ina bodao goi be nakae toinina ina bodayauwo goi geya ana wowoinamo.’† Iyo 4:44.
5 Amoko goi tomota geya sinumiseta, tauna Yeisu geya itoboineyeta guinuwa toogagaidi badabadaidi iguinuwedi, go sem tokatówana adi taiyuwomo sima dabadi ibisikonedi ikidedevinedi. 6 Ago nuwona iwówana unana geya idi numisamo. Tuwo ina ivanibiníbita asa tamo tamo goi ivaatulúkwana.† Mad 9:35.
Yeisu ina tovatotowanayao yawou aiyuwo
adi lovina ivinidi ivamoleyedi sina sitalavaita
adi lovina ivinidi ivamoleyedi sina sitalavaita
(Madiu 10:1,5-15; Luke 9:1-6)
7 Yeisu ina tovatotowanayao yawou aiyuwo iduduwedi sima. Sima, lovina ivinidi bei itoboinedi dimoni sivatapiyedi. Ikavava, adi taiyuwo adi taiyuwo ivamoleyedi sina asa tamo tamo goi. 8 Go latuwona Yaubada sinumise, tauna mainao ilovinaedi idigo kana,
‘Imi vaníbita goi nima kaka kōna. Imi kaituko kaka kokabīdi, ame tauna; tuwaina geya. Ami kinare geya, wasare geya, esaesa ma saisairina geya, 9 go sem ami sendoro kovalilivīdi, ami kwama tayamo kolōsi go, kwama aiyuwoina taabu kokabikābi.’
10 Tuwaina kana,
‘Ava vada goi neta kosiu, moeko goi kokaaiyāka ana kadókana kotaoya asayana kokalave. 11 Go ava kasa goi kosiu, neta toni kasa geya siuyaonemita o imi livala geya sinovedita, e asa amo kokalāve go, tutayana kosowóduwo, e asayana kaukauna aemi goi kokatumaumāui. Moe imi katumátala tauyadi yaidi bego Yaubada itavileiyedi.’† Gui 13:51.
12 Tuwo ina tovatotowanayaoyadi sitaoya sina asa liliudi goi sivanibiníbita, e tomota yaidi sitalavaita bego situgavila. 13 Ago dimoni tomota yaidi sivatapiyedi be nakae tokatówana liliudi pútuma goi sikatukoisidi, e sikidedevinedi.† Yem 5:14.
Erodi ina tainasi
be nakae Iyoni tosayóyova ina kámasa tetelidi
be nakae Iyoni tosayóyova ina kámasa tetelidi
(Madiu 14:1-12; Luke 3:19-20, 9:7-9)
14 E tolovina Erodi Yeisu ina guinuwa valena inove. Bogina kuyagoi. Yeisu yoina bogina gagaina, tomota liliudi sivaateteli. Tauyana manuna tomota maniyedi sidigo kadi,
‘Moe Iyoni tosayóyova. Tokámasa yaidi goi Yaubada bogina ikaitáoe. Ame pasina Tauyana itoboine guinuwa toogagaidi iguuinuwedi.’
15 Go tomota maniyedi sidigo kadi,
‘Yeisu moe Eliyau.’
Go maniyedi kadi,
‘Tauyana tokabivalavala nakae boi Yaubada ina tokabivalavalayao.’† Mad 16:14; Mak 8:28; Luk 9:19.
16 E tutayana livalayadi Erodi inovedi, idigo kana,
‘Nakona Tauyana Iyoni tosayóyova! Boi yau guna lovina goi nukotona sibobo ikámasa go, tokámasa yaidi goi Yaubada bogina ikaitáoe.’
17 Erodiyana ina nuwonúwana unana ame: Boi tauyana ina lovina goi ina tovayaviyayao sina Iyoni siyoisi, nimana siyowóidi, e deri goi sivaisiu siyana Pilipo monena Erodiyasi manuna. Boi mainao Erodiyasiyana moe Pilipo monena go, kina Erodiyana siyana monena tubitubina igagi. 18 Iyoniyana ana yóita unana tuta liliuna Erodi ilaatuwoko kana,
‘Erodi, kom geya am tagonamo bei siyam monena kunai!’
Tauna deri goi Iyoni sivaisiu. 19 E kina go Erodiyasiyana iegamogamogu Iyoni ina livala pasidi, tauna latuwona tauyana sikaumate go, enao geya. 20 Kina go Erodi mana wowoina Iyoni imatoite, tuwo imatakavate unana iyagoi tauyana tokibóbwata be nakae kimaasabaina Yaubada umana. Erodiyana neta Iyoni ina livala inovedi, pasidi nukotona iwówana gagaina go, mana uyáwana tauyana itaiiyakeke. Tauna Erodiyasiyana enao geya ibabaneyeta bego Iyoni ikaumate.
21 E Erodiyana ina bíbina ana maliyalina isowóduwo. Moeko goi Erodiyasi bogina enao inuwobabane Iyoni ana kaumata manuna. Amo maliyalinayana goi Erodi áika iguinuwe go, ogaoga maniyedi iduduwedi sima. Ogaogayadi moe koroto gagaidi, tovayaviya adi tokalikumatanayao be nakae da Galili idi tomoyamoyayao. 22 Aikayana goi Erodiyasi natuna vavina isiu ina boda matadi goi iláusa go, ina lausayana Erodi mana ogaoga ivauyaonedi. Tuwo Erodi woiyaiyana ilatuwoko idigo kana,
‘Kaga latuwom, kukawanoiyēgu, bei avinim.’
23 Go ikatótula nakae ilapasaisai idigo kana,
‘Kaga kukawanoiye yaigu, bei avinim. Neta guna kaba lovina, bei awotai dadava tayamo avinim.’
24 Tuwo woiyaiyana isowóduwo ina sinana yaina goi ilumadádana idigo kana,
‘Sinagu, kaga bei akawanoiye tomoya yaina?’
‘Latuwogu Iyoni tosayóyova bulubuluna’, sinanayana kaena.
25 E woiyaiyana woilina ikaluvila ima tolovina ilatuwoko idigo kana,
‘Latuwogu bego ame tutayana Iyoni tosayóyova bulubuluna noko goi kudodōi kuvinīgu.’
26 Ame livalayana tolovina inove, nuwona imou gagaina go, ina katótula pasina be nakae ina ogaoga pasidi geya latuwona woiyaiyana ina kawanoi ikatae. 27 E tolovinayana ina tovayaviya tayamo ilatuwoko idigo kana,
‘Kūna deri goi Iyoni nukotona kubōbo. Ikavava, bulubuluna kūme.’
Tuwo moitamo tovayaviyayana itaoya ina deri goi Iyoniyana nukotona ibobo. 28 Ibobo ikavava, bulubuluna ikabi, nokoyana tobuna goi idodoi ime woiyaiyana ivini. Tuwo ikabi inave sinana ivini.
Moe pasina tauna Erodiyana itainasi inuwonúwana Yeisu moe Iyoni go, bogina itaoyamna.
29 Niga Iyoni ina tovatotowanayao ina vailai valena sinove, sima wowona sikabi, sinave valiwoga tukubu goi siyato.
Boda ainima tausani (5,000)
Yeisu ivaakanidi tetelina
Yeisu ivaakanidi tetelina
(Madiu 14:13-21; Luke 9:10-17; Iyoni 6:1-15)
30 Yeisu ina vamoleyanayao sikaluvilamna sima Tauyana yaina goi sigúguna go, kaga liliuna idi vaníbita goi siguuinuwedi be sivaatulúkwana sivatétala adi kaibako. 31 Tauyana ilatuwokoidi idigo kana,
‘Dadava ame takalāve, tāna yoyowo goi giyaina amitava kowaiwāsi.’
Moitamo, kidi waiwasi geya. Boda gagaina sivaviilavila, tuwo ina tovatotowanayao geya itoboinedita siwaiwasi o sikáika nakae. 32 Tuwo, taudiva oga tayamo goi sisowoya sikailova bego sisaidámana sina yoyowo tayamo goi. 33 Go boda maniyedi sikandoiwo sigitedi sinonoina go, sikinanedi. Tuwo, bodayadi be nakae asa liliuna ana tokaiyakayao madabokidi taiyao silokoinakumgo sina dadavayana goi sigimisowóduwo. 34 E Yeisu mana tovatotowanayao bogina sima sivaiu, Tauyana isou labutabuta goi go, boda gagaina igitedi tauyadi sipi geya adi tomatakavatamo nakae.† Yoy 27:17; 1To 22:17; 2Te 18:16; Isi 34:5; Mad 9:36. Tauna inuwokapisiyedi go, ibibilágata vatulúkwana badabadaidi ivatulukoidi.
35 Bogina lavilavi toina Yeisu ina tovatotowanayao sima silatuwoko sidigo kadi,
‘Ame yoyowo go! Aiyuwoina níyala giyakainava bei isaliu. 36 Neta boda kuvalilivēdi bego sina asa maniyedi kikida goi avadi sigimona.’
37 Go kina idigo kana,
‘Komi kovakanīdi.’
Go kidi sidigo kadi,
‘Manakaema? Manakae kana boda ame go, giyaina kaeda avadi kagimona? Beredi boda ame manuna moe ana maisa ivakaigaga nakae tukówana ainima aito ima paisewa ana maisa!‡ Tukówana ainima aito ima paisewa ana maisa: Kidi da Giriki niyadi goi kadi, ‘Adi beredi adi maisa tu andedi (200) denari.’ Ego denari moe kidi idi mani yoina. Tu andedi (200) denari moe nakae neta koroto tayamo ipaisewa tukówana eita goi go, ana maisa madabokina amo tukowanayadi manudi ilamgogoidi. Kai geya itoboinemeta kavakanidi.’
38 ‘Komi aivina ami beredi? Kōna kogīte’, Tauyana kaena.
Tuwo sina sigite ikavava, sikabidi sikaluvila sidigo kadi,
‘Beredi ainima, íyana aiyuwo.’
39 Tuwo Yeisu idigo kana,
‘Kōna boda kokiwotāidi, e gúguna tamo tamo limou goi situsobu.’
40 Tuwo moitamo sina bodayadi sikiwotaidi go, gúguna tamo tamo situsobu, maniyedi andedi (100), maniyedi pipiti (50) nakae. 41 Ago berediyadi ainima be iyanayadi aiyuwo Yeisu sivini. Tuwo ikabidi, ikandolaga yábana goi, manudi ikauyagu Yaubada yaina. Ikavava, berediyadi ikivisidi, ina tovatotowanayao ivinidi bego sina sikaiguyauyedi bodayadi yaidi. Ikavava, iyanayadi nakae ikivisidi ivinidi sikaiguyauyedi. 42 Tuwo tomota madabokidi sikáika gamodi. 43 Sikáika ikavava, ina tovatotowanayaoyadi beredi be íyana valalaidi sikatunokunokudi go, moe bayao yawou aiyuwo sikayaoda. 44 Tokáika koroto kaka adi badabada moe ainima tausani (5,000).
Yeisu Galili Bwaena yatana goi iiketoiya tetelina
(Madiu 14:22-27,34-36; Iyoni 6:16-21)
45 E Yeisu ina tovatotowanayao ilatuwokoidi idigo kana,
‘Oga goi kosowōya, kovakūmgo kotavīla kōna Betesaida ta dadava go, yau boda bei alatuwokoidi sisáwala sina idi kasa.’
46 Tuwo ina tovatotowanayao ivalavedi go, bodayadi ilatuwokoidi sisáwala. Ikavava, ituko koya goi ikawanoi.
47 Níyala bogina isaliu go, ina tovatotowanayaoyadi Galili Bwaena nauyayanaina goi sibeubéuta. Sibeubéuta go, Tauyana anetava koyayana goi ikaaiyaka. 48 Ago ikandoiwo ina tovatotowanayaoyadi igitedi sibeubéuta go, sikúyuwo. Bogina kuyagoi, yágira matadi goi. Iigitedi, tuwo botomotomo bwae yatana goi iketoiya imamaima. Bego isaivata 49 go, ina tovatotowanayao sikandobala Tauyana sigite bwae yatana goi iketoiya imamaima, tauna sipodeda sidigo kadi,
‘Baloma goamo!’
50 Moitamo. Madabokidi sigite, atedi siyova, tauna sipodeda. E Yeisu mainao ilatuwokoidi kana,
‘Kokatepātu! Yau Tauyagu. Taabu koomatōita!’
51 Ibóbwara ikavava, oga goi isowoya tauyadi taiyao, e yagirayana idaúmwara go, kidi nukotodi iwówana gagaina toina. 52 Moitamo. Boi beredi adi vaituwo ana yagoina sigite go, nava geya siyagoiyeta Yeisu mana togaga, go sem dabadi sikasa.
53 Yeisu mana tovatotowanayao bogina sisaidámana sina Genesareta dadavina goi sivaiu, idi oga sivailowo. 54 Sivailówana ikavava, oga goi sisou go, toni kasa sikandoiwo Yeisu sikinane. 55 Tuwo tomotayadi silokoina sina asa liliudi amo dadavayana goi idi tokatowanayao sikabidi, sivaliyaliyakedi go, nako goi sinove Yeisu ikaaiyaka, e sinavedi amoko goi. 56 Neta Tauyana asa giyaidi o gagaidi goi isiu, tomota liliudi idi tokatowanayao sikabidi simedi aba maketi goi siyatoidi go, sikawanoi makimaki Tauyana yaina kadi,
‘Kutagonema am kwama kikina kaka kabisikone?’
Tuwo moitamo itagonedi go, avatauwa neta sibiisikone, e siboboina.
‡6:3 Iyosese: Madiu 13:55 goi ame youyana moe Iyosepa. Ame geya Meri monena Iyosepa geya. Ame Meri natuna tayamo. Da Giriki niyadi ameko goi geya imavadeta. Kopi maniyedi kadi, ‘Iyosese’ go, maniyedi kadi, ‘Iyosepa.’ Geya tayagoiyeta nako moitamo.
†6:15 Mad 16:14; Mak 8:28; Luk 9:19.
†6:34 Yoy 27:17; 1To 22:17; 2Te 18:16; Isi 34:5; Mad 9:36.
‡6:37 Tukówana ainima aito ima paisewa ana maisa: Kidi da Giriki niyadi goi kadi, ‘Adi beredi adi maisa tu andedi (200) denari.’ Ego denari moe kidi idi mani yoina. Tu andedi (200) denari moe nakae neta koroto tayamo ipaisewa tukówana eita goi go, ana maisa madabokina amo tukowanayadi manudi ilamgogoidi.