Maki
Vala Dedevina Maki igini
Livala Aba Vaita
Buki ame Maki igini. Tutayana igini, Roma goi ikaaiyaka. Ame bukiyana moe Yeisu ina tonumisayao Roma goi adi buki. Boi tonumisayadi idi numisa pasidi mou sibaabanedi. Tuwo buki ame nakona aba vaita yaidi.
Makiyana buki ame igini moe Iyoni Maki (Guinuwa 12:12, 25, 13:4, 13, 15:37-41; Kolose 4:10, Pilemoni 24, 2 Timoti 4:11). Pita tétala ame ivateteli Maki inove igini. Nakona buki ame tala 55 ina 60 go, nauyayanaidi goi igini.
Buki ana masi aiyuwo. Tayamo moe Yeisu Yaubada ana Vadámana go, tayamo moe Yeisu tomota liliudi adi tovaita.
Tétala Luluna
1. Vala Dedevina ana kaba vatowo 1:1-13
2. Yeisu pasina tomota sikainaopa go, tolovina sivakaleya 1:14—3:6
3. Tomota liliudi Yeisu sigite sitainasiye go, dimoni sikinane 3:7—5:20
4. Yeisu Guyau ina togaga ikaiwoduwe 5:21—8:26
5. Yeisu kina Guyau go, Guyauyana mana tosabokuliyao gedageda bei sibabane 8:27—9:1
6. Yeisu ana sabokuli nakonakae 9:2—10:52
7. Yeisu ina guinuwa Yerusalema goi 11:1—13:37
8. Yeisu ana yóita, ana kotu be ina kámasa tetelidi 14:1—15:47
9. Yeisu ina taoyamna tetelina 16:1-20
Vala Dedevina ana kaba vatowo
1
(Maki 1:1-13)
Iyoni tosayóyova ina katubayásina
Yeisu ina sowóduwo manuna tetelina
Yeisu ina sowóduwo manuna tetelina
(Madiu 3:1-12; Luke 3:1-9,15-17; Iyoni 1:19-28)
1 Vala Dedevina ame Yeisu Guyau, Tauyana Yaubada Natuna, valena ana kaba vatowo. Ana kaba vatowoyana ame nakae:
2 Boi nimatu Yaubada ina tokabivalavala Aiseya‡ Aiseya: Boi nimatu Maki ana kopi maniyedi kadi, ‘Yaubada ina tokabivalavalayao.’ Ana kaigigita tokaidámana tayamo toinina ina nuwonúwana igini bego ikimavade bei tomota siyagoi livala aiyuwo moe geya Aiseya ina livala geya, go sem Yaubada ina tokabivalavalayao adi taiyuwo, Malakai be Aiseya. ina buki igini, e Tauyana ina livala Guyau manuna italavaite, idigo kana,
‘Gwa, guna lobutu ana tolokoina aetune ivakumgoiyem.† Tat 23:20.
Tauyana bei im kenao ikimavade.
Malakai 3:1
3 Toduduwo niyana gagaina yoyowo goi iiduduwo kana,
“Yauwe ina kenao kounāi
be nakae kokitotomōi!” ’† Iyo 1:23.
Aiseya 40:3
4 Nakae Aiseya ina talavaitayana, e Iyoni tosayóyova ina yoyowo goi tomota yaidi itaalavaita idigo kana,
‘Imi goyo goi kotugavīla namliyeta bei asayoyoimi, e bei Yaubada imi goyo inuwotaoidi.’
5 Itaalavaita go, boda gagaina Yudiya ana dadava madabokina goi be nakae da Yerusalema madabokidi sima tauyana sitaiyakeke go, idi goyo sitalavaitedi namliyeta bwae sákala Iyoridani goi isayoyoidi. 6 Iyoniyana ana kwama moe Yaubada ina tokabivalavala ana kwama nakae tuta liliuna ilosilosi. Ana kwamayadi kameri unuununa goi siwodugudi. Ana gadíwana tolobona goi moe yoguyogu sakavaina.† 2To 1:8. Ago tatabole be mokava ikakáika. 7 E tauyana itaalavaita, idigo kana,
‘Tauyana mligu goi imamaima itobukukuyuigu;† Iyo 1:15,30. nakae geya itoboineguta bei asakululu ana sendoro ana búyala ataligei unana yau sobuyekoina. 8 Yau bwae goi bogina asayoyoimi go, Tauyana Baloma Kimaasabaina goi bei isayoyoimi.’
Yeisu ana sayóyova tetelina
(Madiu 3:13-17; Luke 3:21-22)
9 Moe nakae Iyoni ina katubayásina Yeisu ina sowóduwo manuna. Amo lavayana Yeisu itaoya Galili asaina Nasareta goi ina sákala Iyoridani goi. Iyoniyana nava tomota isaayoyoidi, tuwo Yeisu isayoyoi. 10 Isayoyoi ikavava, bwae goi isinalaga, e mainao ikandolaga igite yábana sekulapeyaina Yaubada ikiise go, Baloma Kimaasabaina bunabuna nakae isou imamaima Yeisuyana yaina goi. 11 Ago aníyana tayamo yábana goi itumasobu kana,
‘Kom Natugu guna kakaya, auyaonedokoim.’† Abv 22:2; Sam 2:7; Ais 42:1; Mad 3:17, 12:18; Mak 9:7.
Yeisu ana vakakona tetelina
(Madiu 4:1-11; Luke 4:1-13)
12 E Baloma Kimaasabaina Yeisu ietune ina yoyowo goi. 13 Amoko goi maliyalina poti (40) ikaaiyaka. Amo tutayana kina Kaleya ima Yeisu ivakakone. Ego Yeisu ikaaiyaka yoguyogu sasasaidi taiyao go, anerose sima simataakavate.
Yeisu pasina tomota
sikainaopa go, tolovina sivakaleya
sikainaopa go, tolovina sivakaleya
(Maki 1:14—3:6)
Yeisu ina paisewa Galili goi:
Ina tovatotowanayao vakuumgoidi iduduwedi
be nakae Vala Dedevina italavaite
Ina tovatotowanayao vakuumgoidi iduduwedi
be nakae Vala Dedevina italavaite
(Madiu 4:12-22; Luke 4:14-15)
14 E gávana Erodi ilovina Iyoni siyoisi deri goi sivaisiu. Iyoni ana yoitayana mlina kina Yeisu itaoya ina Galili ana dadava goi Yaubada Valena Dedevina itaalavaite, 15 idigo kana,
‘Tuta Yaubada boi iupeupe bogina isowóduwo, e ina kalibúbuna bogina imaiyaba bei itoboinemi kosiu. Kotugavīla be Vala Dedevina konumīse.’
16 Yeisu Galili Bwaena labutabutaina goi iivayali go, Saimoni maa siyana Anduru igitedi idi úwata bwae goi silavelave. Bogina kuyagoi. Adi taiyuwokova tóuwata. 17 E igitedi, ilatuwokoidi idigo kana,
‘Kōma kosabokuliyēgu bei avayokoimi tomota adi touwatayao.’
18 E tuwo moitamo kidi mainao sitaoya, idi úwata sikalave go, Yeisu sisabokuliye. 19 Tauyadi giyaina sivayalikova go, Yeisu ikandobala Sebedi ma natunao Yemesa be Iyoni igitedi, oga goi sikaaiyaka idi úwata siyaanumedi. 20 E igitedi, iduduwedi idigo kana,
‘Komi kōma kosiukōigu.’
Tuwo moitamo kidi mainao sitaoya, tamadi Sebedi mana topaisewayao kiveko oga goi sikalavedi go, sima Tauyana sisabokuliye.
Yeisu koroto tayamo ikideedevine tetelina
(Luke 4:31-37)
21 Yeisu mana tovatotowanayao siketoiya sina Kapaneumi goi sisiu sikaaiyaka. E Sabati sina Diyuu idi kaba tugúguna goi sisiu go, Yeisu ivaatulúkwana. 22 Ina vatulukwanayana pasina boda sikainaopa, kadi,
‘Tauyana ina vatulúkwana geya kada kidi Yaubada ina Katukeda ana tovatulukwanayao nakae geya, go sem mana lovina ivaatulúkwana.’† Mad 7:28-29.
23 E idi kaba tugugunayana goi koroto tayamo naagovaina ikaaiyaka. Korotoyana iduduwo idigo kana,
24 ‘Yeisu guma Nasareta, yau guna polava moe geya kom im polava. Manakae? Kuma bei kai kumtulima ae? Kom taum bogina ayagoim. Kom Totumasaba, Yaubada goi kuma.’
25 Go kina Yeisuyana ibove, idigo kana,
‘Tuwo! Kumaigāumo go, koroto yaina goi kusowōduwo!’
26 Tuwo dimoniyana koroto ikinagove itátava go, mana podeda gagaina korotoyana yaina goi isowóduwo ina. 27 Tomota madabokidi sikainaopa, tauna taudiva silumadadedi, sidigo kadi,
‘Iyaa, ame manakae? Vatulukwana vau mana lovina! Dimoni nakae ilovinaedi go, Tauyana sopana sikabiikaone!’
28 Tuwo Tauyana valena isagayako ina asa liliudi Galili ana dadava goi.
Yeisu Pita yaona be tomota liliudi
ikidedeevinedi tetelina
ikidedeevinedi tetelina
(Madiu 8:14-17; Luke 4:38-44)
29 E Yeisu itaoya aba tugugunayana goi isowóduwo go, Yemesa be Iyoni taiyao sina Saimoni be Anduru idi vada goi sisiu. 30 Ego Saimoniyana yaona (moe monena sinana) manaa katówana iimasisi. E vavinayana manuna Yeisu silatuwoko. 31 Tuwo ibala ina vavinayana nimana iyoisi ibutáoe. Ibutáoe, ina katowanayana ikalave. Ikavava, itaoya ina avadi ivaideda.
32 E asa bogina lavilavi, tutayana níyala iisaliu, toni kasa idi tokatówana be nakae tomota naagovaidi, e liliudi simedi Yeisu yaina. 33 Tuwo asa ana tokaiyakayao madabokiidi sima vadayana totomna goi siitaoya. 34 Tokatówana badabadaidi be tauyadi naagovaidi badabadaidi Yeisu ikidedevinedi. Ago dimoniyadi Yeisu bogina siyagoi, tauna geya itagonedita sibóbwara.
Yeisu itoboine Vala Dedevina italavaite asa liliudi goi
(Luke 4:42-44)
35 E botomotomo toina Yeisu itaoya vada goi isowóduwo go, aneta ina yoyowo goi ikaawanoi Yaubada yaina. 36 Ikaawanoi go, Saimoni senao taiyao sina Tauyana silusale makimaki. 37 Silusale, sibabane, silatuwoko sidigo kadi,
‘Iyaa! Tomota madabokidi siluusalem, latuwodi kom.’
38 Go Yeisuyana idigo kana,
‘Tāna asa maniyena bego amoko goi nakae Vala Dedevina atalavaite tomota yaidi. Moe pasina tauna ama.’
39 Tuwo moitamo ina Galili ana madabokina goi ivanibiníbita go, Valayana Diyuu idi kaba tugúguna tamo tamo goi itaalavaite be nakae dimoni ivataapiyedi.† Mad 4:23, 9:35.
Yeisu tolepero ikideedevine tetelina
(Madiu 8:1-4; Luke 5:12-16)
40 Tuta tayamo tolepero tayamo ima Yeisu yaina goi aena ivatugúyala, ikawanoi makimaki idigo kana,
‘Neta im nuwonúwana nakae, itoboinem kukidedevinegu bei sakavaigu imavada.’
41 Tuwo mana nuwokapisi‡ Nuwokapisi: Ame livalayana da Giriki niyadi ana yagoina aiyuwo. Tayamo nuwokapisi go, aiyuwoina nakona Maki igini kana, ‘Yeisu gamona igoyo toina korotoyana ina vísiya pasina.’ nimana iyosale toleperoyana ibisikone idigo kana,
‘Guna nuwonúwana nakae. Kumavāda!’
42 Tuwo mainao korotoyana sakavaina ina lepero ikavava, e sakavainayana imavada. 43-44 E korotoyana ikatumatali makimaki idigo kana,
‘Kunōve! Am kimavadayana manuna geya vatau tayaamo kulaatuwōko, go sem kūna Tonúwala yaina goi kuvagitakōim igitem bei ivayokoim kom bogina kumavada. Ikavava, im vininabeso yoguyogu kukasāle Yaubada yaina ada lovina boi Mosese iivinida tolepero adi kimavada manuna nakae.† Vin 14:1-32. Moe aba kinana tomota yaidi sakavaim bogina imavada, e bei siuyaonemneim.’
Ikatumatali ikavava, ilatuwoko ina. 45 E kina go korotoyana ina Tonúwala yaina iguinuwe nakae Yeisu ilatuwoko go, Yeisu ina sanaboda geya ikabikaoneyeta, go sem ina tomota yaidi ivatowo Yeisu ina guinuwa tetelina italavaite. Tuwo Tauyana valena isagayako. Tauna geya tuwaina itoboine asayadi sinaedi goi ivamaamaétala, go sem ina yoyowo goi ikaaiyaka. Go asa liliudi goi tomota simamaima Tauyana yaina.
‡1:2 Aiseya: Boi nimatu Maki ana kopi maniyedi kadi, ‘Yaubada ina tokabivalavalayao.’ Ana kaigigita tokaidámana tayamo toinina ina nuwonúwana igini bego ikimavade bei tomota siyagoi livala aiyuwo moe geya Aiseya ina livala geya, go sem Yaubada ina tokabivalavalayao adi taiyuwo, Malakai be Aiseya.
†1:6 2To 1:8.
†1:11 Abv 22:2; Sam 2:7; Ais 42:1; Mad 3:17, 12:18; Mak 9:7.
‡1:41 Nuwokapisi: Ame livalayana da Giriki niyadi ana yagoina aiyuwo. Tayamo nuwokapisi go, aiyuwoina nakona Maki igini kana, ‘Yeisu gamona igoyo toina korotoyana ina vísiya pasina.’
†1:43-44 Vin 14:1-32.