17
Yauwe ina kanasíuna ana kaba kinana
1 Tuwo Eberam ikaiyaka aaa, ana tala naintinain (99) ibabane, e Yauwe isowóduwo yaina, idigo kana,
‘Yau Yaubada Tokalika. Im ketoiya madabokina goi kwabikaonēgu go, tuta liliuna im guinuwa goi geya am pikwanāmo. 2 Bei akanasiukoim be nakae akisailim gagaina, tubumowo badabadaidi.’
3 Tuwo Eberamyana ivatugúyala ikanakabobo go, Yaubada idigo kana,
4 ‘Kunōve. Yau guna kanasiunayana yaim ame nakae: Akatótula bego kom bei boda badabadaidi tubudi. 5 Tauna geya tuwaina yoim Eberam, go sem bogina avayokoim kom bei boda badabadaidi tubudi, tauna yoim vau moe Eberamo.‡ Eberamo: Ame youyana Isileli tubunao niyadi goi ana taiyakeka nakae boda badabadaidi tubudi.† Rom 4:17. 6 Bei akisailim gagaina, e bei kom goi boda badabadaidi sisowóduwo nakae kom tubumowo goi tokalibúbuna maniyedi bei sisowóduwo. 7 Guna kanasiunayana akamoitamoe bego ikaiyako vata kom ma natumowo nakae tubumowo be yau yaida. Yau bei im Yaubada go, nava bei tubumowo idi Yaubada.† Luk 1:54-55. 8 Kenani goi kom tuta ame kueogaoga go, nava bei poyapoya ana madabokina Kenani goi kom nakae tubumowo avinimi, e bei ikaiyako vata yaimi.† Gui 7:5. Yau bei tubumowo idi Yaubada.’
9 Aiyuwoina Yaubada idigo kana,
‘Kom sem guna kanasiunayana ana lovina kuyoisiikavāte. Tubumowo mlim goi simamaima nakae siyoisiikavāte. 10 Guna kanasíuna ana lovinayana ame nakae: Kom be nakae koroto madabokimi yaimi sakavaimi kokupōidi. Nava tubumowo koroto nakae latuwogu sakavaidi sikupoidi. 11 Sakava ana kupwanayana moe aba kinana kom be Yau yaida bego bogina akanasiukoim.† Gui 7:8; Rom 4:11. 12-13 E ame tuta nakae tuta simamaima ava gómana koroto ibíbina yaim goi, neta ana maliyalina ainima aito bogina ibabanedi, e sakavaina kukūpo. Nakona im vada goi ibíbina o tauyana paakonina ogaoga goi kugimone, tauyana sakavaina kukūpo. Ame aba kinana yaida bego akanasiukovataem. 14 Ago ava koroto neta sakavaina geya ikupoeta, tauyana geya guna boda, tauna yaimi goi kulivisīye be kuvatapīye. Tauyana guna kanasíuna ana lovina bogina ikapipilave.’
15 E tuwaina Yaubada idigo kana,
‘Eberamo, geya tuwaina monem kududūwe Serai, go sem kududūwe Sera.‡ Sera: Ame youyana ana yagoina moe tolovina natuna vavina. 16 Bei akaipakuye, e bei tauyana goi natum koroto avinim. Aiyuwoina akaipakuye bei tubunao goi boda badabadaidi sisowóduwo go, bodayadi tubudi moe tauyana. Ago tubunao goi tokalibúbuna maniyedi bei sisowóduwo.’
17 Tuwo Eberamo aena ivatugúyala ikanakabobo go, ivanama; ina nuwonúwana kana,
‘Yau guna tala tayamo andedi (100) go, Sera ana tala naintinain (99). Manakae? Itoboinema kavenátuna?’
18 Go tauyana Yaubada ilatuwoko idigo kana,
‘Neta im kaipaku isowóduwo natugu Isimaeli goi! Sera ikágala, tauna kaga liliuna kukaatotule yau yaigu, nakona natugu Isimaeli yaina kuguinuwe.’
19 Go kina Yaubada idigo kana,
‘Tauyana geya, go sem monem Sera bei ivenátuna, natuna koroto go, bei kuvayou Aisake.‡ Aisake: Ame youyana ana yagoina moe ivanama. Tauyana be nakae tubunao bei akanasiukoidi go, anasiunayana bei ikaiyako vata yaidi. 20 E kina go Isimaeli manuna, im kawanoi bogina anove, tauna kunōve. Moitamo tauyana nakae bei akaipakuye. Bei akisaili gagaina, e natunao badabadaidi. Nakae natunao be tubunao akisailidi, e badabadaidi sisowóduwo. Tauyana natunao koroto adi badabada yawou aiyuwo go, tauyadi tokalibúbuna. Niga be tubunao moe boda tayamo gagaina. 21 Go tala tayamo ikavava, Sera bei ivenátuna, natumi Aisake go, niga bei Aisakeyana akanasiuko.’
22 E Yaubada ibóbwara ikavava, Eberamo ikalave go, ituko.
23 E tuwo Eberamo itaoya ina natuna Isimaeli be koroto madabokidi neta ina vada goi sibíbina be nakae ina pakonayao boi ina mani goi igiimonedi ikabidi, e ame maliyalinayana goi madabokidi sakavaidi ikupoidi nakae Yaubada idige. 24 Ego Eberamo ana tala ana badabada naintinain (99) tutayana sakavaina ana kúpwana ibabane. 25 Natuna Isimaeli ana tala ana badabada tetin (13) tutayana sakavaina ana kúpwana ibabane. 26 Ame maliyalinayana goi Eberamo be natuna Isimaeli sakavaidi sikupoidi. 27 Koroto madabokidi ina vada goi, nakona ina vada goi sibíbina o nakona ogaoga goi paakonidi igimonedi, madabokidi nakae sakavaidi adi kúpwana sibabane.