1 Co cuachiar pɨpe oromombehu pẽu co yɨpɨsuive secoi vahe. Ahe orosendu, orosepia avei ore resa pɨpe ité iyavei oropoco ité sese. Ahe niha Tũpa Ñehe tecovesa resendar. 2 Co tecovesa oyemboyecua, orosepia iyavei ahe secocuer oromombehu. Ahe tecovesa apɨrẽhɨ oromombehu vahe pẽu. Ahe Vu rese secoi vahe oyemboyecua vahe oreu. 3 Oromombehu co orosepia vahe, orosendu vahe ñepei vahe nungar pe reco ãgua ore rese inungar ore oroico yande Ru Tũpa rese, Tahɨr Jesucristo rese avei. 4 Evocoiyase cũritei oroicuachía evocoi mbahe pẽu yande yembovɨharete catu ãgua.

5 Iyavei Jesucristo ore mbohe co ñehesa rese, ahe oromombehu pẽu: yande Ru Tũpa niha tesapesa secoi; ndipoi eté pɨ̃tumimbisa sese. 6 “Che aico tuprɨ Tũpa rese” yahese, yaicoño rumo angaipa pɨpe, ahe inungar pɨ̃tumimbi vahe, ahese yande remira tẽi iyavei ndayayapoi mbahe supi tuprɨ vahe. 7 Yaicose rumo tesapesa pɨpe inungar yande Ru Tũpa secoi tesapesa, evocoiyase yaico tuprɨra yandeyeupe. Iyavei suvɨ yande moatɨro opacatu angaipa sui.

8 Iyavei, “Ndarecoi angaipa che pɨha pɨpe” yahe tẽise, yande ae yayembopa ipɨpe. Evocoiyase mbahe supi eté vahe ndayarecoi yandeyese. 9 Acoi yamombehuse yande angaipagüer Tũpa upe, ahese ahe omboura oñeroisa yande angaipa rese yandeu iyavei omoatɨrora opacatu mbahe-mbahe tẽi yande sui. Esepia, ahe seco ɨ̃vi vahe. 10 Iyavei, “Che ndacheangaipai eté” yahe tuprɨ tẽise yaico, evocoiyase Tũpa semirañete ai vahe nungar yareco. Ipɨpe ndayaroyai iñehengagüer.