NINA PAPI
A HAGAI
Na Vuresi Makaliana Na Omea Ara Marea Tana Papi Iani
A Hagai na propete e gini turupatu na goko ara totu tana papi iani tana tagu kalina igira na Juda ara visu tania na totu tsinogo i Babilonia mara mai totu i Jerusalem. Ara totu oka nogo tana, mara tau moa vati logovisua na Vale Tabu. E totu toroutsa moa i tana. Mi kaira na propete a Hagai ma Sekaria ara ka turukaira a Serubabel na taovia na vera, ma Josua na Mane Tabu Loki kaira gaqira ida na togo kara ka ketsaligira na tinoni kara logo visutugua na Vale Tabu, ma kara gotosia visana niqira sasaga e tau goto i laona na lotu.
Maia Hagai e tsarivaganana iani, ti vaga igira na Juda kara vaisangagi dou na nauana na aqo iani, ma God sauba ke reingaogira tugua, me ke manali vanigira na omea aia e vekenogoa tana mangaqira na propete ni sau. Maia ke vangalaka vanigira tugua nina tinoni, ma kara totudou tana rago.
Na Omea Ara Totu Tana Papi Iani
Na ketsa agana na logo visutuguana na Vale Tabu 1:1-15
God e vekea laka sauba ke tobadou vanigira tugua 2:1-23
1
Na Taovia e Ketsaligira Kara Logo Visutugua na Vale Tabu
1 Tana rukanina ngalitupa kalina a Darius e taovia tsapakae tana Persia, tana kesanina dani i laona na ononina vula, na Taovia e goko vania a Hagai na propete. Ma na goko iani e kalekaira a Serubabel na taovia tagao tana Juda, aia na dalena a Sealtiel, ma Josua na Mane Tabu Loki, aia na dalena a Jehosadak.
2 Na Taovia Susuliga Sosongo e tsarivania a Hagai, “Na tinoni girani ara tsaria laka na tagu iani e tau na tagu dou vania na logo visutuguana na Vale Tabu.” 3 Ma na Taovia e mologoko vanigira tugua na tinoni tana mangana a Hagai na propete me tsaria: 4 “?Igamu niqu tinoni, egua vaga ti igamu kamu totu tana vale dou, ma niqu Vale Tabu inau e totu toroutsa lê? 5 ?Laka amu tau moa vati padagadovia na omea e laba vanigamu? 6 Igamu amu tsukagira danga sosongo na mutsa, mamu tau lelê tsurivia ke danga na lakana. Amu tamaniragoa na mutsa gana kamu gania, me tau moa tugua kamu gini masu. Amu tamaniragoa na uaeni gana na inu, me tau moa tugua ke ulavigamu. Amu tamaniragoa na polo, me tau moa tugua kamu gini tsatsavu me ke papara na konimui tana tagu na bisi. Maia na maneaqo e adiragoa na vovolina nina aqo me tau moa tugua ke gini mauri. 7 ?Laka amu tau moa padagadovia rongona gua ti ara gini laba vanigamu na omea girani? 8 Bâ, mi kalina ia, kamu ba kavigira na gai i kelaqira na tetena, ma kamu tuturiga na logo visutuguana na Vale Tabu; mi tana ti inau sauba kau gini mage tugua na ba totu i laona, migamu sauba kamu mai na samasama vaniaqu i tana, me ke gini tangiloki tugua na soaqu.
9 “Igamu amu amesia laka kamu tsurivia ke danga bâ na lakana tana nimui uta, mara tau lelê lakaga. Mi kalina amu angunimaigira i vera na lakana amu tsurivia, mara sui tsaku lê vaga moa ti au moloa na guguri ke lovosaginigira. ?Ma na rongona gua ti inau au nauvaganana vanigamu ia? Tana rongona nogo niqu Vale Tabu e totu toroutsa seko lê, migamu sui amu gini boe moa na logoana na valemui segeni. 10 Aia nogoria na rongona te e gini tau tumu na usa, me tau dato dou sa omea tsukatsuka. 11 Inau au moloa na uvirau i laona nimui kao popono, mi tana vungavunga, mi tana nimui uta na mutsa, ma nimui uta na uaeni, ma nimui gai na olive. Inau nogo au utusia na usa ke tumutsuna tana nimui omea tsukatsuka sui ara dato i laona na kao, mi koniqira na tinoni ma na omea tuavati, me pipi tana omea sui tavosi goto amu tovoa na tsukaana.”
Na Tinoni Ara Rongomangana na Taovia
12 Mi tana, ma Serubabel, ma Josua, migira na tinoni sui ara visumai tania na totu tsinogo i Babilonia, ara naua na omea na Taovia niqira God e tsarivanigira kara naua. Mara matagu loki sosongo, mara rongomangana a Hagai na propete, aia nina mane adigoko na Taovia. 13 Mi muri, ma Hagai e katevulagia nina goko na Taovia vanigira na tinoni: “Na Taovia e tsaria, ‘Inau nogo au totu kolugamu sailagi.’ ” 14 Ma na Taovia e molo papada vanigira na tinoni sui gana kara aqo tana logovisuana na Vale Tabu. Maia Serubabel, na taovia tagao tana Juda, ma Josua na Mane Tabu Loki, migira sui na tinoni ara visumai tania na totu tsinogo i Babilonia, ara tuturiga na logovisuana nina Vale Tabu na Taovia Susuliga Sosongo, ma niqira God, 15 tana rukapatu vatinina dani tana ononina vula, i laona na rukanina ngalitupa nina aqotagao a Darius na taovia tsapakae.