1 Nuka Weng sinik so ami sung uta kim goduyamuw. Kale Weng be suwayo katow kal aka alam kano Motabid sun tein tasa. Kale nuka nuluta alam weng kidilaw naduwe nulum kin tuw atam ausuduw. Kale afan nuka atam naduwe nulum teng uyo yak malelaw ausuduw kala. 2 Kale Weng alam kano Motabid sinik so biyámin be Natim Got so teinsano, kinim kei misuna nuluta atamsuduw kayo be bakayabuw. 3 Kale aka nulum kin atam naduwe nuluta weng kidilaw ausuduw kayo kano bakoyamuwo, kibil kiliwso am sung uyo kidi nadiwe maek num Natim Got so Yesus Kadais so gu makuw kei buduw tadiwo nikil dák mak dádum kala. 4 Kale num sauk kon belami goduyamuw, be watawo kaleyo bá, kiwso nuso nikil makuw atin idak abin teinum kala. Kaleyo ko.

5 Kale kamane weng bela Min alami dim kal kidi suduwo bakoyamuw kala. Kale Got be lánin, kata ami tem kaok be atin midilin katiw so bá ko. 6 Kale nuka bako naduw Got so gu makuw kei buduwo, kal bom naduwe midilin kukuw faku buduw namti, nuka ibakanin kinim kei buduw ade tatun weng uyo mak kidilongin danim dako buduw. 7 Kata nuka lánin dim buduw kaí, Got lánin taw kei naduwe gu makuw kei buduw Yesus ami kaim ata tabe num ban keimin uyo adikum ginga imkanba kala.

8 Kaleyo nuka bako naduw nuka ban keimin banimo, kalbuw kaí, nuka nulum ban keimin uyo kal keidongin danim dako naduw faltibuw, kale tatun weng uyo num aket tem so bongin banim. 9 Kaleyo nuka ban keimin uyo kuw misun dá Got bakadawokabuw, aka alam weng takadáyam kanayamokabi. Kalesa uyo afan leiw kidel abo num ban keimin lukuwá kudáyam nadane ginga imudá kidel keidokabuw kala. 10 Kaleyo nuka bako nuka ban keimin so keidongin danimo kalanokabuw namti, nuka be bako, Got be ibakamin kinimo, akbuk kala. kaleyo ami weng ayo num kidin tem so mak boma banim ko.