1 Kamini ago gira odena ma vegu no renari, yi vimari bi muyeyadi.✡ Col 2.13 2 Ye mina kono di vegu kana, ya ka makai resi aura di vava di ourefeidena amiye* aura di vava di ourefeidena amiye: Mina bi Satani. usi digamadi. Mina bi obe rededi vene ideri gua moimai redo vima mini. 3 Ari yokoiri ina vene di fogori, una tau vakoi uni roaita di udu dada, amesi roaita ma mokena di ura usi digamafa, bi amiye tau noibanu kana Sei di gubuyo iniye bi moigifa.

4 Idu ini uka mana tora una rofu dada, Sei yaku iriyeduka tora iniye redo. 5 Ye ago gira odenari ka muyeyafari, Keriso sa una moi vegu riyo. Ya bi buni tora gade dudu moi vegu riyo. 6 Ma ina tau vakoisa una moi dadi rae resi oma sanari, Iesu Keriso sa una moi ameinu reyo. 7 Ye meda baegediri, ina yaku ini buni tora gade di eru rededi gugura tora iniye Iesu Keriso ri, ini buni buni una rofu mina dudu oteimago. 8 Adina yi mokena vari gira aeyadiri, buni tora gade dudu ya moi vegu riyo. Mina bi diya ya kaya reyadi; bi beika Sei davana de nufa dudu, ya maro. 9 Mina bi diya reremama buni dudu, amiye yokoi yaku nivasena rego baebu. 10 Adina una bi beika Sei yaku moimai rei vau reyo mini. Iesu Keriso dudu, Sei yaku senagi dogo reyo vegu buni rofu una riyo, ye rebigifa dada.

11 Mina dada, ya tutubena idana vene evata riyadi, mokefa mirona ituari Jew vene† Jew vene: Greek agori mina bi “roaita nugaradi vene”. bi “roaita nugana de reyadi vene” kana ya raka niyadi. 12 Mirona ituari ya bi Keriso gaima iniye amegasa Israel vene rofu gagani bouna vene, uka ago di nitore reyo ago idana vene rofu kana. Ya bi uka mokena nufa de ma konori Sei sa amena de regamadi. 13 Idu ya kaere sena bi gaima iniye, Keriso di dava dudu, ya bi gua Iesu Keriso ri moi atafu riyo. 14 Adina mina vene remanu moi yokoi maka risi ini roaita dudu, ruda rena di tobo di okuna kota uratokuyo. Ye ina bi uka amuta una maro. 15 Ina yaku ini roaitari ago gira ini tabu ago nufa, mina uroro reyo, ye ina dudu mina vene remanu moi yokoi maka resi moi ruaka rigo dada; ye makai uka amuta maro.✡ Col 2.14 16 Kamini mina remanu satauro muyeyo dudu, Sei rofu roaita yokoi kana, ini uka yokoi maka riyaine, ye makai tuma vene kana, ini ruda rena moi gana rigo.✡ Col 1.20 17 Resi ya gaima iniye vene ma ya atafu amededi vene rofu baesi uka amuta ago buni niogau reyo.✡ Is 57.19 18 Adina una tau vakoi Vima yokoi maka dudu Baba rofu atafu degifa.

19 Mina dada gua ya bi idana vene ma okina vene de, idu ya bi Sei di vene di auta rena vene ma Sei di yava vene. 20 Ya bi yava kana, nifeidena vene ma Sei di ago niyadi vene fafau variyadi ma Iesu Keriso iniye bi ini moi gira redo fore. 21 Ye mina yava noibanu bi inasa moi yokoi maka riyo ma Varika amiye nivakena yava kikifa kana tora nidedi. 22 Ya ka inasa vakoi Sei di vima di amena yava kana akudedi.