TIMOTIA
Veia Pawluha Cayuk Anghngihnak
Pyenhlüma
Timotia vei Pawluha cayuk anghngihnak hin ani kuei lü ania kthaka dikia Timoti a khyang pum cun a mcuhmthehnak khawhah ngpüiki ni. Aktunga ta cuneinak ni. Timoti naw khuikhanak ja ktek khaihnak a hjawng üngpi evawnkelih pawh lü sajaa kba a mta cun pawh lü Cangcim phyüm ja Thankdaw akcang mtheinak cun kcüngei lü Jesuh Khritaw cun sitih lü a saksinak vaia kthape lü mcuhmthehnak ni.
Aktunga Timoti cun “anghmawng ja ia am kyaki ngcuhngkaihnak” naw cungaikia khyange jah kpyak lü am jah dawsak lü kyühei phyaki ti cun mcäi lü käh a ngpüi hü vaia mawng ni.
Ahin avan üng, cayukia kcünsak ja a bünaka kyakie a jumeinak, a mlungmsaünak, a mhläkphyanak, a cuneinak ja mkhuimkhanak üng a khameinak cun a ngtheinak vaia sümsaki ni.
Amawng ktawie
Pyenhlüma (1:1-2)
Mhlünmtainak ja Kthapetnak (1:3—2:13)
Ngthähnak ja mcäinak (2:14—4:5)
Pawluh amäta vecawh (4:6-18)
Akpäihnak (4:19-22)
1
1 Khritaw Jesuh am yümmatnak mi taka xünnak khyütam sang khaia tüih, Pamhnama hlüei Khritaw Jesuha ngsä Pawluh üngkhyüh ni,
2 1:2: Ngs 16:1Ka mhlänak ka ca Timotia veia ni: Pa Pamhnam ja mi Bawipa Khritaw Jesuha bäkhäknak, mpyeneinak ja dim’yenak nang üng ning pe se.
Mcäinak ja Jenak
3 Ka pupae naw ami na khüih khawia mäiha ngcimkia mät ja mät ksingnak am ka khüiha Pamhnama veia jenaka mthehki. Amhnüp amthan ka ktaiyünak üng ka ning süma phäh ani ka jenaki. 4 Na miktui ka süm üng, jekyainak am ka be vaia aktäa ka ning hmu hlüki. 5 1:5: Ngs 16:1Na nu Unick ja na pi Lawiha ami tak jumnaka ngkaw nang naw pi jumnak akcang na tak ka sümki. Nang naw pi acuna jumnak na taki tia ka ksingki. 6 Acunakyase, na khana ka kut ka mtai üng Pamhnam naw bänak a ning yet cän mphyünki lü na süm vaia ka ning mtheh be tüki ni. 7 Pamhnam naw a jah peta Ngmüimkhya naw am jah kyüheisak, acuna hnün üng Ngmüimkhya naw johit, mhläkphyanak ja mimät nängeinak am jah kbeki. 8 Acunakyase, käh ngkeei lü mi Bawipa phäh saksia, Khritawa phäh thawng üng ka khyuma phäh pi käh ngkeeia. Pamhnam naw ngjuktha a ning peta mäiha Thangkdawa phäh khuikhanak khameia. 9 Ani naw jah küikyan lü a khyang vaia a jah khü hin mi bilawhnak üng am kya lüpi a bäkhäknak ja a mkhühnak am ni. Akcün am a tünei ham üng Khritaw Jesuh üngkhyüh a bäkhäknak jah peki. 10 Mi Küikyan Bawi Khritaw Jesuh a lawnak üng ahin cun mimia veia ngdang law pängki ni. Ahih naw thihnaka johit cän mkhyüh lü anglät xünnak cun thangkdaw üngkhyüh mdanki ni.
11 1:11: 1Tim 2:7 Thangkdaw sang khai saja ja ngsäa Pamhnam naw na mcawn lü, 12 ahinea phäh khuikha ka khamki ni. Lüpi mkhühüpnak ka taki, isetiakyaküng, u ka umnaki ti cun ka ksingki. Kei üng a na ap hüt cun Khawmhnüp a pha law vei cäpa ani naw säm khawhki tia ka ksingki* 1:12: kei üng i a na ap; am ani üng kei naw ani üng i ka ap.. 13 Khritaw Jesuh üng mi yümmatnaka kyaki mhläkphyanak ja jumeinak üng ve lü na läklama vai ka ning mtheia khyübe kcang cän kcüng kyet bä. 14 Mimi üng vekia Ngmüimkhya Ngcima johita khyüh a ning apa akdawe cän sämei kyet bä.
15 Asah hne veki khyang avan, Phakilas ja Hamawkines naw pi na cehtaki xawi ni. 16 Bawipa mpyeneinak Onesiphoraha im kyawnga ve se, isetiakyaküng, ani naw akcün tä na jesaki ni. Thawng üng ka kyuma phäh pi am ngkeei lü, 17 Romah a pha law ja am a na hmuha küt üng kei na sui hüki ni. 18 Acuna Mhnüp üng Bawipa naw a bäkhäknak pe se! Keia phäha Epheta ihlawka biloki tia cän nami ksingkie ni.