Chru MATHIƠ 20

Mơnih Tồ-Apah Lăm Apùh Ño

1 “Lơgăr Lơngì mơhiơ̆ yơu sa aràng mơnih pô sàng dih, mư̆ng ờm rìng tơbiă nau apah mơnih tơma ngă bruă lăm apùh ño drơi. 2 Hơdơi tŭ đờm glai tơsă-tơsi sơ̆ng du mơnih ngă tồ-apah, la sa đơnie tơ sa hơrơi ngă bruă, nư̆n pơđăr buơl guñu tơma ngă bruă lăm apùh ño drơi. 3 Pơgăp tơlpăn jơ ờm, mơnih pô apùh tơbiă c̆ơ wơ̆, 'buh du mơnih pơkơ̆n lơwah bruă dò dơ̆ng soh lăm drà, 4 nư̆n đờm sơ̆ng buơl guñu: ‘Buơl guhã tơma ngă bruă bĕ lăm apùh ño kơu, kơu rơŭ c̆iŭ priă hơrơi ngă bruă iơŭ păl tơ buơl guhã.’ Buơl guñu nau mư. 5 Pơgăp sa-pluh dua jơ hơrơi dơ̆ng sơ̆ng klơu jơ diơŭ, mơnih pô apùh tơbiă nau c̆ơ wơ̆, sơ̆ng kŭng ngă yơu nư̆n rơi. 6 Pơgăp lơma jơ diơŭ, mơnih pô apùh nau tơbiă c̆ơ sơ̆ng 'buh du mơnih pơkơ̆n dò dơ̆ng soh tơ anih nư̆n. Mơnih pô apùh đờm sơ̆ng buơl guñu: ‘Kơđa hơgĕ buơl guhã dò dơ̆ng soh tơ anih ni luĭ hơrơi yơu nư̆n?’ 7 Buơl guñu đờm: ‘Kơyoa 'buh hũ aràng sơi apah buơl dơlhă ơu.’ Mơnih pô apùh đờm sơ̆ng buơl guñu: ‘Buơl guhã kŭng tơma ngă bruă bĕ lăm apùh ño kơu.’

8 Truh diơŭ, mơnih pô apùh đờm sơ̆ng mơnih c̆ơ-apăn bruă sàng drơi lài: ‘Iơu bĕ du mơnih ngă tồ-apah truh sơ̆ng c̆iŭ priă hơrơi ngă bruă tơ buơl guñu, tơma c̆ơmrừp mư̆ng mơnih tơma ngă hơdơi luĭ truh mơnih tơma ngă dơlhơu rơlau abih.’ 9 Du mơnih hũ apah ngă bruă tŭ lơma jơ diơŭ truh, yàu aràng lĕng hũ sa đơnie. 10 Tŭ du mơnih hũ apah c̆ơmrừp rơlau abih truh, buơl guñu sơnư̆ng rơŭ lĕng hũ lô rơlau, bloh yàu aràng kŭng mĭn lĕng hũ sa đơnie. 11 Tŭ đồ-mă priă hơrơi ngă bruă, buơl guñu đờm yuăm sơ̆ng mơnih pô sàng: 12 ‘Du mơnih tơma ngă bruă hơdơi luĭ ni mĭn ngă sa jơ soh, nư̆n bloh mơnih pô kŭng c̆iŭ priă tơ buơl guñu rĭng kàr sơ̆ng buơl dơlhă rơi, la du mơnih păl ngă bruă gleh-glăr luĭ hơrơi lăm pơđiă kluơĭ.’ 13 Bloh mơnih pô apùh đờm sơđồ sơ̆ng sa aràng lăm buơl guñu lài: ‘Ơ adơi-ai gơŭ, kơu 'buh ngă hơgĕ jơhà halài 'buh rĭng-tơpă sơ̆ng adơi-ai gơŭ ơu. 'Buh iơŭ adơi-ai gơŭ hũ đờm tơsă-tơsi sơ̆ng kơu la sa đơnie tơ sa hơrơi ngă bruă ơu? 14 Apăn bĕ pơ-ơnah priă hã bloh nau wơ̆; kơu khiăng c̆iŭ tơ mơnih tơma ngă hơdơi luĭ ni yơu hũ c̆iŭ tơ hã rơi. 15 Kơu 'buh hũ gơnuăr angui phơ̆n-bơna kơu tui hơtai kơu khiăng ơu? Halài hã 'buh kơu hơdiŭ sơrmah-siàm bloh oàn-anok?’ 16 Yơu nư̆n, mơnih hơdơi luĭ rơŭ jiơ̆ng dơlhơu, sơ̆ng mơnih dơlhơu rơŭ jiơ̆ng hơdơi luĭ.”

Amăng Klơu, Yàng Jêsu Đờm Dơlhơu Mư̆ng Pơnuaĭ Mơtai Sơ̆ng Hơdiŭ Wơ̆ Pô

(Mak 10:32-34; Luka 18:31-34)

17 Lăm tŭ đì nau tơ Jerusalem, Yàng Jêsu ba sa-pluh dua aràng mơnih tui-mơgru tơbiă krơi sơ̆ng Pô, sơ̆ng rò jơlàn, Pô đờm sơ̆ng buơl guñu: 18 “Ni, buơl gudrơi đì nau tơ plơi-prŏng Jerusalem, sơ̆ng Anà Mơnih rơŭ kơđòng mă jào lăm tơngàn du mơnih gơnuăr apăn-akŏ pơyă phơ̆n duh-dơlbăt sơ̆ng du mơnih gơnuăr-pơto pơnuaĭ adăt-adia. Buơl guñu rơŭ ngă nìn-glài pơmơtai Pô. 19 Buơl guñu rơŭ jào Pô tơ buơl làng agàh tô klau-pơtăt, glih pờng, sơ̆ng pơ̆ng Pô tơ kơyơu pơkăl; bloh hơdơi klơu hơrơi, Pô rơŭ hơdiŭ wơ̆.”

Dua Aràng Anà Lơkơi Sebede

20 Tŭ nư̆n, hũ ame du anà lơkơi Sebede, găm sơ̆ng dua aràng anà drơi truh c̆ĕ tơ-ù dơlbăt tơ anaŭ Yàng Jêsu, bloh yòng lơkơu Pô sa bruă. 21 Pô tơnia: “Hã khiăng yòng hơgĕ?” Ñu đờm lài: “Yòng brơi tơ dua aràng anà lơkơi dơlhă, sa aràng dò guh gah hơnuă, sa aràng dò guh gah ơñiau Pô, lăm Lơgăr Pô.” 22 Yàng Jêsu đờm: “Buơl guhã 'buh thơu pơnuaĭ drơi yòng. Buơl guhã hũ rơgơi mơñŭm c̆uàn pơđì-pơđoa gleh-glăr bloh Kơu kơjĕ mơñŭm ơu?” Buơl guñu đờm: “Buơl dơlhă rơgơi mơñŭm jiơ̆ng.” 23 Pô đờm sơ̆ng buơl guñu: “Biă buơl guhã rơŭ mơñŭm c̆uàn Kơu; bloh dò guh gah hơnuă halài gah ơñiau Kơu, nư̆n Kơu 'buh brơi jiơ̆ng. Anih nư̆n pioh tơ du mơnih bloh Ama Kơu hũ rơc̆ăng brơi.”

24 Mơhư̆ yơu nư̆n, sa-pluh aràng mơnih tui-mơgru dih anok hơtai sơ̆ng dua aràng adơi-ai nư̆n. 25 Bloh Yàng Jêsu iơu buơl guñu truh sơ̆ng đờm lài: “Buơl guhã thơu lài du pơtau buơl làng agàh angui gơnuăr-mơsak bloh apăn-akŏ buơl làng, dò du kwăng-prŏng nư̆n mă gơnuăr bloh pơkơŭ-pơđăr buơl làng. 26 Bloh tơkrah buơl guhã nư̆n 'buh iơŭ yơu nư̆n; tơrblơ̆ wơ̆, aràng sơi khiăng ngă prŏng lăm buơl guhã, nư̆n păl ngă hơlŭn-hơlă tơ buơl guhã. 27 Aràng sơi khiăng ngă akŏ lăm buơl guhã, nư̆n păl ngă hơlŭn-hơlă tơ buơl guhã. 28 Kŭng yơu nư̆n rơi, Anà Mơnih 'buh iơŭ truh tô hũ aràng duh bruă drơi, bloh tô duh bruă tơ aràng, sơ̆ng pơyă pơnuaĭ hơdiŭ drơi ngă phơ̆n tơrbuh tơ lô mơnih.”

Yàng Jêsu Pơsồ-Pơsaih Tơ Dua Aràng Mơnih Bồm Tơ Jerikô

29 Tŭ Yàng Jêsu sơ̆ng du mơnih tui-mơgru Pô tơbiă mư̆ng plơi-prŏng Jerikô, hũ sa tơrpuơl lô buơl làng nau tui Pô. 30 Dih, hũ dua aràng mơnih bồm dò guh tơ gah jơlàn, mơhư̆ đờm lài Yàng Jêsu nau găn nư̆n, buơl guñu pồ săp iơu driau prŏng: “Khoai Yàng, Anà pơtau Đabit, yòng anĭt-anăr buơl dơlhă!” 31 Tơrpuơl buơl mơnih lô puaĭ jrăm tơ buơl guñu, pơđăr dò kơđơ̆ng, bloh buơl guñu 'brŏ iơu driau prŏng rơlau wơ̆: “Khoai Yàng, Anà pơtau Đabit, yòng anĭt-anăr buơl dơlhă!” 32 Yàng Jêsu dò dơ̆ng wơ̆, iơu buơl guñu truh, sơ̆ng đờm: “Buơl guhã khiăng Kơu ngă hơgĕ tơ buơl guhã?” 33 Buơl guñu đờm: “Khoai Yàng, yòng pơh mơta tơ buơl dơlhă hũ sơrdah.” 34 Yàng Jêsu hũ hơtai anĭt-anăr, nư̆n rơwơ̆ tơ mơta buơl guñu. Tŭ nư̆n mư mơta buơl guñu hũ 'buh jiơ̆ng, sơ̆ng buơl guñu nau tui Pô.