1 Pakai nangin neihuhdoh tahjeh in kahin thangvah e. Nangin kagalmite kachunga nakithang at sahpon ahi. 2 O Pakai kapathen panpi ngaichan kahin kouvin nangman katahsa nakiledoh sah tai. 3 O Pakai nangin lhankhuh a kon in neihin puidoh in, thina kokhuh akalhah lutna dinga kon in jong neihoidoh sah e. 4 Nangho Pathen mite jousen Pakai thangvahna lasaovin! Amintheng chu choi an’un. 5 Ajeh chu alunghan hi phat chomcha bou ahijin, ami hepina vang hinkhoa ding ahi. Kaa na nikho ho jong kipanin ajui pai jitai. 6 Keimankaphatthei nikhon,” Imachan eisutang jouponte!” kanati. 7 O Pakai nami hepinahin muol bangin eisudettai. Keija kon a nakiheimang jiteng leh keima kading jou jipoi. 8 O Pakai nahenga kahung tao ahi. Nami hepina chu kathum in hitin kaseije, 9 “Keima kathi alhankhuh a kalhalut teng nangdinga ipi phachom dingham? Katahsa leivui in nang navah choi thei dingham? Nakitah na thu chu hichehin aphondoh thei ding ham? 10 Neihin ngaipeh in Pakai neihin khoto in. OPakai neihin kithopin” 11 Nangin kalung khamnahi kipah tah a laam nan neiheidoh pehtai. Nangin kalung khamna silpon neilahdoh pehin kipana silpon joh neisilpehtan ahi. 12 Hitia chu thipsan louva thangvahna la kasah jing theina dingin. O Pakai ka Pathen, keiman nangma tonsot'in thangvah jing tange.