1 Keiman nangma kangailui Pakai; Nangma hi kathahatna nahi. 2 Pakai hi kasongpi, kakulpi, chuleh eihuhhingpu ahin, ka Pathen hi kasongpi ahin eiveng tup jing ahi. Amahi kalumdal, eihuhhinga thahat chu ahin, chuleh kahoidohna munpi chu ahi. 3 Keiman thangvah dinga lomtah Pakai chu kakouvin, aman kamelmatea kon in eihuhdoh’in ahi. 4 Thina khoisatna chun eiumkimvel tan, manthahna twipi chun eichup tan ahi. 5 Damun lungkhamna chun eiumkimvelin, kalampi a thinan thang akam e. 6 Kalungkhamval phatnin Pakai chu kakouvin, ka Pathen komma chun panpi ngaichan kataovin Aman ahouin thenga kon in kataona asangin ahi. 7 Hijouchun leisetakilingin akihot e. Molbul ho jeng jong kihot e ajeh chu Pathen lunghang a ahi. 8 Pakai nahhom a meikhu ahung potdoh'in, meikou gimneitah akam a kon in ahungkou doh’in chuleh Mei-am al lenglung Ama-a kon in ahung koudoh’in ahi. 9 Aman vanho chu ahongdoh’in meilom thimletlut chu ahin chotphan ahung kumsuh in, 10 Pakai chu vantil pipui khat chunga atouvin, huipi chu alhavingin amangin alengin ahi. 11 Pakai chu muthim in ahung kitom in, meilom twi jingletlut pumin ahung lhungin ahi. 12 Pakai vah’in ahintom chu meilom satah’in ahinkhu khum in gelchang le mei-am chu gojuh’in ahung julhan ahi. 13 Pakai chu vanna kon in ahung kisen in hatchungnung ogin chu gelchang leh mei-am koulah achun akithongin ahi. 14 Aman athalpi ahin kapmin agalmiho chu athecheh’in, avah em lahlah chun amaho chu asuboi gamtan ahi. 15 O Pakai nangin nagalmi ho naphoa lunghangtah a nakisen chun twikhanglen ato geijin akikangin, leiset bulpi jouse jong akeuvin aumjie. 16 Aman vanna kon in akhut ahin lhangin eihin kaidoh’in, twipi thuh lah’a kon in jong eikaidoh’in ahi. 17 Aman kagalmi hattah tah ho a konin eihuh doh in, kasang a hatjo valeidougal hoa kon in eihuhdoh’in ahi. 18 Hahsatna kato pettah’in amahon eihin delkhum un ahinlah Pakaiyin eipanpin ahi. 19 Aman kahoidohna munnah eipuilut in eihuhdoh tai ajeh chu ama kipana kahi. 20 Pakaiyin thildih kaboljeh in kipaman eipen mona kaneilou jeh’in eikiledohsah tai. 21 Keiman Pakai lampi kajui in, thilse lam jon’in Pathen’a kon’in kakiheimang poi. 22 Keiman Pakai chonphatna lampi kajui jingin, adaan thupeh ho kapaidoh khapoi. 23 Pathen masangah nolnabei kahin, chonsetna kon’in kaki kangse jing e. 24 Pakaiyin thildih kaboljeh in Aman kipaman eipejin ahi. Aman themmonabei kahi amui. 25 Mikitah kom’ah nangmatah jong nakitah’in, monabei ho kom’ah monabei nahi. 26 Milungtheng ho kom’ah nalungtheng in ahinlah miphalouho kom’ah nakhohjin ahi. 27 Nangin mikineosah ho nahuhdohjin ahinla mikiletsah ho nasujumjin ahi. 28 Nangin thaomei neidetpeh’in, Pakai ka Pathen’in kamuthim jong neisalvah peh e. 29 Nangma hatna chun kagalmi hi neisuhchip peh’in ka Pathen toh kapankhom poupouleh itobang bang sang hijongleh kakal ngapchan ahi. 30 Pathen lampi chu nolnabei ahi! Pakai kitepna jouse alolhing jinge. Amahi ahuhdoh ding ngaicha jouse dinga lum le pho ahi. 31 Pakai tailou Pathen dang um’am? Pathen tailou songpi detdang um’am? 32 Hiche Pathen hin eihatdoh sah’in kalampi jong hoibitnapen ahisah ahi. 33 Aman molsang hahsa chung dunga kadindet theina din kakeng jong sakhi keng bang’in atah sah e. ✡ Habakkuk 3:19 34 Aman kakhut teni jong galsatna a manthei dingin agongin, kabanjang jong sum-eng thalpi loithei dingin ahatsah’in ahi. 35 Nangman nagaljona lum chu neipetan nabanjetnin neipanhun ahi. Neikithopina hin eithupi sah’in ahi. 36 Nang man kakeng phang tenin alhonal louna dingin kalampi neikehlet peh’in ahi. 37 Keiman kagalmite kadel’in kaman’in ahi; amahohi kajo kahsen katangpon ahi. 38 Amahohi ahung kithodohjou louna diuvin kasat lhun kakeng noijah akijammun ahi. 39 Nangin kagalsatna dingin thahatnan neivon in; Nangman kagalmite chu kakengphang noi a neikoipeh e. 40 Nangin angongchang’u neichotpha sah’in eivetda ho jouse chu kasumang sohtan ahi. 41 Amahon panpi athummun koiman ahung huhdoh pouve. Amahon Pakai akouvun ahinla Aman adonbut pon ahi. 42 Keiman amaho chu huilah a vutvai kithethang bangin tol ah kagoibong sel’in, bonlhoh lah’a kasunat gamatai. 43 Nangin eihouse jing ho chungah galjona neipetan ahi. Nangin namtin vaipi chungah vaihom’in neipansah tan ahi. Kanahet phahlou miho jeng jong kalhachan ahungpang tauvin ahi. 44 Kamin ajah jah’un kanoijah alutnun gamchommi hojeng jong ka-anga akisunem gamtauvin ahi. 45 Hansanna aneijou tapouvin kithing pumpum’in ka-ang ahinbel tauvin ahi. 46 Pakai ahing jinge, kasongpia apanjeh’in kathangvah e! Kasochatna ka Pathen chu loupi jing tahen! 47 Amahi eibolse ho lethuh jinga ka Pathen chu ahin, aman namtin vaipi hi eisuhnem peh’in kanoijah eikoipeh tai. 48 Chuleh kagalmitea kon in eihuhdoh’in nangman kagalmiten aphah joulouna munnah neikoijin, eidouva mi-engse hoa kon in neihoidohsah tan ahi. 49 Hichejeh hin O Pakai namtin vaipi lah’a nathangvah ingkate, namin vahchoinan la sangnge. ✡ Rm 15:9 50 Nangin leng a natun pa din goljona loupitah chu napetai; Chuleh nathaonupa David leh achilhahte chung nalungset longlou namusah e.