1 Ven keiman hiche ho jouse hi kamit tah in kamun chule kanakol tah in kajan tun keiman kahetai. 2 Ken nathil boldoh jouseu kahenai, kei sangin nangho naphajo deh pouve. 3 Hatchungnung pa koma keija ding seh seh a jang keija thu kaseija kachung chang thua keiman Pathen ama tah chu kaki nelpi nom ahi. 4 Nanghon vang, jou le nallin kahinkho nei suhset peh un, thempu banga nangho hi pannabei kithemput sah nahiuve. 5 Thipbeh chan umthim thei leuchun, hichu nangho dinga nachih napen uva nabolthei sun u chu hiding ahi. 6 Mo kachansah nau hi ngaijuvin, kanelna hohi phaten ngaijuvin. 7 Pathen chu jouva nahonbit diu ham? Ama jeh a chu lungtheng lou puma nanel diu ham? 8 Naum chan hou chu ama nadei sah nau jeh a langnei nadeiju ham? Pathen chung chang thu a nanghon ama dinga nanel peh diu ham? 9 Nathil bol hou ahin mudoh tenguleh ipi iti ding hinam? Bailam tah a mihem ho nangol bol banguva ama chu nangol bol theidiu ham? 10 Ahipoi, guhthima ama langa lang neina naneijuva ahileh ama toh naboi dingu ahi. 11 Aloupina hin nakichat sah louvu ham? Nakichat nau chun nasun khum louvu ham? 12 Nathil geldoh theikit nau jong vutvai bep bou ahin, ami huhdoh nau jong leibel tobanga keh bai bep ahi. 13 Tun umthim unlang chule kachangseh in nei dalha tauvin, thu seijing ting, chule thil hung soh jouse kimaito pi tange. 14 Henge, ken kahin kho chu kakhut in kilah ing ting, chule kalunggel mong mong sei tange. 15 Pathen in eitha maithei ahin, ahinlah kinepna ding dang kanei poi. Ken kachung thua ama kakinelpi ding ahi. 16 Ahinla hiche hi eihuhdoh dinga chu ahin keima Pathen neilou kahipoi. Achuti loule ama masanga kadin jou lou ding ahi. 17 Kasei ding jouse hi naichan ngaiju vin, kasei hi ngaijun. 18 Kachung chang thu kaki gontoh soh in, nolna bei kahi ti eiki photchen peh ding ahi. 19 Hicheng ho chunga hi kon eikinelpi thei ding ham? Kathep mona naphotchen theijuva ahileh thipbeh chan um ingting thi tange. 20 O Pathen! Thilni seh seh neiphal peh in, chutile nangma toh kimaito dinga kadin jou thei ding ahi. 21 Kachunga konin nakhut ham tah chu neilah doh peh in, chule ame umpina kichat umtah chun nei kichat sah tahih in. 22 Tun neihin kouvin keiman nadonbut inge, ahiloule ken thu seijing ting chule nei donbut in, 23 Ipi themmona kanei ham? Neiseipeh in, kachonsetna leh nang kadouna nei vetsah temin. 24 Ipi dinga keija konna naki heimang ham? Ibola namelma khat banga nei bol ham? 25 Huimut lonle thingna banga nei kichat sah kit ding ham? Changpol gosa nadel ding ham? 26 Nangin keidou nan themmona thilse tah tah najihdoh in, chule kakhangdon laiya kachonsetna jouse nahin sulange. 27 Nangin kakeng teni nakoi khomin chule kalam lhah jouse navelhi jinge, kakhonung jouse naholdoh in namelchih jinge. ✡ Job 33:11 28 Pannabei thingmotsa tobang apin anehchai sa to kabange.