1 Babiloniyshuch kurak, Nabukodonosor Utaáshchee kasiyaru, Sedekiyasaatssha, Josiyasaa wip, Utaáshcheem kurak ínarangiya. Jowakimaa wip kurakaam ínamaam nda zandku, Josiyasaaa wip Sedekiyasaatssha kurakaam ínarangiya. 2 Itaru, Sedekiyassha, misha istampantam, misha anshuchirisha tputs ichingarusin Apanllee kuk nuw kamanirangi anoo, pakchiyam mazinamaam nda zandaranganaya.

3-5 Ashiritaa, ndaturi nuwaa tumanarusin, nuw kamiran tputsish xiyrangina. Mishat, anpuritam Ijiptoshuch kurak wasundururpat Ijiptomand tsap káyarandsin, Irusarinap Utaáchchee tapachindamaam naataranganaya. Itaru, Kaldewshuchsha Irusarinshuchee iturpirangana anoo mazinarangusin, waanpeetam watsapun kanapuranganaya. Anumand kurak Sedekiyas tputsee Jukala sur, Seremiyasa wip, mishat apanllpanee Sofoniyasa, Maseyasa wip, kamachtarangiya. Jeremiyasap naapashinints. Anush kuseerus, Iyamari kundarareetsini kasimaam Apanllpa tsiyatancha, tángcha, tárangiya.

6 Tárangu, Sedekiyassha tiptsir nuwash kusarangsin, itaru Apanllsha nuwaa kamachtaku tárangiya. 7 Jeremiyasaa, shiy kurakaa Sedekiyasa tiptsir táncha, tárangu, nuwsha kurakaa Sedekiyasa tiptsir, Kurakareetsis, Apanll mang átcha, tángtsa. Paraw wasundurur shiyaa istamaam naatarangu, an yusur na Ijiptoptam kanapumawa. 8 Mishat, Kaldewshuchsha iyashchee pachamaam yusur kanapkattamsinaya. Kanapeechusin, tputsee pachayarusin, Irusarinaa sumaspasha tirooyarusin, kasachinllinaya. 9 Ashiri kurakaa, nuw Taarashipani shiyaa táchinllpa. Watstamaritand kanapeeranll tárinllpa, nda ashipa. Kaldewshuch urutanda siyaa pachamaam kuschinllinaya. 10 Wandtaati siy yuwaa Kaldewshuch pachamaam naanllina, anoo kasiykchus, itaru yuwsha ixambeerus kasarangis anshatanda tsapunshis kuskatssin, yaktareetsis sumaspa tirooyaru kasachu, Apanll átcha, tángtsa, nuw tárangina.

11 Ashiri Kaldewshuch sundar Irusarinaa kasayarusin naakchusin, an parawtanda wasundurur watsiritatanu ashchinllina. 12 Anpur, nuwsha yakat Irusarinaa shitungamaam zandarangina. Benjaminap watsapun wanasirsha napati, aturi, nuwaam tsapuni kaneeschi panarangana anoo napatama, tárangina. 13 Itaru, Irusarin watandpun wach shtandshini sur Benjaminnung kusaranguri, kapitansha Iriyas sur, Selemiyas wip, Hananiyas wachinllinu, nuwaa tuxarayaru, tárangiya. ¿Mayaamsha shiy iyashchee tamapingakush, Kaldewshuchee istamaam naatatsha? tárangiya. 14 Nuwsha, ¿Antaati nuw Kaldewshuchee istakee? Ngutariti yap nlluratarangi amb pangati aturi, naatina, tárangina. Táranguri, Selemiyassha nda mazinamaam zandku, nuwaa putayaru, kurakapsha machtarangiya.

15 Nuwaa kapung tsiyantarangusin, yasinpa pzkuyarusin, Jonatanash watandpun, yuwash tumanamaam wayarangana, anush tumanamaam kamachtaranganaya. 16 Ashiri nuwsha tumanshishish wantsush kachutamash taaruri, anush zapan zar taarangina.

17 Ashiri anush tumanshishish taaruri, zapish Sedekiyassha kurak tiptsiree; Jeremiyas yamashinints, tárangu, uwshtisin nuwaa yamayashinusin, kurakash pang' yushindarangusin, kuraksha, Tputs mazinarusinapa, átu, apinlliri nuwaa masharangiya; ¿Shiy Apanllee kuk nuwaa kamanimaam kamachtarangu an payurish? tárangu, nuwsha; Kurakaa Apanll siyaa ateeja, Uru Babiloniyashuch siyaa kurakaa, tayutaritchiya, tárangina.

18 Anshurtatam nuw kurakaa masharangina, Kurakaa, ¿may yutari shiyaa ashiranguri, nuwaa shiy tumanaksha? Mishat, ¿mayaaja tputsireetsish yutarit ashirangi? Mishat, ¿mayaa Irusarinshuchee yutarit ashirangi? ¿Antaati nuw mangutariti tumanshish taamaam zandkeezi? 19 Mishat kurakaa, ¿yuwshta siy tayaspatampaniris? ¿Antaati Babiloniyashuch kurak iyaa Utaáshcheetsini pachacheeja? atana, anoo kamaninganda. 20 Ashiriya, kurakaa, nuw shiyaa mashkuri, shiysha mazinangandama. Nuwaa nayaninda. Yusur Jonatanap watandpun tumaneerush, anshuri pcharishpa, nuw tárangina.

21 Ashiri kuraksha Sedekiyas, guardiyanungirisha watipuranll tumanamaam kamachtarangu; anootsirisha tumaneersin, pangaa tupaxanxampan kuskusin, anush pangaa yáyarusin, ichingaru zar nuwaam panataranaya. Ndatuma Irusarinash yakat pang kachingchu, uru nuwaam pangaa maritaranganaya. Ashirucha, nuwaa ndusha tumanshishish tumankusin, sundarunungirisha watipuranll taarangina.

Ashiriya, na kamaneena yuwaa Jeremiyasaa tumanarangana anootsi.