Apanll kamachtamarini
Yuwaa Apanll kamachtarangu anoo pakich kamanchintspa
¿Chakaja anoo yandarang?
Móysisarini anoo kiraka yandarangiya. Apanll wirkar Apanll kamachtarangu anoo kamankiya, Israelchich tputs sirútama táranganaya. Itaru, natsha ashpatam tputs, ¿Nitaati Móysisarineeja yandarang? atanaya. Tputs zapancha washunand yandarangana, átssincha. Atitaateesinaya, in zuramari Apanlliritcha kuku.
¿Chakaama yandarang?
Móysisarini Israelchicheem apanllpan yandarangiya. Apanll Leviychichee apanllpanee tputs zapan kamachtarangiya. Siy tputspa nuwaam shaniykus, piy shingtsa. Nish kirakash ichingaroo apinll natstayarus, nuwaa kamachtamareetsi yasangtsa, Apanll tárangiya.
¿Mayaamaja yandarang?
Leviychich tputs, ¿Tamaycheezich Apanlleem kis ipunamaama? ¿Tamayreezich maachtaa Apanlleem wanasir mbutchich? ¿Tamayreezich Apanlleem kis maacheetsi panaychich? atusin, itaru nishsha kirakash napkusin, natstayarusin yasaranganaya. Apanll wamachtash nish zapan taariya.
¿Mayaatseeja kamanik?
Yandam nda ashpari kandoozeem yandaranginiya. Ashpatam ipusaranguni, anurit yandam taariya. Tuchip ipusam kamankiya: Yutaritshishirineetsi tachingamaam Israelchicheem kamachtakiya (kapitoro 16). Mishat, Wanasirir taamaam piy shingtsa. Ashkachus, Apanll siyaa kis napchintsa, átcha (kapitoro 17, 23). Ashpartanaari yandaranguni, kirak yuw Apanll kamachtarangu anoo arangeem kamanichparee.
1. Kamachtamarini 1—7: Piy shingtsa nuwaam maachee mbutamaama, Apanll atiya.
2. Kamachtamarini 8—10: Apanllpaneem tputs ipusamaam piy shingtsa, átu Apanll kamachtarangiya.
3. Kamachtamarini 11—15: Nuwash pangi pshtumaam uru wanasir yareerus, nuwaa ungirtangtsa, tárangiya.
4. Kamachtamarini 16: Yuwash zar waritakchu anush siysa Israelchichis yutaritshishireetsis tachingamaam piy shingtsa, tárangiya.
5. Kamachtamarini 17—26: Wanasir taamaam piy shingtsa. Ashkachus, Apanll siyaa kis napchintsa, tárangiya.
6. Kamachtamarini 27: Kuwiz tsimbun m'cheeru maachee putayarus, anchich uru nuwaam minam panangandama, Apanll tárangiya Israelchicheetsi.
Israelchich tputs machish Orebash taarangsin, Apanll Móysisarinee kamachtamarineetsi zapan kamachtarangiya. Apanllpaneetstam tputsee wanasir ksutamaam kamachtarangiya. Mishat tputsee chinu Apanlleem pachamaam kamachtarangitamta. Mishat tputsee wanasiri taamaam kamachtarangitamta. Apanll zapan kamachtarangu, Móysissha ichingaroo yandarangiya. Ashiriya, nish kirakash anoo kamankiya.
Apanll kamachtarangu anu
16
Ashiriya, na kamanchima yuwaa Apanll, Nuwash pangi kizpur wanasirimshish msangarus pshturintspa, tárangu anootsi
1 Aaron wip tsimbun nda Apanllee kuk payurangusin, yuwash kamis Apanllush pang' kámanaru anush arangeem msangeersin pshturanganaya. Anumand Apanllsha Aaronaa wip waneerangu, tsiparangiya. 2 Apanllsha Móysisee; Shiysha zuwanlleetsish kamaningcha, Apanll shiyaa ateeja: Shiysha kamis kámanaru anush arangeem msangeerush pshturinllpa. Kajoninung washtangash ngutish kusinllpa. Papcha tsiparush. Watam nuw kajonimun washtangash psasush karuwkinawa. Zuwanllish Aaron msangaru pshtukchinaari, anush uru tsipachiya, átanda, tángcha. 3 Ashiri Aaron pshtumaam zandku, minam wakaraa pachachpa waanaatsi yutaritshishirinee yaramaama. Mishat, opeejaatstam pachachtampa sumasush muchimaama. Ashkachu, nuwsha yutaritshishirineetsi tachingchima. 4 Ndatuma pshturu, ichtaru kungushuma wanasir chumachpa. Sheeru, k'tunee mburshimashi kizpur wanasirimish kamartachpa. Kichpusheetssha wanasiritam mburshimash kichpuchpa. Turussha mburshimashtam turustachpa. Yuwaa apanllpaneem urkari kamachtarangi anuritam tuminungi tángcha. Apanll Móysisee tárangiya.
Ashiriya, na kamaneena yuwaa Apanll, Nuwash pangi kizpur wanasirimshish msangarus pshturintspa, tárangu anootsi.
Ashiriya, na kamanchintspa yuwaa Apanll Aaronaa tputseem yutaritshishirini mangoo yaramaam piy shingcha, tárangu anootsi
5 Apanll tárangitamta, Israelchichee tputsi yutaritshishee yaramaam Aaron chip upapchir tsimbun, mishat opeejaatstam minam yamachpa nuwaam panamaama. 6 Ichtaru, waamatama yutaritshirinee wakar wip pachayaru, muchichpa. Ashkachu, nuwsha maachiritaa yutaritshishirinee ichingaru mapiychina. 7 Anumunsha, Aaron chip tsimbun yamayaru, pangipi washitungashinung kusachpa 8 anush patumbichpa michitamaama. ¿Tamamaja chip sur shitungkach? átus yachayarus, yuw shitungkachu an watacha nuwaam Apanlleemi pachamaama. Itaru, minootssha chipoo waanitam minam kchit wayangcha arap upusap machinaama. 9 Ashiri yuw chip sur nuwaam, Apanlleemi shitungkachu anoo Aaronaa, Pchangi, tángcha. Pachakchu, nuwsha Israelchichee yutaritshishirini yarchima, Apanlli Móysisaa tárangiya. 10 Mishat, chip kchit nuwaam wayangcha. Sheeru, Aaronsha chipumun much uw wayayaru, tputsee yutaritshishirini ichinguroo kamaneeru, chipsha yutaritshishee arap upusap maachchiya. Ambari yutaritshish waani pastachiya. Ashkachu, nuwsha tputsee izuuru yarchima.
11 Ashiriya, Zuwanlleetsish Aaronaa kamaningcha. Yuwash zari yutaritshishee tachingamaam tatsamkachu anush, waanaatstamaa, misha wipaatstam yutaritshishirini yarchinllinpa, átcha Apanlli, tángcha. Chinuzee wakaraa pachayaru, 12 Apanllip wasuma naayaru, mangawash watsam tatsitachpa. Sheeru, kzammashee uwish tsimbunuri putayaru, kamis kámanaru anush arangeem pshtuchpa. 13 Ashiri nuwsha anoo pangchima, yuwaa mangawash pshtaru watsamash kzammashee nuwaam muchchu anootsi. An kzammash pzeezakchu, kajonee washtangash yambutachiya. Wantsush nuw kuki kamachtamari taaru anoo nda mbizamaama. Amb ashkachu, ndusha tsipachiya, átcha Apanlli shiyaatsi, Aaronaa tángcha. 14 Anumunsha, shitungkachu, wakar ursir yáyaru, waptam kamis kámanaru anshutam arangeem kanapkachu, wakar ursir pakich uwish patateeru, anpa kajonee washtangash mbutsanungich ixuwtata ashichpa. Anumunsha, yusur uwish pakich kurasee patateeru, anpa kajonmun washtangash tasasaru tsimbun matayaru ixuwat, ixuwat ashichpa, átcha Apanlli, tángcha. 15-16 Ashiri anumunsha, Aaron shitungeeru, nuwaam chipoo pachachpa. Chipsha tsipakchu, nuwsha ichinguroo tputs yutaritshishirinee mapiychina.
Itaru, wand nuwaam pangi yaramaam pishtakiya. Yuwaa Israelchich yutaritshishirini nuwaa pangi taminllurtarangu anoo yaramaam na kamachtachima. Chipootssha ursir pakich mangawash yáyaru, yusur kamis iwaz kámanaru anush nuwash pangi pshtuchpa. Anush wantsush wakar ursir washtangashimun ixuwtarangu sheertam ixuwtachpa chipoo ursiri, tángcha. Ashkachu, nuwsha pangi kámanaru anush izuuru wanasir tachingamsha taachiya. Shitungeeru, uwsha nuwaa pangi ichinguru wanasir yaramaam kuraspat ixuwtachpa, átcha, tángcha, watam anumand tputs urutamari tayutaritkanawa.
17 Ndatuma Aaron nuwash pangi shitungkaru, tputs minamtiyam wanasirimshish pshturusinapa. Aaronamari pshtuyaru, nuw ichingaroo yutaritshishirinee tachingchima, maachiritaatstam, Israelchicheetstamta. 18 Ashiriya, uwsha shitungkachu, wishchip yuwash chinuzee nuwaam mbutkana anshutam yarchitampa. Tachingamaamsha pakich wakaraa ursir yáyaru, chippat ursir kajonamun ixuwtachpa. Apanlleem mbutamaam wayarana wakaramun wits anumun kuraspat patateeru, kandanta, kandanta, ashichpa, tángcha 19 Anumunsha, uwpat kurasee patateeru, kajonee sietimari ixuwtachpa. Amb ashkachu, nuwashsha pangi yutaritshish pastachiya. Yuwamand Israelchich yutaritshishirini pangeetsi itsachtarangana anoo nuwsha izuuru mapiychima, átcha Apanlli shiyaatsi, tángcha.
20 Ashiri Aaron nuwash pangi kizpur wanasirimshish nuwash sumi kajonee yaramaam yuwaparamchu, Chipoo kchita yátani táchiya. 21 Aaron uw chipumun much patatachpa. Sheeru, tputsee yutaritshishee ichinguru kamanichpa. Yuwaatstam ichinguru mantsir ashirangana anoo kamanichpa. Ashkachu an, yutaritshish ichinguru chipushsha wanuts pshtukiya. Ashiri tputsee minam kamachtachpa: Chipoo Asalelap arap yap tputs nduni amb machichpa, tángcha. 22 Amb yutaritshishirini arap kapeetchiya mbizamaamarita. Ashkachu, chipsha waanasha tsipachiya.
23 Ashiriya, Aaronsha ichinguru iwapayaru, nuwash pangi yusur pshtuyaru, watuniree mburshimashee tusheeru, anshuri tayapeeru kasachiya. 24-25 Amb sheeru, anshurtatam chumayaru, yusursha kamartayaru, shitungeeru, minootssha opeejaa karupana pachayaru, waanaatsi yutaritshishirinee yaramaam muchchiya, tputseetstam yutaritshishirini yaramaama. Ashiri opeejaa karupan tatsamooru muchchiya, washunand wayungunpa ísiru, mang Apanll Móysisee tárangiya. 26 Mishat, yuw tputs chipoo arap machtarangu an ndatuma pangusip kanapuru, ichtaru watuniree yusheeru, káchachiya. Waanasha kungush chumachtampa. Amb sheeru, chumayaru, wanasir pangusush pshtuchiya, mang Apanll tárangiya.
27 Mishat, tárangitamta; Ashiri yuw wakaraa, chipoo Aaron pacharangu, ursiri yarangu yutaritshishee tachingamaama anoo, waanaatsi, taspatari, mangpatari, washippatari, chikpatari ichingaru arap yáteeru, tputsee taárash piyam wishchip arangeem izuuru muchichpa. 28 Yuw tputs muchkachu ansha nduma pangusip kanapuru, watuniree káchachtampa, misha waanaatsi wanuts kungupat kupachtampa.
29 Ashiriya, ichinguru masach siysa anuri tuminungtsa. Tsup sietish, zar diesash ambari ashkusin taachinllinaya. Anushsha zar ktungusinapa; misha tarawaztarusinapa. Tputs tunar siyapa taakana anoo, Siysa ambitam shingtamtsa, táchpa. 30 Anush zar nuwsha siyaa yutaritshishiris tachingchima. Anumunarisha, siy yutaritshishiris ichingarus tachingam taatssa. Ashirucha, ¿tamareeja anush zar katungkuch tarawaztachich? siyaa atashina. 31 An watacha nuw kuki Apanlli kamachtamari siyaam kizpur wanasirimshi, anush zar nda tarawaztamaam, misha nda katungamaama. 32 Ashiriya, Aaronsha waanaatsi wip ipusachpa apanllpaneem urkari. Uwsha waparish zamuchiya. Nuwaatssha kuki tuminkachu, nuwsha siyaa yutaritshishireetsis tachingchina, mang Apanll tárangiya. 33 Ashiri kaneesichsha apanllpan kurakaam zuramaptari kinayaru, uwsha k'tunee k'tuntayaru, nuwash pangi wanasirimshish pshtuchpa. Ashkachu, nuwsha apanllpanee urkar yutaritshishirinee mapiychina, ichinguroo tputs yutaritshishirini tachingchina, mang Apanll tárangiya. 34 An watacha Apanll chínash wanasirimshi siyaama. Ichinguru masach, yuwash zar tatsamkachu anush, nuw kamachtarangi anoo ichinguru tuminkachus, nuwsha siyaa yutaritshishiris izuuru tachingchina, Apanll Taarashipan mang Móysisee tárangiya. Ashiriya mang, Israelchichsha anoo mazinayarusin, Móysisee kuk ichingurusin payuranganaya.
Ashiri na kamaneena yuwaa Apanll yutaritshishireetsis mapiymaam, Chinuzee muchingcha, Aaronaa tárangu anootsi.