1 Gun-guna janguny Wangarr gu-gurrmurra wengga. 2 A-yinanga, “Ngaypa Bunggawa ana-gorrburrwa, Mu-ngoyurra Ng-guyinda. Ana-goyburrpa brichina (prisoner) nyiburr-ni gu-rrawa Yijipt (Egypt), ngaypa arr-rraykaja arr-menga, arr-gurrmurra. 3 Gala barra an-nerranga jin-nerranga wangarr jin-guyinda wangarr an-guyinda ny-marrngoypiya nula ny-yorkiya.

4 Gala barra jin-mawunga an-mawunga ny-jarlapa, ny-marrngoypiya nula. Aburr-werranga burdacha burr-guta waykin aburr-boya, rrapa minyjak yerrcha gu-jel aburr-boya rrapa gu-bugula aburr-boya 5 gala barra ny-menama n-da burrwa, jama ny-ji burrwa. Ngika. Ngardawa gu-galiya yerrcha aburr-werranga aburr-gata aburr-werra apula aburr-nirra, birripa aburr-baparru ngaypa nguburr-burnda ngu-nirra. 6 Rrapa aburr-werranga aburr-nga aburr-gata aburr-jaranga jal aburr-nirra apula, minypa gun-ngaypa wengga gubu-borrwuja apula aburr-nirra, birripa jarra ngaypa nguburr-malapurda ngu-nirra.

7 Ngaypa ana-gorrburrwa Wangarr, ng-gunaga Ngu-ninyarrapa Ngu-workiya. Gala barra ngu-welangga borijipa nguna-ma. Wurra ny-yerranga minyja ngu-welangga borijipa ny-yenggapa, ngaypa gala ngu-yinmiya ngu-mola ngu-ni nggula. Wurra gu-gurda ngacha minypa werra nyi-negiyana.

8 Wolawola rrengarrenga gun-ngardapa nyiburr-ngeka barra nyiburr-workiya, ngunabu-borrwa barra. 9 Minypa jama nyiburr-ji barra nyiburr-workiya rrengarrenga abirri-jirrapa abirri-jirrapa abirri-jirrapa, 10 lika gun-ngardapa gun-ngaypa nyiburr-ngeka barra ngunabu-borrwa barra ngaypa Wangarr Bunggawa ana-gorrburrwa. Gala barra jama nyiburr-ji – nginyipa, rrapa aburr-nginyipa walkurpa yerrcha, rrapa aburr-nginyipa aburr-mujama, jin-nginyipa yarraman burr-guta. An-nerra marlaga gun-nginyipa rrawa a-nirra gala barra jama nyiburr-ji. 11 Ngardawa rrengarrenga abirri-jirrapa abirri-jirrapa abirri-jirrapa wupa ngu-jarlapuna nguparr, jel, bugula burr-guta. Rrapa nyiburr-guwaywuya arr-jarlapuna ngaypa Wangarr. Lika rrengarrenga gun-ngardapa ngu-ngekarra ngu-ni, rrapa ngu-wena ana-goyburrpa barra nyiburr-yinarda barra nyiburr-ngeka nyiburr-workiya rrapa ngunabu-borrwa barra nyiburr-ni.

12 Nyanyapa nggu mampa nggu yagurrma burrinyjula ni, gu-nginyipa gu-rrawa barra ny-mola nyi-ni ny-bamba jemberr gun-jaranga. Ngaypa ngu-weya ana-gorrburrwa ngu-nirra, ngaypa ng-gunaga Wangarr Ngu-ninyarrapa Ngu-workiya rrapa rrawa ng-gurrmurra ana-gorrburrwa.

13 Gala barra an-nerranga ny-bu a-juwa.

14 Gala barra an-nerranga jin-nika ny-ma marrambay. Rrapa meyelk, nginyipa gala barra ji-werranga an-nika n-dima.

15 Gala barra mun-ngumurda ny-ma.

16 Gala barra an-nginyipa an-borrmunga bima ny-nyurrja.

17 Gala barra an-nginyipa an-borrmunga mu-werrmbarra nyi-na. Jin-nigipa jin-gumarrbipa rrapa jin-mujama rrapa bulugi (bullock) rrapa yarrman gala barra mu-werrmbarra nyi-na. Jin-nigipa. An-nigipa an-mujama bawa. An-nigipa. Gun-nigipa bala, gerra burr-guta bawa. Gun-nigipa.”

Gu-yinagata gu-yurra janguny Wangarr gu-gurrmurra wengga.