Luda yã takada kↄ̃n Bokobaru yão ROMUDEENƆ 9

Luda Isarailinↄ sɛna a gbɛ̃nↄ ũ

1 Mɛ́ɛ yãpuraa oo Kirisi guumɛ, mɛ́ɛ ɛgɛɛ toro. Ma laasuu è wezi kↄ̃n Luda Ninio se. 2 Ma pↄsiaa kɛ̀ bíta, ma nↄ̀sɛ ègↄ̃ yakana gurↄ píngi. 3 Mɛ́ fↄ̃ mà wɛ́ɛ kɛ Ludaa à ma kɛ̃ Kirisia, à láari kɛma ma Isaraili daanↄ gɛ̃ɛ ũ. 4 Aↄ̃mↄnnↄn Luda ń sɛ́ a nɛ́nↄ ũ, à a gakui ↄ̀dↄańnɛ, à bà kúńyo, à a doka kpàḿma, à dↄnzikɛna dàńnɛ, à lɛ́ gbɛ̃̀ńnɛ. 5 Aↄ̃ↄ dɛ Luda gbɛ̃ káakunↄ boriinↄ ũ, bensↄ̃ aↄ̃ borii guun Kirisi kɛ̀ dɛ gbɛ̃ píngilaa bↄ̀n gbɛ̃ntee ũ. Àmbe Luda kɛ̀ dɛ wàgↄ̃ à sáabu kpaa gurↄ píngi ũ. Aami.

6 Èe kɛ yã kɛ̀ Ludaa ò lɛ̀ɛ pãnlo, zaakɛ Isaraili gbɛ̃ píngin Isaraili yãpuraa ũro. 7 Èe kɛ Ibraĩ boriinↄ píngi bé Ibraĩ pì nɛ́nↄ ũ Luda kiiaro, zaakɛ Ludaa bè Ibraĩnɛ, Isaaku boriinↄn weégae beńnɛ à boriinↄ ũ. 8 Lɛmɛ èe kɛ nɛ́ kɛ̀ à ń í pↄyezionↄn Luda nɛ́nↄ ũro, nɛ́ kɛ̀ à ń í Luda lɛ́gbɛ̃na musunↄn borii pìnↄ ũ. 9 Zaakɛ Luda lɛ́ gbɛ̃̀ à bè: Mɛ́ ɛara mà mↄ́ zii mↄndaa'i, Sara é nɛ́ i gↄ̃gbɛ̃ ũ. 10-12 Èe kɛ beee adoro. Luda è gbɛ̃nↄ sɛ́ lán èe wɛtɛɛ nàmɛ, èe kɛ aↄ̃ yãkɛna yãnzinlo, kɛ̀ à ń sísi yãnzimɛ. Lɛmɛ kɛ̀ Rɛbɛka sìkanↄ nↄ̀ sì kↄ̃n wa dezi Isaakuo, ai àgↄ̃ gá ń i, ai aↄ̃gↄ̃ gá à maaa ke à zaaa kɛ, Luda bè Rɛbɛkanɛ, à kɛ̀ bↄ̀ káaku égↄ̃ nɛ́ ũ gbɛ̃ zãanɛ. 13 Lán wà kɛ̃̀ Luda yãn nà wà bè:

Má ye Yakubuzi,

Isau sↄ̃, ma gizi.

14 Wé be diamɛ? Yã zaaa kú Luda kiian yↄ́? Lɛnlo fá! 15 Zaakɛ à bè Musanɛ,

gbɛ̃ kɛ̀ á yezi à sùu kɛon é kɛo,

bensↄ̃ gbɛ̃ kɛ̀ á yezi à wɛ̃nda dↄ̃nɛn é dↄ̃nɛ.

16 Beee yãnzi Luda gbɛ̃nↄ sɛna e bↄ gbɛ̃nteenↄ pↄyezi gãzĩro ke aↄ̃ aĩakɛnan, à bↄ̀ Luda sùu guumɛ. 17 Zaakɛ Ludaa ò Fili'aunanɛ a yãn à bè: Ma n ka kpatan lɛ mà a gbãaa ↄdↄa gbɛ̃nↄnɛ n musumɛ, wà ma tↄ́ kpá anduna guu píngi. 18 Lɛmɛ gbɛ̃ kɛ̀ à yezi à sùu kɛon è kɛo lɛ, bensↄ̃ gbɛ̃ kɛ̀ à yezi à à swã gbãgbãn è gbãgbã.

Luda pↄfɛ̃ kↄ̃n à sùuo

19 A gbɛ̃ke é ma la, bↄ́yãnzi Ludaa e gbɛ̃nↄ taari eezi dↄↄ? Dé bé eé fↄ̃ à gí Luda pↄyezizi? 20 N gbɛ̃ntee ina, dén n ũ gbasa ǹ yã sí Ludalaa? Oroo é a bòri la à be: Bↄ́yãnzi n ma bo lán kɛ̀ bàziↄ́? 21 Orobori zɛ́ vĩ à oro swãde kↄ̃n à swãsaio bo kↄ̃n gũ̀ dↄ̃nkↄ̃ kɛ̀ à tòtooroo? 22 Tó Ludaa yezi à a pↄfɛ̃ ↄdↄańnɛ lɛ aↄ̃ↄ a gbãaa dↄ̃, ben à mɛna bíta kɛ̀ kↄ̃n gbɛ̃ kɛ̀ aↄ̃ↄ dɛ à pↄfɛ̃ pitaḿma à ń kaatɛnↄ sↄ̃ nɛ́! 23 Tó à beee pì kɛ̀, lɛ wamↄwa kɛ̀ à sùu kɛ̀waonↄ a gakui bíta dↄ̃ sↄ̃ nɛ́, wamↄwa kɛ̀ à gĩakɛ à wa kɛkɛ lɛ wà gɛ̃ a gakui pì guunↄ! 24 Gbɛ̃ kɛ̀ Luda ń sísi à ń sɛ́ pìnↄn wa ũ. Èe kɛ Yudanↄmɛ ńtɛ̃ɛro, kↄ̃n bori pãndenↄomɛ se. 25 Lán Ludaa bè annabi Osea takadan nà

Borii kɛ̀ aↄ̃ↄ dɛ ma gbɛ̃nↄ ũroonↄn mɛ́ beńnɛ ma gbɛ̃nↄ.

Borii kɛ̀ má yeńziroonↄn mɛ́gↄ̃ yeńzi.

26 Gura kɛ̀ Luda bèńnɛ aↄ̃ↄ dɛ a gbɛ̃nↄ ũro,

gwen weé ń sísi Luda Wɛ̃̀ndide pì nɛ́nↄ.

27 Isaya wii lɛ̀ Isarailinↄ yã musu à bè:

Baa tó Isarailinↄↄ pari

lán ísialɛ bùsu'ãatɛ̃ bà,

aↄ̃ kpaaa kɛ̀ gↄ̃̀ bé eé bↄ.

28 Zaakɛ Dii é yã kɛ̀ à ò kɛ anduna guu,

bensↄ̃ eé à mì dɛ zɛna saimɛ.

29 Lán Isaya gĩakɛ à bè nà:

Tó Dii Zĩ̀kpɛdee e wa bori kenↄ tó yãro,

lɛ wa gↄ̃ lán Sↄdↄmudeenↄ bà,

lɛ wa kɛ lán Gↄmↄradeenↄ bà.

Isarailinↄ gina Kirisi baaruzi

30 Wé be diamɛ saa? Bori pãndenↄ e wɛtɛ Luda tó yã bↄńyo nnaro, ben à tò à bↄ̀ńyo nna. À tò yã bↄ̀ńyo nna a náanɛ kɛ̀ aↄ̃ↄ kɛ̀ yãnzi. 31 Isarailinↄ sↄ̃ↄ e wɛtɛɛ Luda tó yã bↄńyo nna doka musu, ben èe bↄńyo nnaro. 32 Bↄ́yãnzii? Kɛ̀ aↄ̃ↄ yezi Luda tó yã bↄńyo nna ń yãkɛnaa yãnzimɛ, èe kɛ à náanɛkɛna yãnzinlo. Aↄ̃ gɛ̃̀n sì gbɛ̀ kɛ̀ è ń pãɛa 33 lán wà kɛ̃̀ Luda yãn nà:

Ǹ gwa, mɛ́ɛ gbɛ̀ kɛ̀ è tó wà gɛ̃̀n sí diɛ Zayↄn,

gbɛ̀si kɛ̀ è tó wà fuu.

Wí é gbɛ̃ kɛ̀ à à náanɛ kɛ̀ kũro.