1 Dii, ǹton ma toto kↄ̃n pↄfɛ̃oro,

ǹton ma swã sↄ̃kãmɛ kↄ̃n pɛ̃tɛ̃oro.

2 N kànↄ ma papa

n ↄ tↄ̃̀ma.

3 Ma mɛ̀ gbãaa yã̀a n pɛ̃tɛ̃ yãnzi,

ma wá aafiaro ma durun yãnzi.

4 Ma taarinↄ dàmala,

aↄ̃ tↄ̃̀ma lán aso tìisi bà.

5 Ma bↄ̀nↄ fↄ̀,

aↄ̃ yai kũ̀ ma yↄ̃nkↄkɛɛ yãnzi.

6 Má kuna, ma gↄ̃ zↄ̀lↄlↄ,

mɛɛ̀gↄ̃ tɛ́ uuo sisina gurↄ píngi.

7 Ma kpɛɛwa e wii maamaa,

ma mɛ̀ gbãaa vĩro.

8 Má gbãaa vĩro, ma mɛ̀ kɛ̀ búgubugu,

mɛ́ɛ wii lɛɛ ma pↄyakana yãnzi.

9 Dii, ń pↄ́ kɛ̀ má yezi dↄ̃ píngi,

nɛɛ̀ ma m̀bna ma sãnsãn.

10 Ma kù e vĩi gbì gbì, ma gbãaa yã̀a,

ma uu e tɛ́ kɛɛ dↄro.

11 Ma gbɛ̃nnanↄ kↄ̃n ma gbɛ̃nↄ è gbɛ̃ɛmɛ,

ma danɛnↄ è bàa lɛ́mɛ ma bↄ̀nↄ yãnzi.

12 Gbɛ̃ kɛ̀ aↄ̃ↄ wɛtɛ wà ma dɛnↄ è bà kpákpamɛ,

ma wɛdɛrinↄ è yã zaaa kpakↄ̃sↄ̃mazi,

aↄ̃ègↄ̃ mↄnafikiyã wàari paa kↄ̃o gurↄ píngi.

13 Ma gↄ̃ lán swãdoo bà, mɛɛ̀ yã maro,

lán gbɛ̃ kɛ̀ à nɛ́nɛ nàɛ bà, mɛɛ̀ lɛ́ è wɛ̃kↄ̃aro.

14 Má dɛ lán gbɛ̃ kɛ̀ è yã maroo bà,

mɛɛ̀ weńlaro.

15 Dii, ḿbe ma wɛ́ɛ dↄnzi,

nɛ́ ma yã ma, Dii ma Luda.

16 Ma bè, ǹton tó aↄ̃ yↄ̃̀gↄ̃ kɛmaro,

ǹton tó aↄ̃ ĩa dã ma satana yãnziro.

17 Ma ka lɛɛna,

mɛɛ̀gↄ̃ kú yã'ↄ̃amma guumɛ.

18 Mɛ́ ma yã zaaanↄ onnɛ sa,

zaakɛ ma durun yãnzin ma pↄↄ yakanazi.

19 Ma ibɛɛ pãsĩnↄↄ lɛ́ vĩro,

gbɛ̃ kɛ̀ aↄ̃ zàmagu pãpãanↄↄ pari.

20 Aↄ̃è à maaa fĩa bomɛ kↄ̃n à zaaao,

yã maaan má tɛ́zi, ben aↄ̃ íbɛtɛ kpàmao.

21 Dii, ǹton ma zĩnnaro,

ma Luda, ǹtongↄ̃ kúmao zã̀ro.

22 Ǹ mↄ́ ǹ dↄmalɛ kpakpaa,

ma Dii, ma mìsiri.