8
Ɔ̃ndↄ̃ e wa sisii
1 Ɔ̃ndↄ̃ↄ bé èe lɛ́ zuuwaziroo?
Wɛ́ɛzɛ̃ɛ bé èe wa sisiiroo?
2 À kú sĩ̀sĩ musu zɛ́ gɛɛzi,
à zɛna zɛ́ↄ̃nkpakↄ̃a.
3 À kú wɛ́tɛ bĩilɛ saɛ,
à kòto dↄ bĩilɛ pì gbànↄ kiia.
4 Gbɛ̃nↄ, ámbe mɛ́ɛ a sisii,
gbɛ̃nteenↄ, mɛ́ɛ lɛ́ zuuazi.
5 Nigãzĩdeenↄ, à làakari wɛtɛ àgↄ̃ vĩ,
yↄ̃nkↄↄnↄ, à tó àgↄ̃ laasuu vĩ.
6 À swã kpá, zaakɛ yã tìisin mɛ́ oare,
yã dↄ̀rↄdee bé eé bↄ ma lɛ́n.
7 Zaakɛ ma lɛ́ è yãpuraa o,
ma za à zaaan.
8 Yã kɛ̀ aↄ̃ↄ kú ma lɛ́nnↄↄ maa,
aↄ̃ kee mↄnafiki ke sãsãna vĩro.
9 À súusu asãnsideenↄnɛ píngi,
à zɛ́ vĩ gbɛ̃ kɛ̀ aↄ̃ↄ dↄ̃na vĩinↄnɛ.
10 À ma lɛ́damma sɛ́ dɛ kondogila,
à dↄ̃na sɛ́ dɛ vura maaala.
11 Zaakɛ ↄ̃ndↄ̃ↄ bɛ̀ɛ vĩ dɛ gbɛ̀bainↄla,
pↄ́ke nii kúmma kɛ̀ kà à ũro.
12 Mamↄma ↄ̃ndↄ̃, má làakari vĩ,
má yãkɛna a zɛ́a dↄ̃na vĩ.
13 Vĩakɛna Diinɛn zana à zaaan ũ.
Ma za zĩndasɛna lezĩn kↄ̃n ĩadãnao
kↄ̃n kuuna zaaao kↄ̃n yãlɛkpɛɛ'onao.
14 Lɛ́damma kↄ̃n faakɛɛo nɛ́ ma pↄ́mɛ,
ma kiian gbãaa è bↄn kↄ̃n asãnsikɛɛo.
15 Kínanↄ è kpata ble ma gãzĩmɛ,
kpatablerinↄ è yãzɛdee diɛ kↄ̃n ma gbãaaomɛ.
16 Gbãadeenↄ è iko kɛ ma gãzĩmɛ
kↄ̃n anduna kpatadeenↄ ń píngi.
17 Má ye gbɛ̃ kɛ̀ aↄ̃ↄ yemaziinↄzi,
gbɛ̃ kɛ̀ aↄ̃è ma wɛtɛnↄ bé wè ma e.
18 Auziki kↄ̃n gakuio kú ma ↄzĩ
kↄ̃n ↄↄda kaaranao kↄ̃n kuuna nnaao.
19 Nɛ́ kɛ̀ mɛɛ̀ ińnɛ sã̀ↄ dɛ vura maaala,
kaarana kɛ̀ mɛɛ̀ kɛńnɛ dɛ kondogi wásawasala.
20 Má tɛ́ yãzɛde zɛ́n,
mɛɛ̀ táa o zɛ́ súusu guu.
21 Mɛɛ̀ gbɛ̃ kɛ̀ aↄ̃ↄ yemaziinↄ gba pↄ́,
mɛɛ̀ ń auzikikaɛkiinↄ pańnɛ.
22 Dii ma kɛ zaa a zĩ naanagurↄ,
ai àgↄ̃ gá yã kɛ̀ à kɛ̀ zaa káakunↄ kɛ.
23 À ma diɛ zaa káakumɛ,
zaa à daɛgurↄ, lɛ èe anduna kɛ kↄ̀ro.
24 À ma i zaalɛ ísiaa kuuro,
íbↄki kee kuu gurↄ beeearo.
25 À ma i kpiiinↄ ã,
ai àgↄ̃ gá sĩ̀sĩnↄ kãsãa pɛ́ɛ,
26 ai àgↄ̃ gá anduna káɛ,
ke sɛ̃̀tɛ ke bùsu wɛ́n doo.
27 Kɛ̀ èe pↄ́ kɛ̀ kú musunↄ kɛɛ,
kɛ̀ èe bàtuma daa ísiaala,
28 kɛ̀ èe lou naa musu,
kɛ̀ èe tↄↄtɛ í zɛ́ fↄ̃ↄ,
29 kɛ̀ èe ísia zɛki lɛ́ kɛɛ,
lɛ à í tón vĩ à zɛki lɛ́laro,
kɛ̀ èe anduna kaɛɛ, má kú gwe.
30 Má kú à saɛ ↄzĩkɛri maaa ũ,
ma pↄↄ ègↄ̃ nna à aɛzĩ lán guu e dↄↄ nà,
mɛɛ̀gↄ̃ pↄnnaa kɛɛo gurↄ sãnda píngi.
31 Ma pↄↄ ègↄ̃ nna Dii andunaa,
gbɛ̃nteenↄↄ dɛ ma pↄnnakɛbↄ ũ.
32 Tia sa, ma nɛ́nↄ, à ma yã ma,
aubarikadeen gbɛ̃ kɛ̀ ma zɛ́ kũna ũ.
33 À ma lɛ́damma ma à ↄ̃ndↄ̃ kũ,
àton pã kpáziro.
34 Aubarikadeen gbɛ̃ kɛ̀ èe swã kpaa ma yãzi ũ
kɛ̀ ègↄ̃ ma wɛtɛɛ ma kpɛɛlɛ,
kɛ̀ ègↄ̃ ma dãa gurↄ sãnda píngia.
35 Zaakɛ gbɛ̃ kɛ̀ ma ee wɛ̃̀ndi è,
eégↄ̃ nna kↄ̃n Diio.
36 Gbɛ̃ kɛ̀ kòramazii yã zaaa ì a zĩndanɛmɛ,
gbɛ̃ kɛ̀ zàmaguunↄↄ ye gaazimɛ.