Luda yã takada kↄ̃n Bokobaru yão EBERUNƆ 8

Yesun wa Sa'oriki ũ

1 Yã kɛ̀ wée oo mìn yɛ̀: Wá sa'oriki beee taka vĩ vɛ̃ɛna kíblekitaa musu Luda Bítadee ↄplaazi. 2 È zĩi kɛ Ludakukiia, bisakuta yãpuraa kɛ̀ Dii dↄ̀n, èe kɛ pↄ́ kɛ̀ gbɛ̃nteenↄↄ dↄ̀nlo. 3 Zaakɛ gbadana kↄ̃n sa'onao yãnzin wè sa'oriki píngi kázi, à maa àpi gↄ̃ pↄ́ vĩ à kpá se. 4 Tó à kú anduna guu, eégↄ̃ dɛ sa'ori ũro, zaakɛ sa'ori kɛ̀ aↄ̃è gbaanↄ kpá lán doka dìɛ nànↄↄ kuu kↄ̀. 5 Zĩi kɛ̀ aↄ̃ↄe kɛɛ nɛ́ pↄ́ kɛ̀ kú musu takamɛ, à niniimɛ. Beee yãnzi kɛ̀ Musa yezi à bisakutaa dↄ, Luda bènɛ à làakari kɛ à pↄ́ kɛ̀ a à taka ↄ̀dↄanɛ kpiii musu kɛ lán à dɛ nà píngi. 6 Yesu bé Luda bà kuunawao yãkɛkɛri ũ. Zaakɛ Luda bà kuunawao pì dɛ à bà kuunańyo ziila, zĩi kɛ̀ wà dànɛ dɛ sa'oriki pìnↄ pↄ́la. Luda bà kuunawao pì lɛ́gbɛ̃na dɛ à ziila dↄ. 7 Tó Luda bà kuunańyo zii pì papanamɛ yã, lɛ à plaadee zɛ́ vĩro. 8 Kɛ̀ Dii Isarailinↄ taari è à bè:

À gurↄↄ e mↄↄ kɛ̀ mɛ́ ma bà kuuna

kↄ̃n Isarailinↄ kↄ̃n Yudanↄ dufu kɛ.

9 Eégↄ̃ dɛ lán ma bà kuuna kↄ̃n ń dezinↄo

gurↄↄ kɛ̀ ma ń kũ ń ↄↄa

ma ń bↄ́ɛ Igipiti bàro.

Zaakɛ aↄ̃ↄe zɛ kↄ̃n ma bà kuunańyooro,

ben ma ń tón.

10 Ma bà kuuna kↄ̃n Isarailinↄ gurↄ beeenↄ gbɛra yãn yɛ̀:

Mɛ́ ma dokayãnↄ dańnɛ ń nↄ̀sɛ guu,

mɛ́ kɛ̃ ń swɛ̃̀a.

Mɛ́gↄ̃ dɛ ń Luda ũ,

aↄ̃égↄ̃ dɛ ma gbɛ̃nↄ ũ.

11 Aↄ̃ gbɛ̃ke é yã dada a daanɛro,

aↄ̃ gbɛ̃ke é ma dↄ̃na da a gbɛ̃nɛro,

zaakɛ aↄ̃ píngi égↄ̃ ma dↄ̃mɛ,

nɛ́ féte gbɛ̃nsi ń píngi.

12 Mɛ́ sùu kɛńyo kↄ̃n ń taarinↄ,

mɛ́ ń durunnↄ yã da dↄro.

13 Kɛ̀ Luda bà kuunańyo dufu pì yã ò, à à káakupↄ zi bò. Pↄ́ kɛ̀ zi kũ̀ à bùsa, à kpana guuzi zã̀ro.