Luda yã takada kↄ̃n Bokobaru yão BƆNA 20

Dokayã mɛ̀n kurinↄ

1 Luda yã kɛ̀kii ò píngi à bè: 2 Mámbe Dii a Luda ũ. Ma a bↄɛ zↄ̀bleen Igipiti.

3 Àtongↄ̃ dii ke vĩ ma gbɛraro.

4-5 Àton pↄ́ke taka kɛ à kúɛ à dↄnzi kɛnɛro, pↄ́ kɛ̀ kú musu ke tↄↄtɛa ke í guun yoo, zaakɛ mamↄma Dii a Luda má nↄ̀sɛgↄ̃aanↄ vĩ. Mɛɛ̀ gbɛ̃ kɛ̀ yemaziroonↄ yã zaa wí ń boriinↄ musu ai à gá pɛ́ ń swãkpɛɛnↄa kↄ̃n ń nasionↄ. 6 Gbɛ̃ kɛ̀ aↄ̃ↄ yemazi aↄ̃ↄ ma dokayãnↄ kũnanↄ sↄ̃, mɛɛ̀gↄ̃ gbɛ̃kɛɛ vĩńyomɛ ai ń boriia.

7 Àton mamↄma Dii a Luda tↄ́ sí pãpãro, zaakɛ gbɛ̃ kɛ̀ ma tↄ́ sì pãpãa mɛ́ tó à bↄ pãro.

8 Àgae dↄn kámmabogurↄↄ zĩ nɛ́ ma pↄ́mɛ. 9 Àgae a bura zĩ kↄ̃n a zĩ píngio kɛ gurↄ swɛɛdo, 10 à swɛɛplaadee gↄ̃ dɛare kámmabogurↄↄ ũ, zaakɛ mamↄma Dii a Luda ma pↄ́mɛ. Àton zĩi ke kɛ gurↄↄ pì zĩro, apinↄ ke a nɛ́gↄ̃gbɛ̃ ke a nɛ́nↄgbɛ̃ ke a zĩkɛri gↄ̃gbɛ̃ ke nↄgbɛ̃ ke a pↄ́kãdee ke nibↄ kɛ̀ kú a bɛ. 11 Zaakɛ gurↄ swɛɛdon ma musu kↄ̃n tↄↄtɛo kɛ̀ kↄ̃n ísiaao kↄ̃n pↄ́ kɛ̀ kú ń guunↄ píngi, ben ma kámma bò à gurↄ swɛɛplaadee zĩ. Beee yãnzi ma aubarika dà kámmabogurↄↄ pìnzi, má dìɛ ma pↄ́ ũ. 12 Àgae bɛ̀ɛ lí a de kↄ̃n a daonɛ, lɛ à gì kɛ bùsu kɛ̀ mamↄma Dii a Luda mɛ́ɛ kpaaawaan.

13 Àton gbɛ̃ dɛro.

14 Àton zina kɛro.

15 Àton kpãi oro.

16 Àton yã di a gbɛ̃daaaaro.

17 Àton a gbɛ̃daaa ua ni dɛro. Àton à nↄↄ ni dɛro ke à zĩkɛri gↄ̃gbɛ̃ ke nↄgbɛ̃ ke à zù ke à zaaki ke pↄ́ kɛ̀ à vĩinↄ píngi.

18 Baade píngi lapatana mà kↄ̃n kuru'ↄo, aↄ̃ loupina è kↄ̃n tɛ́sukpɛo dↄ kpiii musu, ben vĩa ń kũ aↄ̃ↄe lugalugaa aↄ̃ↄ zɛ kãaa. 19 Aↄ̃ bè Musanɛ: Ǹ yã owe n zĩnda, wé ma. Ǹton tó Luda yã owero, lɛ wàton gagaro yãnzi. 20 Musa bèńnɛ: Àton tó vĩa a kũro, zaakɛ kɛ̀ à a yↄ̃ à gwa yãnzin à mↄ̀zi, lɛ àgↄ̃ à vĩa vĩ bensↄ̃ àton durun kɛro yãnzi. 21 Aↄ̃ↄ zɛ kãaa, ben Musa sↄ̃̀ tɛ́sukpɛ gègete pìzi, guu kɛ̀ Ludaa kún pìn.

Dii gbãgbãki yã

22 Ben Dii bè Musanɛ: Ǹ yã kɛ̀kii o Isarailinↄnɛ: Á mà a zĩndanda lán ma yã òare zaa musu nà. 23 Àton tãa ke kɛ à namaro. Àton kondogi ke vura pi tãanↄ ũro. 24 À ma gbãgbãkii bo kↄ̃n ɛ̃ɛo à saa oa kↄ̃n sãanↄ kↄ̃n zùnↄ, sa'opↄ kɛ̀ wè ká tɛ́n à tɛ́ kũ kↄ̃n kɛnnakↄ̃o sa'opↄo. Guu kɛ̀ má dìɛare àgↄ̃ ma sísin, mɛ́ mↄ́ a kiia mà aubarika daagu. 25 Tó ée ma gbãgbãkii pì boo kↄ̃n gbɛ̀o, àton bo kↄ̃n gbɛ̀ anaoro, zaakɛ tó a gã pɛ̀ɛa, á tò à gbãsĩ lɛ̀n gwe. 26 Àton ma gbãgbãkii bo à à didikii kɛro, lɛ a bũukɛɛ tón ↄdↄaaro yãnzi.

BƆNA
<
20
>