Luda yã takada kↄ̃n Bokobaru yão ƐFESUDEENƆ 5

Kuuna gupuraan

1 Lán á dɛ Luda nɛ́ yenzideenↄ ũ nà, à à zɛ́kpaɛ sɛ́. 2 Lán Kirisi yewazi nà à gì a wɛ̃̀ndizi wa yãnzi sa'obↄ kɛ̀ à gũ nna Ludanɛ ũ, à tó yekↄ̃zina dↄare aɛ lɛ se.

3 Lán á dɛ Luda gbɛ̃nↄ ũ nà, èe kↄ̃ sío wà pãpãkɛna ke dà zaa bori píngi ke wãkũ yã ma a tɛ́ sero. 4 Wísaiyã'ona kↄ̃n yã dↄ̀rↄsai onao kↄ̃n fàadi zaa bonao e kↄ̃ síaoro dↄ, sé sáabukpana yã. 5 Àgↄ̃ dↄ̃ sãnsãn kɛ̀ pãpãkɛri ke dàzaade ke wãkũde ke é kpata kɛ̀ bↄ̀ Luda kiia ble lɛdo kↄ̃n Kirisioro. Pↄ́ kɛ̀ gbɛ̃ è à wãkũ kɛɛ gↄ̃̀ à dii ũmɛ. 6 Àton tó gbɛ̃ke a sãsã kↄ̃n yã pã korioro. Yã beee takanↄ bé eé tó Luda pↄfɛ̃ pita a yãmarisaideenↄa. 7 Àton tó a bà gↄ̃ kúńyoro. 8 Á kú gusiaan yã, tia sa Dii guu á kú gupuraan. Àgↄ̃ kuu gupura gbɛ̃nↄ ũ, 9 zaakɛ gupuraa è maa bori sãnda píngi ińnɛ kↄ̃n yãzɛdeeo kↄ̃n yãpuraao. 10 À yã kɛ̀ è ká Diinɛ dada. 11 A bà tóngↄ̃ kú kↄ̃n gusia yãkɛna kɛ̀ à kaarana vĩroooro. À yã beeenↄ bↄbↄ gupuraaa. 12 Baa yã kɛ̀ gbɛ̃ pìnↄ è kɛ asii guu ona nɛ́ wíyãmɛ. 13 Tó wà bↄ̀ kↄ̃n yão gupuraaa, wè à sãnsãn dↄ̃, 14 zaakɛ gupuraa è tó wà pↄ́ píngi e. Beee yãnzi wè be:

I'ori ǹ vu ǹ fɛɛ bↄna gɛ̀nↄ tɛ́,

Kirisi é guu punnɛ.

15 Àgↄ̃ a táa'ona dↄ̃ maamaa. Àtongↄ̃ dɛ yↄ̃nkↄↄnↄ ũro, sé ↄ̃ndↄ̃rinↄ. 16 Àgae yã kɛ̀ Luda à zɛ́ bↄ̀aree kɛ, zaakɛ gurↄↄ kɛ̀kiinↄↄ zaa. 17 Beee yãnzi àtongↄ̃ mìsaideenↄ ũro, àgↄ̃ dↄ̃ lán Dii pↄyezi dɛ nà. 18 Àtongↄ̃ kú kↄ̃n wɛ̃dɛnaoro, è pãpãa zĩḿmamɛ, mↄde à tó Luda Nini gↄ̃ zĩi kɛ a guu papana, 19 gbasa à fàadi bo kↄ̃o kↄ̃n saamuo kↄ̃n Luda tↄ́kpanao kↄ̃n lɛ̀ kɛ̀ Luda Nini è daareeo. À lɛ̀ sí à Dii tↄ́ kpá a swɛ̃̀ guu, 20 àgↄ̃ De Luda sáabu kɛɛ gurↄ píngi yã píngi guu kↄ̃n wa Dii Yesu Kirisi tↄ́o. 21 À mì siɛkↄ̃nɛ Kirisi vĩa kɛ̀ á vĩ yãnzi.

Gↄ̃gbɛ̃ kuuna kↄ̃n a naↄ̃o

22 A nↄgbɛ̃nↄ, a baade gae mì siɛ a zãnɛ lán Diin ée kɛɛnɛ bà. 23 Zaakɛ gↄ̃gbɛ̃n nↄgbɛ̃ mì ũ, lán Kirisi dɛ sↄsi kɛ̀ dɛ à mɛ̀ ũu mì ũ nà kↄ̃n à Mìsirio. 24 Lán sↄsi è mì siɛ Kirisinɛ nà, lɛmɛ se nↄgbɛ̃nↄ gae mì siɛ ń zãnↄnɛ lɛ yã píngi guu.

25 A gↄ̃gbɛ̃nↄ sↄ̃, a baade gↄ̃ ye a naↄ̃zi lán Kirisi ye sↄsizi nà, à gì a wɛ̃̀ndizi à yãnzi. 26 À à gbãsĩ bↄ̀n kↄ̃n ío a yã gãzĩ lɛ àgↄ̃ de a pↄ́ ũ, 27 lɛ à à kpan'aɛ kɛ kↄ̃n gakuio pↄ́gbɛ sai yitookũna sai see sai gbãsĩ sai taari sai. 28 Lɛn à kↄ̃ sìo gↄ̃gbɛ̃ píngi gↄ̃ ye a naↄ̃zi lɛ lán a zĩnda mɛ̀ bà. Gbɛ̃ kɛ̀ ye a naↄ̃zi ye a zĩndazimɛ. 29 Gbɛ̃ke è gí a zĩnda mɛ̀ziro. È pↄ́blee kpáa è làakari dↄa lán Kirisi è kɛ sↄsinɛ nà, 30 kɛ̀ wá dɛ à mɛ̀guunↄ ũ yãnzi. 31 Beee yãnzi gↄ̃gbɛ̃ é a de kↄ̃n a dao tó, aↄ̃é nakↄ̃a kↄ̃n a naↄ̃o, aↄ̃ gↄ̃ↄn plaaa é gↄ̃ mɛ̀ doo ũ. 32 Asii bíta kú yã pì guu, má è à dɛ lɛ Kirisi dagura kↄ̃n a sↄsio. 33 Baa kↄ̃n beeeo à dɛ a yã ũ se dↄ. A baade gↄ̃ ye a naↄ̃zi lán a zĩnda bà. Nↄgbɛ̃ sↄ̃ a zã yã da.