103
Luda gbɛ̃kɛɛ
Dauda lɛ̀.
1 Ma swɛ̃̀, ǹ Dii sáabu kpá,
ma baabↄ píngi, ǹ à tↄ́ kɛ̀ kú adona bↄ.
2 Ma swɛ̃̀, ǹ Dii sáabu kpá,
ǹton sã à yãmaakɛna kenlo.
3 È ma taarinↄ kɛ̃mɛ píngi,
è ma kɛ̃kↄ̃a kↄ̃n ma gyãanↄ píngi.
4 È ma wɛ̃̀ndi bↄ gɛ̀wãan,
è à nnaa dialɛmɛ a gbɛ̃kɛ kↄ̃n a wɛ̃ndao guu.
5 È tó pↄ́ maaa kɛ̀ má yezinↄ mↄ́ma,
lɛ ma gↄ̃kparɛkɛɛ e àgↄ̃ dufu lán kúu pↄ́ bà.
6 Dii è yã kɛ a zɛ́a,
è tó yã bↄ kↄ̃n gwenawɛ̃ndadeenↄo nna.
7 À tò Musa a pↄyeziyã dↄ̃̀,
à a yãbↄnsaɛnↄ ↄ̀dↄa Isarailinↄnɛ.
8 Dii sùu vĩ kↄ̃n wɛ̃ndaao,
à pↄↄ è fɛ̃ kpaaro,
à gbɛ̃kɛ bíta maamaa.
9 Eé ń taari e gɛ̃̀n baaagↄ̃ro,
eé pↄfɛ̃ da a nↄ̀sɛn gurↄ píngiro.
10 È yã kɛwe lán wa durunnↄↄ dɛ nàro,
è fĩa bowe lán wa zãzãanↄↄ dɛ nàro.
11 Lán ludambɛ lezĩ kà nà kↄ̃n tↄↄtɛo,
lɛn à gbɛ̃kɛɛ bíta lɛ kↄ̃n à vĩakɛrinↄ.
12 Lán ↄfãntɛ̃bↄɛ kpaa zã̀ kↄ̃n a gɛ̃kpɛn kpaao nà,
lɛn è wa taarinↄ kɛ̃wa lɛ.
13 Lán de è wɛ̃nda dↄ̃ a nɛ́nↄnɛ nà,
lɛn Dii è a vĩakɛrinↄ wɛ̃nda gwa lɛ,
14 Zaakɛ à dↄ̃ pↄ́ kɛ̀ à wa kɛo,
à dↄ̀n kɛ̀ bùsun wa ũ.
15 Gbɛ̃ntee wɛ̃̀ndi kusu lán sɛ̃̀ bà,
ègↄ̃ gakui vĩ gurↄ plaa lán lávu bà.
16 Tó ĩa pàa, è gɛ̃tɛ,
guu kɛ̀ à kún pì è dↄ à yãn dↄro.
17 Dii ègↄ̃ gbɛ̃kɛɛ vĩ kↄ̃n a vĩakɛrinↄ
zaa káaku ai gurↄ píngi,
è à maaa kɛ ń nɛ́nↄnɛ kↄ̃n ń dionↄ,
18 gbɛ̃ kɛ̀ zɛ̀ kↄ̃n à bà kuunańyo yão
bensↄ̃ aↄ̃ yã kɛ̀ à dìɛnↄ kũnanↄ.
19 Dii a kpata dìɛ musu,
à gbãaa vĩ gbɛ̃ píngia.
20 À Dii sáabu kpá, amↄa à malaikanↄ,
a gbãadee kɛ̀ eè à yã ma à zĩi kɛanↄ.
21 À Dii sáabu kpá, a ludambɛ zĩ̀kpɛɛnↄ a píngi,
à zĩkɛri kɛ̀ eè à pↄyeziyã kɛɛnↄ.
22 À Dii sáabu kpá, amↄa à pↄ́kɛnanↄ a píngi
guu kɛ̀ èe kí bleennↄ baama píngi.
Ma swɛ̃̀, ǹ Dii sáabu kpá.