Luda yã takada kↄ̃n Bokobaru yão SAAMUNƆ 19

19

Ludambɛ gakui kↄ̃n Luda yã gakuio

Dauda lɛ̀.

1 Musu è Luda gakui bↄ gupuraaa,

bàtumapↄnↄ è à zĩi ↄdↄańnɛ.

2 Lɛn èegↄ̃ yã oo lɛ lán guu e dↄↄ nà,

è dↄ̃na kpáḿma gwãavĩ kↄ̃n gwãavĩo.

3 È yã oro, à yã'ona borii kuuro,

wè à kĩi maro.

4 À kòto è da andunala píngi,

à yã'ona è gá ai tↄↄtɛ lɛ́zɛkiia.

Luda kpɛ́ bò ↄfãntɛ̃nɛ gwe,

5 è bↄ kpɛ́n à fɛɛ lán nↄsɛri bà,

è fɛɛ táo kↄ̃n pↄnnaao lán gↄ̃sagbãaa bà.

6 È fɛɛ ludambɛlɛa kɛ̀,

è bikũ à gá ai à lɛ́a kãa,

pↄ́ke ègↄ̃ utɛna à puusunɛro.

7 Dii doka papana,

è ń kuuna kɛkɛ à kɛńnɛ dↄ.

Dii yã náanɛ vĩ,

è lɛ́ da ↄ̃ndↄ̃saideenↄa.

8 Dii ↄdↄkii bé à súusu, è ń pↄↄ kɛ nna.

Dii yãdiɛnanↄↄ gbãsĩ vĩro, è ń uu wereńnɛ.

9 Mìsiɛna Diinɛ zɛ́ pì wɛ́ɛbↄna,

weégↄ̃ tɛ́zi gurↄ píngi,

Dii yãkpaɛkɛna yãpuraa vĩ,

ègↄ̃ maa wásawasa.

10 À maaa dɛ vurala, baa vura maaa,

à nnaa dɛ zↄ́'ila, baa zↄ́ búsu.

11 Beee musu nɛɛ̀ lɛ́ da mamↄma n zↄ̀bleria,

gbɛ̃ kɛ̀ n yã kũna àre ègↄ̃ bíta.

12 Dé bé eé fↄ̃ à yã kɛ̀ à zã̀anↄ dↄ̃ↄ?

Ǹ sùu kɛmao kↄ̃n ma taari kɛ̀ utɛnamɛɛnↄ.

13 Ǹton tó mamↄma n zↄ̀bleri taari kɛnnɛ gĩanziro,

ǹton tó durunnↄ kí blemaro,

mɛ́gↄ̃ kuu wásawasa taari bíta sai.

14 Ǹ tó yã kɛ̀ èe bↄↄ ma lɛ́n kɛnnɛ

kↄ̃n laasuu kɛ̀ kú ma swɛ̃̀ guuo,

Dii, ma gbɛ̀si, ma mìsiri.