Luda yã takada kↄ̃n Bokobaru yão SAAMUNƆ 10

10

Wɛ́ɛkɛna Ludaa à yãkpaɛ kɛ gbɛ̃nteenↄnɛ

1 Dii, bↄ́yãnzi ń zɛna zã̀azãzi?

À kɛ̀ dia nɛɛ̀ n zĩnda utɛ nawɛ̃akɛgurↄ?

2 Gbɛ̃ zaaa è gbãasaidee wɛtɛ à dɛ wadakɛɛ guu,

è mↄnafiki kɛnɛ à à kũ.

3 Gbɛ̃ zaaa è a pↄ́nidɛnanↄ ĩa dã,

è sãnkarade sáabu kpá è Dii tↄ́ zaaa sí.

4 Gbɛ̃ zaaa wada bé à tò è Dii kii wɛtɛro,

à Luda laasuu vĩro.

5 Yã kɛ̀ è kɛ píngi è bↄnɛ maamɛ,

è a zĩnda kaara, è n doka daro,

è lɛ́zukii kɛ a ibɛɛnↄa.

6 È be é kpágularo,

égↄ̃ kú pↄnnaan wahaa sai.

7 Ɛgɛ kↄ̃n gbɛ̃kanao kↄ̃n yã pãsĩo à lɛ́ pà,

kisia yã kↄ̃n yã zaaao bé ègↄ̃ daa à lɛ́n.

8 È naɛ taarisaideenɛ lakutu kpɛɛ

lɛ à e à à dɛ asii guu,

è mìzaadee kpákpa gusaɛ.

9 È naɛ gbɛ̃nↄnɛ asii guu lán músu bà,

è naɛ lákpɛn lɛ à e à gbãasaide kũ.

Tó à à kũ̀, è à gáɛ kↄ̃n a bào.

10 Gbɛ̃ kɛ̀ à lè à kũ̀ ègↄ̃ daɛna sↄ̀rↄrↄ,

gbãaa bé à à nɛ̀.

11 Gbɛ̃ zaaa è be Luda è yã tàasi kɛro,

è ↄ kú a wɛ́ɛamɛ è guu ero.

12 Dii, ǹ fɛɛ ǹ mↄ́ kↄ̃n n gbãaao,

Luda, ǹgↄ̃ takaasideenↄ tàasi kɛɛ.

13 Luda, bↄ́yãnzin gbɛ̃ zaaa è dↄkɛnyo lɛzi?

È be a swɛ̃̀ guu nɛ́ ĩa daawaro.

14 Baa kↄ̃n beeeo nɛɛ̀ gbɛ̃nↄ yã'ↄ̃amma e sãnsãn,

nɛɛ̀ ń pↄsia yã da lɛ ǹ e ǹ ↄ daḿma.

Gbãasaidee è a zĩnda kpámma,

tonɛ kɛ̀ gwàri vĩroo dↄnlɛrin n ũ.

15 Ǹ gbɛ̃ zaaanↄ kↄ̃n gbɛ̃ pãsĩnↄ gã̀sã ɛ́ńnɛ,

ǹ ń yã zaaa kɛ̀ aↄ̃ↄe daa wà dↄ̃roo wí ń musu.

16 Dii ègↄ̃ kí blee gurↄ píngi,

à yãdarisaideenↄ é kaatɛ à bùsun.

17 Dii è takaasideenↄ wɛ́ɛkɛna sí,

è ń gba swɛ̃̀, è swã kpá ń wiipɛnazi.

18 È zɛ kↄ̃n tonɛ kɛ̀ gwàri vĩroonↄ

kↄ̃n gbɛ̃ kɛ̀ wèe wɛ́ɛ tãaḿmanↄ,

lɛ gbɛ̃ntee kɛ̀ dɛ bùsuti ũ

tón tó swɛ̃̀ kɛ̃ gbɛ̃nↄn dↄro yãnzi.