Luda yã takada kↄ̃n Bokobaru yão MAAKU 2

Gbɛ̃ kaɛna kɛ̃kↄ̃ana

(Mat 9:1-8, Luk 5:17-26)

1 Gurↄ plaaa gbɛra Yesu lìara à tà Kapɛnamu. Kɛ̀ wà mà à kú bɛ, 2 ben wà pàzi paripari, gɛ̃kii kuu dↄro baa kpɛɛlɛa, èe Luda yã oońnɛ. 3 Ben wà mↄ̀nɛ gbɛ̃ kaɛnao, gↄ̃ↄn siigↄ̃ↄ bé wà à sɛna. 4 Kɛ̀ aↄ̃ↄe e wà sↄ̃̀o Yesuziro parii yãnzi, ben aↄ̃ dìo kpɛ́ musu, aↄ̃ kpɛ́ fↄ̃̀ guu kɛ̀ Yesu kún. Kɛ̀ aↄ̃ↄ fↄ̃̀, ben aↄ̃ gyãree pì pìta kↄ̃n à daɛbↄo. 5 Kɛ̀ Yesu è aↄ̃ↄ a náanɛ vĩ, a bè gbɛ̃ kaɛna pìnɛ: Ma gbɛ̃, n durunnↄ kɛ̃̀mma. 6 Ludayãdannɛri kenↄ vɛ̃ɛna gwe aↄ̃ↄe oo ń nↄ̀sɛ guu: 7 Bↄ́yãnzi gbɛ̃ kɛ̀ e oo lɛzi? Èe dↄkɛɛ Ludaomɛee! Dé bé eé fↄ̃ à durunnↄ kɛ̃ńnɛ, tó èe kɛ Luda ado baasiroo? 8 Gwe gↄ̃ↄ Yesu dↄ̃̀ a nↄ̀sɛ guu laasuu kɛ̀ aↄ̃ↄe lɛɛ, ben à ń lá à bè: Bↄ́yãnzi ée laasuu beee taka lɛɛ a nↄ̀sɛ guuzi? 9 Tó ma bè gbɛ̃ kaɛna pìnɛ à durunnↄ kɛ̃̀a, ke tó ma bè à fɛɛ à a daɛbↄ sɛ́ à táa o, à kparee bé à aagaa? 10 Má ò lɛ lɛ àgↄ̃ dↄ̃ kɛ̀ Gbɛ̃ntee Nɛ́ durunkɛ̃nnɛna iko vĩ tↄↄtɛ kɛ̀. Ben à bè gbɛ̃ kaɛna pìnɛ: 11 Ma bènnɛ ǹ fɛɛ ǹ n daɛbↄ sɛ́ ǹ tá bɛ. 12 Ben à fɛ̀ɛ gↄ̃ↄ à a daɛbↄ pì sɛ̀ à bↄ̀o gbɛ̃nↄ wáa ń píngi. Yã pì bↄ̀ ń saɛ, ben aↄ̃ Luda tↄ́ bↄ̀ wà bè: Wée yã kɛ̀ taka e yãro.

Levi sisina

(Mat 9:9-13, Luk 5:27-32)

13 Yesu lìara à bↄ̀ à gàa sɛ̀bɛ lɛ́a. Wèe mↄↄ à kiia paripari, ben èe yã daańnɛ. 14 Gurↄↄ kɛ̀ èe gɛ̃tɛɛ, ben à Alafeu nɛ́ Levi è vɛ̃ɛna a bɛ'ↄↄsikpɛn. À bènɛ: Ǹ mↄ́ ǹ tɛ́mazi. Ben à fɛ̀ɛ à tɛ̀zi.

15 Zĩkea kɛ̀ Yesu e pↄ́ blee à bɛ, bɛ'ↄↄsirinↄ kↄ̃n durunkɛrinↄↄ e pↄ́ bleeo pari kↄ̃n à ìbanↄ lɛdo. Zaakɛ gbɛ̃ beee takanↄↄ tɛ́zi pari. 16 Farisi kɛ̀ aↄ̃è Luda yã dańnɛnↄↄ kú gwe. Kɛ̀ aↄ̃ↄ è Yesu e pↄ́ blee lɛdo kↄ̃n bɛ'ↄↄsirinↄ kↄ̃n durunkɛrinↄ, ben aↄ̃ à ìbanↄ là wà bè: Bↄ́yãnzin èe pↄ́ blee lɛdo kↄ̃n bɛ'ↄↄsirinↄ kↄ̃n durunkɛrinↄozi? 17 Kɛ̀ Yesu yã pì mà, à bèńnɛ: Gbɛ̃ kɛ̀ aafia vĩi bà kú likita yãoro, sé gyãree. Mɛ́ɛ mↄ́ gbɛ̃ maaanↄ sísiro, sé durunkɛrinↄ.

Lɛ́yina

(Mat 9:14-17, Luk 5:33-39)

18 Yaaya Batisikɛri ìbanↄ kↄ̃n Farisinↄↄ e lɛ́ yii, ben wà mↄ̀ wà Yesu là wà bè: Yaaya ìbanↄ kↄ̃n Farisi ìbanↄ è lɛ́ yi, ben n ìbanↄ è yi sero nɛ́? 19 Ben Yesu bèńnɛ: Nↄsɛri gbɛ̃nↄ é lɛ́ yi gurↄↄ kɛ̀ à kúńyo nↄsɛ guun yↄ́? Gurↄↄ kɛ̀ nↄsɛri kúńyo, aↄ̃é lɛ́ yiro. 20 À gurↄↄ é mↄ́ kɛ̀ weé nↄsɛri bↄ ń tɛ́, gbasa aↄ̃é lɛ́ yi sa. 21 Gbɛ̃ke è uta zii nambata na kↄ̃n pↄ́lɛ dufuoro. Tó wà kɛ̀ lɛ, uta dufu é sↄ̃kↄ̃zi à kɛ̃kↄ̃rɛ, à zii fↄ̃na é kaara. 22 Wè geepiwɛ̃ dufu ká tùu zii guuro. Tó wà kɛ̀ lɛ, wɛ̃ɛ pì é tùu pũtã, wɛ̃ kↄ̃n tùuo é yaka ń píngi. Auo, wè geepiwɛ̃ dufu ká tùu dufu guumɛ.

Kámmabogurↄ yã

(Mat 12:1-21, Luk 6:1-11)

23 Kámmabogurↄↄ zĩkea Yesu e pãa buraanↄla. Lán èe gaa nà à ìbanↄ pↄ́wɛɛ wòro, aↄ̃ↄe soo. 24 Ben Farisinↄ bènɛ: Ǹ gwa! Bↄ́yãnzin aↄ̃ↄe yã kɛ̀ wè kɛ kámmabogurↄↄ zĩroo kɛɛzi? 25 Ben Yesu wèńla à bè: Ée à kyó kɛ ziki á è lán Dauda kɛ̀ gurↄↄ kɛ̀ àpi kↄ̃n a gbɛ̃nↄↄ e takaasi kɛɛ, kɛ̀ nↄaa e ń dɛɛroo? 26 Sa'oriki Abiata gurↄↄa à gɛ̃̀ Luda ua guu, à burɛdi kɛ̀ wà kàɛ Ludanɛ sò, kɛ̀ gbɛ̃kee à sona zɛ́ vĩro, sé sa'orinↄ, ben à kpà a gbɛ̃nↄa. 27 Yesu ɛ̀ara à bèńnɛ dↄ: Luda kámmabogurↄↄ dìɛ gbɛ̃ntee aafia yãnzimɛ. Èe kɛ kámmabogurↄↄ yãnzin à gbɛ̃ntee kɛ̀ziro. 28 Beee yãnzi Gbɛ̃ntee Nɛ́ iko vĩ kámmabogurↄↄa se.

MAAKU
<
2
>