1 Filisitininↄ ń zĩ̀kpɛɛnↄ kàkↄ̃a, aↄ̃ↄe zĩ̀ soru kɛɛ Soko zaa Yudanↄ bùsun, ben aↄ̃ bùra kàɛ Ɛfɛsi Damimu, Soko kↄ̃n Azekao dagura. 2 Solu kↄ̃n Isarailinↄ sↄ̃ kↄ̃ kàkↄ̃a aↄ̃ bùra kàɛ Ela gusararaan, aↄ̃ↄe soru kɛɛ aↄ̃ gá Filisitininↄzi zĩ̀o. 3 Filisitininↄↄ kú sĩ̀sĩa kãa kpa, Isarailinↄ sↄ̃ↄ kú sĩ̀sĩa kɛ̀ kpa, guzurɛ kú ń dagura. 4 Ben Gata gↄ̃sagbãaa kɛ̀ wè sísi Gↄlaya bↄ̀ Filisitininↄ bùran. À gbã̀a kà gã̀sãsuu swɛɛdo. 5 À mↄ̀gotɛ̃ fùra kuna, à mↄ̀gotɛ̃ uta kɛ̀ dɛ lán kpↄ̀tɛɛ bà dana kɛ̀ à tìisi kà kiloo baaagↄ̃. 6 À mↄ̀gotɛ̃ sòkoto yina dↄ, bensↄ̃ à mↄ̀gotɛ̃ sári lɛ̀ɛtɛgɛɛ logona a kpɛɛ kpa. 7 À sári sↄ̃ntɛ kũna, à pá dɛ lán bisatãri àsa lí bà. À wɛ́ɛ tìisi kà kiloo swɛɛplaa. À sɛngbangosɛri tɛna à aɛ.

8 Gↄlaya zɛ̀ à lɛ́ zù Isaraili zĩ̀kpɛɛnↄzi à bè: Bↄ́yãnzin a bↄɛ kↄ̃n zĩ̀ozi? Á dↄ̃ kɛ̀ Filisitinin ma ũroo? Amↄa sↄ̃, Solu zↄ̀nↄn a ũ. À gbɛ̃ke bↄ a tɛ́ à pita à mↄ́ ma kiia. 9 Tó eé fↄ̃ à zĩ̀ kámao à ma dɛ, ma gbɛ̃nↄ é gↄ̃ a zↄ̀nↄ ũ. Tó mámbe ma à dɛ̀ sↄ̃, é gↄ̃ wa zↄ̀nↄ ũ, égↄ̃ zↄ̀ bleewe. 10 Ben Filisitini pì ɛ̀ara à bè: Mɛ́ɛ kùsɛ biii Isaraili zĩ̀kpɛɛnↄa gbã̀a. À gbɛ̃ wɛtɛmɛ lɛ wà zĩ̀ ká lɛdo. 11 Kɛ̀ Solu kↄ̃n Isarailinↄ à yã pì mà ń píngi, aↄ̃ bídi kɛ̀, swɛ̃̀ kɛ̃̀ńgu.

12 Dauda nɛ́ Ɛflata gbɛ̃ Yɛsɛ nɛ́mɛ. Yɛsɛ nɛ́ Bɛtɛlɛmu kɛ̀ kú Yudanↄ bùsun gbɛ̃mɛ. À nɛ́gↄ̃gbɛ̃nↄ ì gↄ̃ↄn sↄraagↄ̃. Solu gurↄ gbɛ̃ zikũnamɛ. 13 À nɛ́ gbãa gↄ̃ↄn aagↄ̃ↄnↄↄ kú zĩ̀lan kↄ̃n Soluo. À nɛ́gↄ̃gbɛ̃ káaku tↄ́n Ɛliabu, à plaade tↄ́n Abinadabu, à aagↄ̃de tↄ́n Sama. 14 Daudan Yɛsɛ nɛ́ zãadee ũ. À vĩ̀i pìnↄↄ tɛ́ Soluzi, 15 mↄde Dauda è gá Solu kiia à ɛara à su Bɛtɛlɛmu à a de sãanↄ dã. 16 Filisitini pì è bↄ à a zĩnda ↄdↄańnɛ kↄngↄ kↄ̃n uusiɛo ai gurↄ baplaa.

17 Zĩkea Yɛsɛ bè a nɛ́ Daudanɛ: Ǹ ése kpatana kpɛ̃ɛ doo kɛ̀ kↄ̃n burɛdi mɛ̀n kuri kɛ̀nↄ sɛ́ ǹ gáo n vĩ̀inↄnɛ kpakpaa ń bùran. 18 Ǹ gàsi mɛ̀n kuri kɛ̀nↄ sɛ́ ǹ kpá ń gãli gbɛ̃nsia. Ǹ gá ǹ ń gwa, tó aↄ̃ↄ aafia, ǹ su sèedao kɛ̀ aↄ̃ↄ kuu aafia. 19 Aↄ̃ↄ kú kↄ̃n Soluo kↄ̃n Isarailinↄ píngi Ela guzurɛn, aↄ̃ↄe zĩ̀ kaa kↄ̃n Filisitininↄ.

20 Dauda fɛ̀ɛ kↄngↄ idɛ'idɛ, à a sãanↄ tò kↄ̃n sãdãri pãndeo. À a asoo sɛ̀, ben à dà zɛ́n lán Yɛsɛ ònɛ nà. Kɛ̀ à kà zĩ̀kpɛɛnↄ bùran, à mↄ̀ à lè aↄ̃ↄe gaa zĩ̀lan, aↄ̃ↄe wii gbãaa lɛɛ. 21 Isarailinↄ kↄ̃n Filisitininↄↄ e soru kɛɛ aↄ̃ aɛ dↄkↄ̃a. 22 Ben Dauda a asoo nà pↄ́dãkparinɛ a ↄzĩ, ben à bàa lɛ̀ à gàa zĩ̀lan. À a vĩ̀inↄ lè gwe, ben à ì kpàḿma. 23 Kɛ̀ èe yã oońyo, Filisitininↄ gↄ̃sagbãa Gↄlaya, Gata gbɛ̃ bↄ̀ Filisitini zĩ̀kpɛɛnↄ tɛ́, à ɛ̀ara à fɛ̀ɛ kↄ̃n a yã pìo. Dauda yã pì mà. 24 Kɛ̀ Isarailinↄ à è, swɛ̃̀ kɛ̃̀ńgu, aↄ̃ lɛ̀kↄ̃a ń píngi. 25 Aↄ̃ↄe ookↄ̃nɛ wèe bee: Ée gↄ̃gbɛ̃ pì e à bↄ̀roo? Tó à bↄ̀, è kùsɛ biiwamɛ. Gbɛ̃ kɛ̀ à à dɛ̀, kína é adee gba auziki bíta, eé a nɛ́nↄgbɛ̃ kpáa dↄ nↄↄ ũ, bensↄ̃ à bɛdeenↄ é bɛ'ↄↄ kpá dↄro.

26 Ben Dauda gbɛ̃ kɛ̀ aↄ̃ↄ zɛna a saɛnↄ là à bè: Bↄ́n weé kɛ gbɛ̃ kɛ̀ à Filisitini pì dɛ̀ à Isarailinↄ bↄ̀ wí guunɛ? Dén Filisitini gɛfↄↄdee pì ũ, gbasa àgↄ̃ Luda Wɛ̃̀ndide zĩ̀kpɛɛnↄ lɛ́ gwa yãzii? 27 Ben wà bènɛ lán gbɛ̃nↄↄ e oo nà: Lɛn weé kɛ gbɛ̃ kɛ̀ à à dɛ̀nɛ lɛ. 28 Kɛ̀ à vĩ̀i gbɛ̃nside Ɛliabu mà Dauda e yã oo kↄ̃n gbɛ̃nↄ, à pↄ fɛ̃̀zi à bè: À kɛ̀ dia n mↄ kɛ̀? Dén n sã féte kɛ̀gweenↄ tònɛ gbáan? Má n wada kↄ̃n n nↄ̀sɛ zaaao dↄ̃. N mↄ zĩ̀ gwamɛ. 29 Dauda bè: Bↄ́n má kɛ̀? Yãn má gbèkaroo? 30 Ben à kpɛɛ lìnɛ à gàa à yã dↄ̃nkↄ̃ pì là gbɛ̃ pãndea. Lán gbɛ̃ káaku ònɛ nà, lɛn wà ònɛ lɛ dↄ. 31 Wà yã kɛ̀ Dauda ò pì tↄ̃kɛ̃̀ Solunɛ, ben à gbɛ̃ zĩ̀ wà à sìsi.

32 Kɛ̀ Dauda mↄ̀, à bè Solunɛ: Gbɛ̃ke tón tó swɛ̃̀ kɛ̃agu Filisitini pì yã musuro. Mamↄma n zↄ̀bleri, mɛ́ gá zĩ̀ káo. 33 Ben Solu bènɛ: Nɛ́ fↄ̃ ǹ gá zĩ̀ ká kↄ̃n Filisitini pìoro. Nɛ́ féten n ũ. Gↄ̃gbɛ̃ pì sↄ̃ nɛ́ zĩ̀karimɛ zaa a gↄ̃kparɛkɛgurↄ. 34 Ben Dauda bènɛ: Mamↄma n zↄ̀bleri, mámbe mɛɛ̀gↄ̃ ma de sãanↄ dãa. Tó músu ke kpera mↄ̀ à sãa kũ̀ kpàsan, 35 mɛɛ̀ à gbɛsɛ mà lɛ́ mà sãa pì bↄ à lɛ́zĩ. Tó à ɛ̀aramazi, ben mɛɛ̀ à kũ a lɛ́tãnkaa mà lɛ́ mà dɛ. 36 Mapi n zↄ̀bleri, ma músu dɛ̀, ma kpera dɛ̀. Filisitini gɛfↄↄdee pì é gↄ̃ lán ń bà, zaakɛ èe Luda Wɛ̃̀ndide zĩ̀kpɛɛnↄ lɛ́ gwaa yãzi. 37 Dauda ɛ̀ara à bè: Lán Dii ma bↄ músu kↄ̃n kperao lɛ́zĩ nà, lɛn eé ma bↄ Filisitini pì ↄzĩ lɛ. Ben Solu bènɛ: Ǹ gá! Dii gↄ̃ kúnyo.

38 Solu a zĩ̀ka'uta dànɛ à a mↄ̀gotɛ̃ fùra kùnɛ, ben à a mↄ̀ uta dànɛ. 39 Dauda Solu fɛ̃ɛdaa lògo zĩ̀ka'uta pìa. Kɛ̀ à yↄ̃̀ táa, ben à fùa, zaakɛ èe kↄ̃ dↄ̃oro. Ben à bè Solunɛ: Mɛ́ fↄ̃ mà gá kↄ̃n pↄ́ pìnↄro, zaakɛ mɛ́ɛ kↄ̃ dↄ̃oro. Ben à pↄ́ pìnↄ bↄ̀ɛ píngi à kàɛ. 40 À a gò sɛ̀, ben à gàa à gbɛ̀ pↄ́rↄpↄrↄ sɛ̀ɛ swawɛɛn mɛ̀n sↄↄro à kà a sãdãbↄkↄn. Ben èe sↄ̃ↄ Filisitini pìzi, à a gbɛ̀mba kũna.

41 Ben Filisitini pì e sↄ̃ↄ Daudazi, à sɛngbangosɛri tɛ́ à aɛ. 42 Kɛ̀ à Dauda gwà, à è nɛ́ féte tɛ̃a maaamɛ, ben à dↄkɛ̀o 43 à bènɛ: Gbɛ̃ɛn ma ũ, ben n gbasa nɛ́ɛ mↄↄmazi kↄ̃n gòoↄ́? Ben à à kà kↄ̃n a tãa tↄ́o. 44 Ben à ɛ̀ara à bè: Ǹ sↄ̃mazi ǹ gwa, bãanↄ é n ble, nↄ̀bↄ pãsĩnↄ é n só. 45 Dauda bènɛ: Fɛ̃ɛda kↄ̃n sári lɛ̀ɛtɛgɛɛo kↄ̃n sári sↄ̃ntɛon nɛ́ɛ mↄↄo mazi. Mapi sↄ̃, Dii Zĩ̀kpɛde Isarailinↄ Luda kɛ̀ n à lɛ́ gwà yãzi tↄ́n mɛ́ɛ mↄↄonzi. 46 Dii é n namɛ ma ↄzĩ gbã̀a. Mɛ́ n dɛ mà n mì zↄ̃, mɛ́ Filisitini zĩ̀kpɛɛnↄ gɛ̀nↄ kpá bãanↄa kↄ̃n nↄ̀bↄ pãsĩnↄ gbã̀a aↄ̃ só, anduna é dↄ̃ kɛ̀ Ludaa kú kↄ̃n Isarailinↄ. 47 Gbɛ̃ kɛ̀ aↄ̃ kàkↄ̃a gura kɛ̀nↄ é dↄ̃ kɛ̀ Dii è zĩ̀ ble kↄ̃n fɛ̃ɛdaao ke kↄ̃n sárioro. Dii bé à zĩ̀ vĩ, eé a nawe wa ↄzĩ.

48 Gurↄↄ kɛ̀ Filisitini pì e sↄ̃ↄ Daudazi, à mↄ́ dakↄ̃rɛo, ben Dauda bàa lɛ̀ èe gaazi guu kɛ̀ weé zĩ̀ kán. 49 Ben à ↄ gɛ̃̀ a bↄ̀kↄn à gbɛ̀ bↄ̀ à dà a gbɛ̀mban. Kɛ̀ à Filisitini pì gbã̀o, ben à à pà a aɛa. Gbɛ̀ pì gɛ̃̀ à aɛwan, ben à lɛ̀ɛ a puua. 50 Gbɛ̀mban Dauda zĩ̀ blèo Filisitini pìa. À à pào a nɛ̀, baa fɛ̃ɛdaa à kũnaro. 51 Ben à bàa lɛ̀ à gàa à zɛ̀àla, à à fɛ̃ɛdaa wòto à kpɛ́n à à dɛ̀ à à mì zↄ̃̀o. Kɛ̀ Filisitininↄↄ è ń gↄ̃sagbãaa pì gà, ben aↄ̃ lɛ̀kↄ̃a. 52 Ben Isarailinↄ kↄ̃n Yudanↄ pɛ̀ɛńzi kↄ̃n wiiio, aↄ̃ pɛ̀ḿma ai Gata bĩilɛa kↄ̃n Ɛkɛrↄnu bĩilɛo. Gbɛ̃ kɛ̀ aↄ̃ ń dɛdɛnↄ gɛ̀nↄ gↄ̃̀ kaɛna sɛna zaa Saraimu zɛ́n ai Gata kↄ̃n Ɛkɛrↄnuo. 53 Kɛ̀ aↄ̃ sù kↄ̃n pɛna Filisitininↄao, ben aↄ̃ ń bùra pↄ́nↄ nàkↄ̃a wà gɛ̃̀tɛo. 54 Dauda Filisitini pì mì sɛ̀ à gàao Yerusalɛmu, à à gↄ̃kɛbↄnↄ kàɛ a kpɛ́n.

55 Gurↄↄ kɛ̀ Dauda e sↄ̃ↄ Filisitini pìzi, Solu e à gwaa, ben à a zĩ̀kpɛɛnↄ gbɛ̃nsi Abana là à bè: Dé nɛ́n nɛ́gↄ̃gbɛ̃ pì ũu? À wèàla à bè: Kí, kↄ̃n n kuunao, má dↄ̃ro. 56 Ben kína bè: Ǹ gbeka ǹ ma tó dé nɛ́n gↄ̃kparɛ pì ũ. 57 Kɛ̀ Dauda sù kↄ̃n Filisitini pì dɛnao, Abana à sɛ̀ à gàao Solu kiia, à Filisitini pì mì kũna. 58 Ben Solu à là à bè: Gↄ̃kparɛ, dé nɛ́n n ũu? À wèàla à bè: N zↄ̀bleri Yɛsɛ, Bɛtɛlɛmu gbɛ̃ nɛ́n ma ũ.