A Tinenge Deek ke
JON
Jon a aposol ixo geet ina ginigeet na bara nangadi nang tabo kos ina na, idi tabo nunu bara e Jisas ine a Mesaia (nang toxo tengen bara ‘e Krais’), a Barok kö God, me God irabo öro idi (pere e Jon 20:31). Ina na a unine ina ginigeet na. Me Jon ixo osen ömaras bere Jisas, ine runon niang a God, ixo wanot xarnang a tödi, ma ixo to ra xö pu xö öxöno lagunon tua osen e God ura re ire (14:7-11). Io nang, e Jon ixo tengen bara e Jisas a ‘Tinenge’, möxösa, a to re ine i töngösen ire ulamun e God (1:1-18). Jon ixo etöngösen köba bere Jisas ixo wanot bara irabo isik a to ulorexe rö idi xirip nang te nunu re ine (1:12; 3:16; 3:36; 5:24; 6:40; 10:28; 11:25) ma bere ine a Barok kö God ma kaim pe ngas kabise uruso xö God, Jisas kalik mon (5:19-27; 10:30; 11:27; 14:6).
1
1 Mesila xö urulo möxöbo lalaa xirip, a Tinenge ixoro kis. Ma ina Tinenge ixo kis arixe me God, ma ina Tinenge e God iat. 2 Ma ina Tinenge ixo kis arixe me God mesila xö urulo möxöbo lalaa xirip.
3 Me God ixo uxis abo lalaa xirip arixe ma ina Tinenge na. Ma kaim pe laa ixo wanot tataun. Kaim. God i ixo pet abo lalaa xirip arixe ma ina Tinenge. 4 Me ine iat mon a unine to runon. Ma ina to, ine a bibio nang irabo ömaras a nangadi. 5 A bibio i sili ömaras a ködö, ma lamun a ködö i kobo eöt tua tinuu wi ine.
6 Önga tödi ixo ot nang e God ixo tile ine, a esene e Jon. 7 Me ine ixo ot tua rengrengen ösu lamun ina bibio, bara a nangadi xirip nang tabo ölangen, idi tabo nunu xö ina bibio. 8 Me ine iat kaim bara ine ina bibio, inexalik, ixo ot tua rengrengen ösu lamun ina bibio. 9 Ma ina bibio runon i nangen, ma iri wanot ura xö öxöno lagunon ma ibo ömaras a nangadi xirip.
10 A Tinenge ixo kis sa xö öxöno lagunon. Ma i turunon bere God ixo uxis a öxöno lagunon min, ma lamun a nangadi belek möxö ina öxöno lagunon idi kaim kö werwere xulen ine. 11 Ine ixo ot kö xönö re ine iat, ma lamun a nangadi re ine kaim kö ömaraxen lo ine. 12 Lamun ewe me idi nang toxo ömaraxen lo ine, ixo ömaraxa lo idi bara idi tabo bung baroxorok ke God, idi iat nang ewe toxo nunu re ine. 13 Ma tokoxobo xikip idi xarnang a tatalien möxö nangadi mon, bara xö mamaa xö tödi. Lamun kaim. God iat ine a Tamana idi.
14 Ma ina Tinenge ixo ot xarnang a tödi, ma ixo to kaluluonin ire. Me ire tere pere a mariris se ine, a mariris möxö ina önga Barok söxöt mon meringan te Tamana. Ma ixo wöwö ma a abalamu mabo turunon te God.
15 Jon ixo etöngösen maras lamun ine, ma ixo wöwörö lölös bira, “Ine a öng nang e xo wöwörö ulamun ine nang e xo tengen bira, ‘Irabo ot melamu re e, ma lamun ine i taxin sik ke e, möxösa, ine ixoro kis nang bang kaim kö xikip e.’ ” 16 Ma i wöwö sik arixe ma abalamu ma ibo ratabaa sösöxöin ire xirip min. 17 Moses ixo isik abo warkurai ura re ire nang God ixo tabaa ine min. Ma lamun meringan te Jisas Krais a abalamu ma turunon ixo ot. 18 Kaim bang ke öng ixoro pere e God. Ma lamun God ine ma önga Barok kalik mon me ine iat e God, ma ibo xisixis kö lawana e Tamana. Me ine iat ixoro wöwörö maras sö ire ulamun ine.
Jon ixo öös bara ine a Mesaia
(Matiu 3.1-12; Mak 1.1-8; Luk 3.1-18)
19 Nang abo tödi raxin mee Judeia ringan Jerusalem toxo tile a uleng ne pris ma Liwai urso re Jon tua ose ine, bara a mangana tödi bule ine, io, Jon ixo tengen ömaras. 20 Ine kaim kö öös sua babalu idi, ma lamun ixo ömaras mon idi, ma ixo tengen bara, “Kaim bere e ina Mesaia.”
21 Me idi toxo ose öbaling ine, “Me ewe iat im nöngön? E Elaija nöngön?”
Me Jon ixo balu idi, “Kaim, kaim bere e Elaija.”
Me idi toxo ose öbaling ine, “Nöngön ina Propet nang ire te xixiset ulamun?”
Ine ixo balu öbaling idi, “Kawaim.”
22 Io, idi toxo tengen te ine, “Go, örö tengen im pe mem bere ewenene runon iat nöngön, rue mem pa töngösen idi nang toxo tile e mem ura. Örobo tengen bule im pe nöngön?”
23 Jon ixo balu idi mabo tinenge propet te Aisaia bira:
“E a inöno öng i xukup kö xönö tataun bara,
‘Mum morobo ötöxödös a ngas kö Orong.’ ”
24 Io, dauleng ne Parasi nang toxo tile, 25 idi toxo ose e Jon bira, “Ma nang bara kaim bere nöngön iang a Mesaia, bere e Elaija, bara ina Propet, ma ruasa nöngön u baptais a nangadi?”
26 Me Jon ixo balu idi bira, “E bo baptais idi arixe ma ari. Ma lamun öng kaluluonin e mum, mum kobo ösöxö ine. 27 Ine mon a öng nang irabo ot melamu re e, me e kobo töxödös eöt tua walwalas a kililöng kalik a nine sandel te ine.”
28 Inabo lalaa xirip ixo ot to Betani, kö lawana Ari Jordan, nang e Jon ixo baptais a nangadi xönan.
Jisas nang irabo kip tewe abo sasaban
29 Önga bung kabise im, Jon ixo pere e Jisas ixo önan pösöt ine ma ixo tengen, “Mum moro pere bang, ina na a bak kö sipsip nang e God ixo tile ura rua xikip tewe abo magingin saban kö nangadi möxö öxöno lagunon! 30 Ine mon a tödi nang e xo töngösen ulamunon bara, ‘A tödi irabo ot melamu re e, ma lamun ine i taxin sik ke e, möxösa, ine ixoro kis nang kaim bang kö xikip e.’ 31 Me e iat kaim kö ösöxö ine, ma lamun e wanot tua baptais e mum ma ari rua osen ömaras abo Israel ulamun ine.”
32 Io, Jon ixo isik a tinenge maras bira, “E xo pere a Tanono ixo wan su meriso xö watmaep xarnang a buno ma ixo kis lömö re ine. 33 E iat kaim kö ösöxö xulen bara ine iat mon nang irabo ot. Ma lamun ewe nang ixo tile e rua baptais a nangadi arixe ma ari ixo tengen bara, ‘A tödi nang örobo pere a Tanono irabo wan su ma irabo kis lömö xö ina tödi, ine iat mon niang irabo baptais arixe ma Töxödös ne Tanono.’ ” 34 Me Jon ixo tengen, “E xoro pere ine me e xo tengen ösu bara ine iat mon a Barok kö God.”
Dauleng toxo perexulen e Jisas bara ine a Mesaia
35 Io, xö bung melamu e Jon arixe ma nine bak ne ausu re ine, idiet toxo tuu sik baling kingan. 36 Ma nang ixo pere e Jisas ixo önan saxit, ixo tengen te idu, “Mu moro pere, ina na a bak kö sipsip nang e God ixo tile.”
37 Ma nang ina nine bak ne ausu toxo ölangen biringan, idu toxo muu e Jisas. 38 Jisas ixo talingen baling ma ixo pere idu toxo mumuu re ine. Ma ixo ose idu, “Mu mo mamaa lamun a sa?”
Idu toxo balu ine ma toxo tengen, “Rabai, nöngön u xisixis ule?” (Ma a unine ina tinenge ‘Rabai’ bara ‘Tene Ausu’).
39 Me Jisas ixo balu, “Mu moro miang me mu morobo pere.”
Io, idu toxo muu ine ma toxo pere a xönö ixo xisixis e, ma ixoro lörörö im kö nit ne axana bung kö aien. Io, idu toxo kis arixe me ine xö ina bung kö aien.
40 Io, Endru a tönö e Saimon Pita, ine a öng ke idu nang toxo ölangen a lasa e Jon ixo tengen, io, idu toxo muu lo e Jisas. 41 A laa nang e Endru ixo arun ta wewet ixo parasiwin a tönö nang e Saimon, ma ixo tengen te ine, “Maa mere pere lo a Mesaia.” (Ma tabo puxus ina tinenge na bara ine mon a ‘Krais’). 42 Ma ixo lamus e Saimon urungan te Jisas.
Jisas ixo pere ine ma ixo tengen, “Nöngön e Saimon, a barok ke Jon. Tabo rengrengen nöngön me Kepas” (niang, toxo puxus bere, e Pita).
Pilip me Natanael toxo perexulen e Jisas bara ine a Mesaia
43 Io, xö bung melamu, Jisas ixo mamaa ra nuan uruso Galili. Ixo pere lo e Pilip ma ixo tengen tö ine, “Muu e.”
44 Pilip ine meri Betsaida xö lagunon nang e Endru me Pita tobo xisixis bölök ee. 45 Pilip ixo ot pösöt e Natanael ma ixo tengen te ine, “Mem mere pere lo a öng nang e Moses ixo gegeet ulamunon kölöme xö Buk möxö Warkurai ma nang bölök abo propet toxo gegeet ulamun ine. E Jisas meriso Nasaret, a barok ke Josep.”
46 Me Natanael ixo ose, “Kaim pe lalaa deek i eöt tua nuanot meriso Nasaret!”
Io, Pilip ixo tengen, “Örö miang ma örö pere.”
47 Ma nang e Jisas ixo pere e Natanael ixo önan pösöt ine, ixo tenge ulamun ine bara, “Turunon saxit, ina tödi a Israel tunon, ma i koxobo ösöxö ra röxröxö.”
48 Me Natanael ixo ose ine, “U ösöxö e bule?”
Jisas ixo balu ine ma ixo tengen, “E xo arun ta werwere nöngön kö pu xö uno löwö, melamu re Pilip pa xukuwe nöngön.”
49 Io, Natanael ixo tengen, “Rabai, nöngön a Barok ke God. Me nöngön a King köbo Israel.”
50 Me Jisas ixo balu ma ixo tengen, “U nunu, möxösa, e tengen te nöngön bara e xo pere nöngön kö pu xö uno löwö. Inexalik nöngön örobo pere rebo lalaa nang i taxin saxit te nanga.” 51 Io, ine ixo tengen öbaling, “E tengen a turunon te nöngön, mum morobo pere a watmaep irabo tamasawang, mabo angelo re God tabo önan kaa ma tabo önan su xö Barok kö Tödi.”