Suha'na Paulus lako Filemon
Bätäna issinna
Inde suha' natuli' Paulus napakatuam Filemon. Indo Filemon mesa to Sahani kaissangam anna angga'na ma'jumaa' dio Kolose. Deem sabua'na isanga Onesimus. Sapo' indo Onesimus le'ba' lahi umpellei Filemon. Sapo' maaka amo susi anna malai siissangam Paulus wattunna illaam tahungkum Paulus. Iya napaissannim Paulus lalam kasalamasam lambi' matappa'um Onesimus.
Inde Suha'na Paulus lako Filemon mesa pelauanna anna mala sikapiai sule Onesimus sabua'na, anu' nasuam Paulus ma'pasule lako. Napelau si'da-si'da Paulus lako Filemon anna malai untahima manappa sule Onesimus. Anna tä' angga mandi la naampunni anna natahima sule mendadi sabua'na, sapo' la natahimapi duka' mendadi solasubunna illaam kamatappasam lako Kristus.
Lesoanna issinna
1. Kada passu'bä' (1:1-3)
2. Katilallasanna Paulus aka umpekaheba pa'pogausanna Filemon (1:4-7)
3. Pelauanna Paulus lako Filemon diona Onesimus (1:8-22)
4. Kada salama' (1:23-25)
1
1 Inde suha' buttu di kao Paulus to ditahungkum aka untuhu'ä' Kristus Yesus. Duka' buttu di solasubunta Timotius,
lu lako Filemon sababangangki to kipakamaja 2 anna lako duka' Apfia solasubungki baine anna Arkhipus sababangangki sihhapam sohodadu illaam panibiam, sola issinna jumaa' to si ma'hempum illaam banuammu.
3 Handandanni Puang Allataala Ambetaa' anna Yesus Kristus Debatanta la untamba'koa' anna namana' kamasakkeam sola kamasannangam.
Katilallasanna Paulus aka umpekaheba pa'pogausanna Filemon
4-7
4 Ma'sambajam oä' too kupa'sambajangam ongko anna ma'kuhhu' sumanga'ä' längäm Puang Allataala to kupenombai, 5 aka kupekaheba diua matoto' liu kamatappasammu lako Puang Yesus anna pa'kamasemu lako ingganna to napasähä' Puang Allataala mendadi umma'na. 6 Ma'sambajannä' anna mala kasilombunganta illaam kamatappasam lako Kristus la taongei tuttuam ussi'dim anna ungkaleso ingganna kamapiaam talambi' aka sakalebungkia' Kristus. 7 O solasubungku Filemon, indo pa'kamasemu lako solata to matappa' iam too nasuhum kasalle anna tiala inabangku, aka indo pa'palakoam mapiammu umpatipakahanga ingganna to napasähä' Puang Allataala.
Pelauanna Paulus lako Filemon diona Onesimus
8-22
8 Dadi aka mesaä' duka' suhona Kristus nasuhum bahaniä' umpahentako indo la pahallunna umpogau'. 9 Sapo' aka indo si pa'kamasemu, lambi' angga hamä' melau matim. Aka kao, Paulus, matuamä' anna temo mahassannä' ditahungkum aka untuhu'ä' Kristus Yesus, 10 suleä' umbaba pelauangku matim diona änä'ku illaam Kristus, aka mendadimä' ambe di ada'na wattungku illaam inde tahungkum, aka kao umpaissannii lalam kasalamasam. Inde kuuaam änä'ku, Onesimus.* Onesimus: kalembasanna, keguna. 11 Indo yolona mala diua tä' deem gunana tama kalemu. Sapo' temo kegunam, tä' anggam lu tama kalemu, sapo' duka' tama kaleku.
12 Inde Onesimus pa'pakamajangku, kusua ma'pasule matim. 13 Setonganna maelo' punalaä' la umpaindei anna mala nabala'ko umbaliiä', aka illaam liupä' tahungkum temo kahana umbebehannä' Kaheba Katilallasam. 14 Sapo' moka ohä' umpalako bäbäi, ke tä'i muua. Aka ia too mesa pa'pogausam mapia ke umpalakoi, tä'ko la dipassa sapo' la mengkalao illaam unä' penabammu.
15 Umbai' iam tia anna dipasisähä' salangkoa' säpäi' anna mala sola liungkoa' pole' sule lako salako-lakona ke ma'pasulem matim. 16 Tä' angga mandi la umposabua', sapo' la umpakamaja susi solasubummu. Aka kupateemmi kao, la'bi-la'binna iko la umpakamäjjäi aka padakoa' bassim ma'hupatau anna solasubummu illaam sanganna Debata.
17 Dadi maka' muangga'ä' sababangammu, iya la untahima manappa too Onesimus, umba susi untahimaä'. 18 Anna maka' deem kasalaanna battu haka indanna matim, kao la umpengngitai tä' la umpabala'i. 19 Aka kaom too inde Paulus ma'kalem limangku untuli'i inde kuua: kao la umpendudum asanni ia too. Setonganna tä'ungko pahallu kupakilala kuua deem katondoammu mai indo kupaitaiko lalam kasalamasam nasuhum ullambi'ko katuboam bakahu. 20 O solasubungku, kahana solasubummaki' illaam sanganna Debata, iya la umpalako pa'elo'ku untahima manappako Onesimus. Susim too la umpatialannä' inabangku aka mesangkia' illaam Kristus.
21 Kutulisangko inde suha' sola ponno pahhannuam la umpalako indo pelauangku. Inna kuissammi tia kuua la umpogau' la'bi puha ia anna indo pelauangku. 22 Anna mesa polepi pelauangku: la umpatokaannä' tambim illaam banuammu aka kuhannuam la natahima sambajammua' Puang Allataala lambi' la malaä' nalappasam illaam mai inde tahungkum anna malaä' matim.
Kada salama'
23-25
23 Salama'na Epafras matim, solaku ditahungkum aka untuhu'i Kristus Yesus. 24 Kupalandasam duka' salama'na sababangangku Markus, Aristarkhus, Demas, anna Lukas.
25 Handandanni Debatanta Yesus Kristus untamba'koa'.
Padam too.