PƆLƱ KALATA'N
M'Ɔ LILƖ MƱA HƐLƐLƖ
NWANLƖN TESALONINKI
ASƆNƖN MMA'N-MƆ'N
M'ɔ wɔ nun'n
Anɩn, Tesaloninki tɩ Masedʋanɩn mân nɩn anun ɛlɔ kulo kpili'n kʋn. Silivɩn mɔ bɛ fɛlɛ yɩ́ biekun Silasɩ'n, nʋn Timote yɛ̂ bɛ bʋkalɩ Pɔlʋ maan ɔ bɔlɩ ɛlɔ asɔnɩn nɩn ɔ. Nan kɛmɔ Zufʋ'n-mɔ totua yɩ́ atɩn'n, Pɔlʋ a njɛ man Tesaloninki ɛbɛlɛ (Junman 17). Ɔ kpatili ɔ fi Masedʋanɩn mân nɩn anun ɔ hɔlɩ Akayi mân nɩn anun. Nan m'ɔ fi Masedʋanɩn mân nɩn anun hɔlɩ'n, ɔ sʋanlɩn Timote Tesaloninki ɛlɔ kɛ ɔ hɔ́ nɩ́an asɔnɩn mma'n-mɔ abʋsʋ sɛ bɛ yacili man bɛ́ dedi'n bɛ tɩlɩ man wɔ ahʋlʋwa'n mɔ bɛ lɛ kele bɛ́ nɩn anwʋn an. Mɔ Timote hɔlɩ walɩ m'ɔ bɔlɩ amannɩɛ fɛ helelɩ Pɔlʋ'n, yɩ́ lʋa cɩcɩlɩ nán ɔ'a hɛlɛ kalata ɛhɩ ɔ'a nwan bɛ́. Kalata nɩn anun, ɔ'a nwun Nyanmɩan anwʋn ye, ɛsɛ ɔ'a wowula bɛ́ anwʋnsɛlɛ kɛ bɛ tíla bɛ́ dedi nɩn anun bɛ hɔ́ bɛ́ nyunnun.
Kalata nɩn ati 1-3, Pɔlʋ lɛ kacɩ kɛ ɔ kpɩnlɩn lili junman'n bɛ́ afian ɛlɔ'n. Yɛ̂ ɔ di fɛ kɛ sunnzun mɔ bɛ lɛ nwun yalɛ, bɛ le bɛ́ dedi nɩn anun kpolo. Ɔ kulo kɛ ɔ nwun bɛ́ nwʋn biekun. Kalata nɩn ati 4.1-12, Pɔlʋ lɛ kacɩ bɛ́ ngehele'n m'ɔ helelɩ bɛ́ wɔ ɛnanndɩɛ kpa nɩn anwʋn'n cɩnnjɩn, bɛ síe bɛ́ nwʋn ye wɔ ajʋamannɩn ngacile kʋalaa anwʋn. Kalata nɩn ati (4.13-5.11), Pɔlʋ lɛ kan yɛ́ Mɩn Zozi Kilisi ɛwalɛ'n mɔ ɔ 'sa ba nɩn ɛjɔlɛ. Kalata nɩn agualɩɛ nun, Pɔlʋ lɛ tu bɛ́ fʋɔ ɛsɛ ɔ lɛ yeyila bɛ́.
1
Ahɩn ebisa
1 Mɩ́n Pɔlʋ, mɩ́n nʋn Silivɩn nʋn Timote yɛ̂ yɛ lɛ kɛlɛ kalata ɛhɩ yɛ nwan ɛmɔ Tesaloninki asɔnɩn mma'n-mɔ ɔ. Ɛmɔ mɔ bɛ nʋn yɛ́ Sɩ Nyanmɩan nʋn yɛ́ Mɩn Zozi Kilisi a yɔ kʋn'n, yɛ 'bisa ɛmɔ ahɩn.
Nyanmɩan nwún ɛmɔ anwʋn anwunnvoe, ɛsɛ ɔ cɩ́cɩ ɛmɔ alʋa.
Asɩna
2 Yɛ da Nyanmɩan asɩ cɩan daa wɔ ɛmɔ dunman nun, ɛsɛ yɛ sɛlɛ Nyanmɩan Kpili cɩan daa yɛ man ɛmɔ. 3 Nyanmɩan m'ɔ tɩ yɛ́ Sɩ nɩn anyunnun, tɛmʋn biala yɛ́ ti kacɩ ɛmɔ nyɔlɩɛ'n m'ɔ kele kɛ ɛmɔ le dedi, ɛmɔ kulo bɛ́ nwʋn, ɛsɛ yɛ́ Mɩn Zozi Kilisi ɛwalɛ cɩan nɩn anwʋn anyɩndasʋɛ mɔ ɛmɔ le yɩ́'n, ɔ tɩ man nzɛmɩndɛ. 4 Anianman-mɔ, yɛ sɩ kɛ Nyanmɩan a hulo ɛmɔ, ɔ'a nɩan menian'n-mɔ anun ɔ'a kpa ɛmɔ maan b'a yɔ yɩ́ dɩɛ. 5 Ɔ sanlɩn kɛ nán yɛ́ nʋan mgban nɩn ala yɛ̂ yɛ falɩ yɛ bɔlɩ Ɛjɔlɛkpa'n yɛ helelɩ ɛmɔ ɔ. Nan Wawɛ Nwannzan-nwannzan'n jinlanlɩn yɛ́ nzin maan yɛ bɔlɩ yɩ́ tunmin sʋ kʋsʋ yɛ helelɩ ɛmɔ. Ɔ manlɩn ɛmɔ nwunlin yɩ́ fɔ́ʋ́n kʋsʋ kpa kɛ Ɛjɔlɛkpa sɔ'n tɩ ananhɔlɛ. Kɛ ɔ kɔ yɔ nán ɛmɔ a kpasi'n, ɛmɔ nwunlin kɛ yɛ kpɩnlɩn yɛ nʋn ɛmɔ tanlanlɩn'n. 6 Ɛmɔ a nɩan yɛ́ nʋn yɛ́ Mɩn asɩtanlan sɔ nɩn asʋ. Ɛhɩka ati yɛ̂ bɛ helelɩ ɛmɔ ahʋlʋwa kpa tɛmʋn mɔ ɛmɔ lelɩ Nyanmɩan Anʋan Ɛjɔlɛ'n bɛ lili nɩn ɔ. Nan kʋsʋ Wawɛ Nwannzan-nwannzan nɩn a man ɛmɔ le fɛ elie. 7 Ɔ man Masedʋanɩn nʋn Akayi mân nɩn anun, sɛ bɛ 'kan bɛ́ kʋalaa mɔ b'a le Zozi Kilisi b'a li nɩn ɛjɔlɛ a, bɛ bɔ ɛmɔ dunman. 8 Ɔ sanlɩn kɛ Nyanmɩan Anʋan Ɛjɔlɛ'n tɛtɛlɩ ɛmɔ Masedʋanɩn mân nɩn anun ɔ nʋn Akayi mân nɩn anun. Ɔ'a nga man ɛbɛlɛ ala, nan mân'n lɩka kʋalaatin, bɛ bɔ dedi'n mɔ ɛmɔ le yɩ́ wɔ Nyanmɩan anun nɩn anwʋn ɛjɔlɛ. Yɩ́ ti, yɛ́ muonun yɛ ngan man ɛmɔ dedi nɩn anwʋn ɛjɔlɛ kʋ́n. 9 Kɛ ɛmɔ kpɩnlɩn sɔlɩ yɛ́ nun mɛlɛ mɔ yɛ hɔlɩ ɛmɔ ɛlɔ, ɔ nʋn kɛ ɛmɔ kpɩnlɩn yɔlɩ bɛ yacili amʋan'n-mɔ bɛ gualɩ bɛ falɩ bɛ́ nwʋn bɛ manlɩn Tɩasɩfʋɛ Nyanmɩan'n m'ɔ tɩ ananhɔlɛ'n nán b'a sʋ yɩ́'n, menian'n-mɔ kʋalaa kan yɩ́ nwʋn ɛjɔlɛ. 10 Ɛsɛ bɛ kan kɛ ɛmɔ lɛ nwʋnndɛ kɛ Nyanmɩan Awa Zozi m'ɔ man ɔ fi ewue nun ɔ'a tinnge'n, ɔ fi nyanmɩansʋ ɔ bála. Afɩ, yɩ́ dein yɛ̂ ɔ de yɛ́ ti nán Nyanmɩan sikpɛ'n m'ɔ lɛ ba nɩn a ngun man yɛ́ ɔ.