Pol Uqa Jaqec Je Oso
Efesas Tamanec Jaqiaden
Aqunec Je
Pol uqa jaqec je i jaqen saenna uqa Rom ono uqana jona gihacdoc bilen. (Eu Aposel 28.16-31 feiga.) Jaqec je i uqana gug eu odi. Anut uqa ceteteh cunug ifanen eu saona gunnadec mahanadecca eu Kraisca gabanadeceb Krais uqa cunugnu ilo biligiannu gale dona. (Eu 1.10 feiga.) Odimei Anut uqa uqana dana cajaca age wele agena silailna cal mec biloloig eu age qila Kraisca gabanadeceb cebac bilegina eunu cisdoqagannu gale dona. (Eu 2.4-6 feiga.) Odimei Kristen cunug age wawaga osol biluqagannu gale dona. (Eu 2.19-22 feiga.)
Jaqec je ina dac 1na Pol uqa Anutna eeladec uum adec eunu je mati jaqena. Eeladec uum adec eu odi. Anut uqa Juda dana qeeca, Juda danaca gami nesili ehadeceb age cunug Kraisnu wawaga meleeceb gabandumeig sihunegul osol bilegina. Eu Jisasna cabi. Anut uqa Kraisna cal mecna uqana dana cajaca ceseli fajaden. Odimei uqa Kis Gun aden. Kis Gun eu ceteh me bahic Anut uqa uqana dana cajaca adigiannu mugumuga mec je maden eu cunug oqagannu gihin adec. (Eu 1.14 feiga.) Dac 2na Pol uqa Kristen cunug age Kraisca gabandu bilegina, eunu age wawaga osol bilimeig Anutna kobol cunug toodu odoqagannu jaqena.
Jaqec ina Pol uqa Kristen dana cajaca age Kraisca gabanadec bilegina eunuca, age sihunegul osol bilegina eunuca camasac ihacadecnu galolo je mati madena. Uqa Anutna dana cajaca age deweg osol bilegina, odocob Krais uqa deweg eu uqana ilo eunu galolo je oso madena. (Eu 4.1-16 feiga.) Odimei uqa Anutna dana cajaca age jo osol bilegina, odocob Krais uqa jo eu uqana nah man nohinoh eunu galolo je oso madena. (Eu 2.19-22 feiga.) Odimei uqa Anutna dana cajaca age aideg oso, odocob Krais uqa aideg eu uqana gemug eunu galolo je oso madena. (Eu 5.22-32 feiga.) Jaqec je ina ege ceteteh me bahic Anut uqa uqana dana cajaca odadecnu gale dona eu fi cuhadoqona.
Je Dunuhnu Dado Mec
1. Feele adec je (1.1-2)
2. Anutna cisdoc: Krais uqa kobolkobolca, uqa ilo bilina (1.3-14)
3. Pol uqa Kristen age Anutna cisdocca, uqana gagadic odocca eunu du cuhadoqagannu inondona (1.15-23)
4. Anut uqana cisdoc toodona eu odi (dac 2-3)
A. Anut uqa uqana eeladec uum adecna uqana dana cajaca cahahaadena (2.1-10)
B. Krais uqa Juda danaca Juda dana qee eundecca uqana na babalecna tanawaden (2.11-18)
C. Juda danaca Juda dana qee eundecca age qila sihunegul osol bilegina (2.19-22)
D. Anut uqa je jahunec camasac men eu Kraisna tamanecna Juda dana qee eundec ageha Anut huqanehul bilegina (3.1-13)
E. Pol Anut uqa uqana gagadic odoc Kristen adeceb age Anutna Kisna wawaga gagadic tawigiannu inondona (3.14-21)
5. Krais tamanec adi wawaga osol biluqagan (4.1-6.20)
A. Age Kis Gunna cisdoc osol biluqagan (4.1-6)
B. Age dana cajaca wasimeig Kraiswe caloqagan (4.7-16)
C. Kristen age agena cisdocca, wawaga madecca waticduadeceb haun ibuldugian (4.17-5.20)
D. Age cotogail agena je toodocobtoodocoboigale (5.21-6.9)
1. Krais binan sulecnu age cotogail agena je toodocobtoodocoboigale (5.21)
2. Gemugail aidagailca adi osol biluqagan (5.22-33)
3. Mel simca age anagail memegailca adi osol biluqagan (6.1-4)
4. Begabeg meh cabi danaca agena cofadec danaca adi osol biluqagan (6.5-9)
E. Seten cadecnu age Anutna gagadic odoc umei uqa uenna tatawi gagadic meigale (6.10-20)
6. Cit qoc je: Feele adecca eeladec jeca (6.21-24)
1
1 Ija Pol, ija Krais Jisasna aposel. Anut uqana cisdocna ija Krais Jisasna aposel miten. Ija Anutna dana cajaca qagoc age Efesas bilegina, age Krais Jisasna jic tutuc cobogina eu age je i jaqiadigina. 2 Memige Anutca Jisas Krais Tibudca alena eelgec uum igecca malol bilecca adesiale.
Anut uqa ege eeldoc cunug Kraisna igen
3 Anut ege Kraisca gabangi biluquna eunu eelgen, uqa eeldoc cunug eu saona gunnadec ege dolonige cesuldocnu igen. Eunu ege egena Tibud Jisas Krais uqa Memeg Anut binan suluqale! 4 Anut maha qee ifanec ninijen uqa ege uqana bilitoqannu Kraisca gabandoc bilec euna wele nesili ehigen. Uqa ege gun bilecnuca, cahuldocca qee uqa amegna bileqannu nesili ehigen. Anut uqa nalunige menanu 5 uqa casac wele odi cisdon, uqa Jisas Krais umna ibulgeceb ege uqa melahul bileqannu ec cisdon. Ceteh eu uqana cisdoc gale docca. 6 Anut uqana eelgec uum igec eu binanca bahic! Uqa Melah uqa nalug mena eu ege uqaca gabandu biluquna eunu Anut eelgec uum igec bagolwe igen. Eunu ege Anut binan suluqale!
7 Anutna eelgec uum igec eu ben bahic! Krais ege ceseli fajigecnu cal men. Uqa egena silail cagasigecnu uqa golac basecdocob nen. Eunu ege Kraisca gabandu biluqunanu ege besigec biluquna. 8 Anut uqa uum igec eu geh bahic igen! Anut uqa uqana doc meca, uqana cisdoc silec cunugca eu igen. 9 Anut uqa ceteh odigiannu Krais cabi ocna odigian ec wele cisdon. Euqa uqana cisdoc eu jahuni bilen. Odimei qila Anut uqa uqana gale doc toodumei uqana cisdoc jahunec eu ihacgeceb dom. 10 Uqana ceteh eu odigiannu cisdon eu odi. Uqa ceteteh cunug ifanen eu dado mumudeb lili saen uqa wele gadac menna uqa ceteteh cunug, eu saona gunnadec mahanadecca, Kraisca gabandocob Krais uqa cunugnu ilo biligian ec cisdon.
11 Anut uqa uqana cisdoc gale docca toodona, eu uqa ceteh oso odocnu cisdona euha uqa odocob calena. Odimei wele bahic gug qoc saenna uqa uqana gale docna ege Juda uqa ege Kraisca gabandoqannuca, ege uqana dana cajaca bileqannuca nesili ehigen. 12 Ege Juda, ege aquniadec Kraisnu wawige meleeceb toodom eu ege uqa binan fulacdocca, gagadic odocca sulecnu nesili ehigen.
13 Ageha age mele je wele dah mein, eu me je euna Anut cahahaaden. Odocob age Kraisnu wawaga meleeceb Anut age Kraisca gabanadimei uqana je hahun wele maden eu toodumei Kis Gun aden, Kis Gun eu Anut uqa uqana dana cajaca ceteh me adigian ec maden eu ege oqan uqana sisi mec. 14 Ege ageca Kis Gun wele om. Eunu ege doqona, hibna egeha ceteh me bahic Anut uqa uqana dana cajaca adigiannu mugumuga mec je maden eu cunug oqan. Ege Anut uqa ege cahahageceb ceteh me bahic eu umeb ege uqaca besigec bileqannu sumudi biluquna. Eunu uqa binan suluqale!
Pol uqa Anut Efesas tamanec doc silecca adigiannu inondon
15 Ageha me je dah mimeig Kraisnu wawaga meleeceb Kis Gun oin gug inu ija agenu inondugina. Odocob ija age Jisas Tibudnu wawaga meleecca age Anutna dana cajaca qagoc cunugnu nalunuga mecca ec dah mem. 16 Eunu ija agenu Anut gaid hetaga dugina. Ija ijana inondocna agenu gaid cisdugina. 17 Ija agenu Jisas Krais egena Tibudna Anut, uqa Memige fulacdoc benca gagadic odocca, odi inondugina. Anut uqa doc silecca cisdoc fogo adecca adeiale, odocob age uqanu du cuhadoqagannu ec inondugina. 18 Ija Anut agena cisdoc fogo duadeceb eu age fulacdocca foqagannu gale tena. Eunu age uqana dana cajaca bilegina eu age cel ceteh me age ocnu utaaden eunu sumudi bilegina ec doqagan. Odocob age Anutna dana cajaca qagu bilegina eu cehewanaga me bahic hibna adigian ec mugumuga mec je maden eunu doqagan. 19 Odocob ege Anutnu wawige meleena uqana gagadic odoc euna cesulgena eu gagadic bahic ec doqagan. Anutna gagadic odoc ege sanijecnu ihoc qee. Uqa uqana cabi eu ege uqana gagadic odocna oqona. 20 Anut uqa uqana gagadic odoc euna wele uqana cabi eu Kraisna u hedon. Uqa Krais cal mecnadec tulidumei saona gunna ehudi ti uqa eben meulana isec mudeceb bilen saen euna uqa uqana cabi u hedon. 21 Odocob Krais uqa ohis bahic bilia. Uqa king bilec cunugca, ilo bilec cunugca, gagadic odoc cunugca, cofadec cunugca eu saona mahanaca bilegina wooladec ohis bilia. Odocob uqa dana qila saen ina ijanagaca bilegina isi saen hibna ijanagaca biluqagan eu cunug wooladec bilia. 22 Anut uqa ceteteh cunug Krais jaih bisalu men. Odimei uqa tamanec cunugnu ceteteh cunug agena ilo bahic biligiannu muden. 23 Tamanec eu Krais deweg. Krais uqa ceteteh cunug am beceb asaneginawe eu odi tamanec eu Krais am beceb asanen.