1 Riꞌin in Pablo, in utaqoꞌn ri Dios. Na e ta kꞌu juna tikawex taqayom lo we, na e ta juna achi kojoyom we; ma e ri Qanimajawal Jesucristo y e ri Qaqaw Dios, ri Jun xukꞌastajisaj lo Rukꞌajol chikixoꞌl ri ekaminaq. 2 Junam kꞌu kukꞌ konoje ri hermanos e kꞌo wara wukꞌ, kantzꞌibꞌaj pan wa carta chike riglesias e kꞌo che ri luwar re Galacia. 3 Kꞌulu kꞌu alaq ri unimal rutzil kꞌuꞌxaj y ri utzil chomal re ri Qaqaw Dios y re ri Qanimajawal Jesucristo, 4 ri xuya ribꞌ pa kamik ruma ri qamak. Xuꞌan waꞌ ma e xraj riꞌ ri Qaqaw Dios che chaꞌ jelaꞌ kojresaj lo che ronoje ri na utz taj kakiꞌan ri winaq chupa taq wa qꞌij oj kꞌo wi. 5 Qayaka kꞌu uqꞌij ri Qaqaw Dios waqꞌij ora y chiqawach apanoq na jinta chi utaqexik. Amén.

6 E riꞌin lik kakam wanimaꞌ che ma na jampatana xya kan alaq ri Dios, ri xusikꞌij alaq ruma ri unimal rutzil ukꞌuꞌx ri Cristo, yey ekꞌu woꞌora e taqem alaq jun kꞌutunik junwi chwa ri Utzilaj Tzij re ri Cristo. 7 Waꞌ na e ta keꞌelawi kꞌo juna chik Utzilaj Tzij puwi ri Cristo. Pero e kꞌo jujun xa kakisachisaj naꞌoj alaq y e kakaj kakijalkꞌatij ri Utzilaj Tzij re ri Cristo. 8 Tobꞌ ne junoq chiqe riꞌoj o juna ángel re chilaꞌ chikaj kutzijoj juna chik kꞌutunik che alaq junwi chwa ri Utzilaj Tzij qatzijom chi riꞌoj che alaq, peta kꞌu riꞌ ri qꞌatbꞌal tzij re ri Dios puwiꞌ. 9 Jelaꞌ pachaꞌ ri nubꞌiꞌim loq, kambꞌiꞌij tanchi woꞌora: We kꞌo junoq kutzijoj juna chik kꞌutunik junwi chwa ri Utzilaj Tzij tom chi alaq, peta kꞌu riꞌ ri qꞌatbꞌal tzij re ri Dios puwiꞌ.

10 ¿E nebꞌa kantzukuj riꞌin ri yakbꞌal nuqꞌij chikiwach ri tikawex o e kuaj kanꞌan janipa ri karaj ri Dios? ¿E nebꞌa kuaj riꞌin kinel chi utz chikiwach ri tikawex? We ta riꞌin xa e kantzukuj ri kayak nuqꞌij kuma ri tikawex, riꞌ na in ta saqil aj chak re ri Cristo.

11 Chetaꞌmaj kꞌu alaq hermanos: Ri Utzilaj Tzij kantzijoj riꞌin na xa ta uchꞌaꞌtem juna achi, 12 na e ta juna achi xyaꞌw chwe y na che tane juna achi xinmaj wi waꞌ; ma e ri Qanimajawal Jesucristo xqꞌalajisan chwe.

13 Tom chi kꞌu alaq puwi ri nubꞌinik nusilabꞌik ojertan echiriꞌ nutaqem taq ri kojobꞌal ke raj judiꞌabꞌ; rukꞌ kꞌax xebꞌenuternabꞌej rutinamit ri Dios ri kikojom rubꞌiꞌ ri Cristo y lik xintij uqꞌij kansach kiwach konoje. 14 Chikixoꞌl ri wachbꞌiꞌil junam oj kꞌiyinaq loq, in ri lik xinya wibꞌ che utaqexik taq ri kojobꞌal ke kan ri qatiꞌ-qamam ri oj aj judiꞌabꞌ. 15 Na rukꞌ ta kꞌu riꞌ, ri Dios xinuchaꞌ lo riꞌin echiriꞌ kꞌamajaꞌ ne kinalaxik, xinusikꞌij ruma ri unimal rutzil ukꞌuꞌx 16 y xuqꞌalajisaj uwach Rukꞌajol chwe chaꞌ e kantzijoj ri Utzilaj Tzij chike ri na e ta aj Israel. Yey puwi waꞌ na xintzꞌonoj tane nunaꞌoj che juna tikawex.

17 Na xinꞌek tane Jerusalem re kebꞌeꞌnuwila ri ebꞌuꞌanom taqoꞌn nabꞌe chinuwa riꞌin. Ri xinꞌano, e xinꞌek Arabia y kꞌa tekꞌuchiriꞌ xintzelej tanchi Damasco. 18 Xikꞌow na kꞌu oxibꞌ junabꞌ echiriꞌ xintzelej Jerusalem re kanwetaꞌmaj uwach ri Pedro y xinkꞌojiꞌ chilaꞌ rukꞌ woꞌlajuj qꞌij. 19 Yey na xinwil ta kiwach ri jujun chik e taqoꞌn; xew xinwil uwach ri Jacobo, ruchaqꞌ ri Qanimajawal. 20 Chwach kꞌu ri Dios kambꞌiꞌij che alaq: Wa kantzꞌibꞌaj pan che alaq lik qatzij, na raqꞌubꞌal taj. 21 Tekꞌuchiriꞌ xinꞌek tanchi che taq ri luwar re Siria y re Cilicia. 22 Chupa taq laꞌ la qꞌij, ri hermanos re riglesias e kꞌo Judea kꞌamajaꞌ ne kaketaꞌmaj nuwach riꞌin, 23 xew kitom kabꞌiꞌxik: «E rachi xojuternabꞌej rukꞌ kꞌax ruma qakojom rubꞌiꞌ ri Qanimajawal, woꞌora katajin che utzijoxik ri Utzilaj Tzij, yey e ne rire ri lik xraj kusachisaj uwach waꞌ.» 24 Wuma kꞌu riꞌin ri hermanos e aj Judea lik xkiyak uqꞌij ri Dios.