5
Jisas hiykwe uwr prueyn peik non se hu-sow Betesda mon mon popriy kow
1 Enekwei sohiy so meyki mon hokwe sawk Jisas hiykwe Jerusalem mon liau, Juda mo ayay lon-waw-waw a enekwei se. 2 Om Jerusalem mon kokwe hu-sow aiopey hay kamon senkin lwak. Hu-sow sohokwe yerki-wouk aiopey hay kamon so ohriar mon hnuawon. Yerki-wouk sohokwe senkin mowie, “Sipsip mo yerki-wouk.” Hu-sow sohiy so uru hokwe Hibru mo ok kokwe senkin mowie, “Betesda”. Hu-sow sohiy so ki-someik hokwe a-aynou mokwe sankaw lwak, iha sirom. 3-4 Sawk a-aynou iha sirom somokwe, uwrsa kraiar peik non homkwe serey nak-wak. Seyr uwr nene kopyo non, sune-iha piap non, seyr uwr oiow lomposyay non, homkwe seyr serey mon-aw nak-wak. 5 Sawk uwr prueyn peik aiopey hay non hiykwe seyr serey nak-iawon wayr. Hyo peik kokwe 38 yia, sankaw nak-iawon wayr. 6 Jisas hiy uwr peik ma nak-iawon sehe lira menkin, hiy mo po nonkway se, uwr sohokwe mo peik enekwei meipey hay po nak-iawon wayr. Sa Jisas hiykwe hye sehe kiy-mesopok, “Ara, hunkwe yaprue ma-lwak e pankaw nanpanan o?”
7 Uwr peik non sohokwe sawk Jisas so ok ke senkin lonuayk me, “Hakamay, enekwei hu-sow hiy hu-par loksian mokwe, uwr prueyn hane hu mon swakeyn hawr kow pey. Ha wakeyn hawr e mon liok ankin, sawk uwr har homkwaw akre akre wakeyn hawr.”
8 Jisas hiykwe sawk hye senkin mekow, “Hunkwe loksian nok, hno mat ke lway nok nok, nakey.” * Mat 9:6 9 Peypey pa, uwr sohiy so owh hokwe yaprue ma-lousne. Hiykwe hyo mat ke lway nok nok, nak-ey. Enekwei yor senkin ma lousne sohokwe sabat-enekwei hiy non. 10 Wo, Juda mo uwr hakamay homkwe uwr mat non sehe lira menkin, homkwe hye senkin mekow, “Enekwei ohokwe sabat, hunkwe hno mat kokwe sabat sok liy lway nak-anio ley. Hunkwe hromo sow se kamaun sow.” * Neh 13:19; Jer 17:21
11 Hiy sawk Juda mo uwr hakamay seme senkin mekow, “Ama, hano peik ke ma mon sasowriy sow uwr hiy hane senkin me, ‘Hunkwe hno mat ke lway nok nok, nakey.’ ”
12 Hom sawk hye senkin mesopok, “Uwr, hne senkin ma me hokwe, posokwaw so?”
13 Sawk uwr peik non Jisas hiy ma mon popriy kow sohokwe, hiykwe Jisas se kokwe nonkway lwak ha pa, Jisas hokwe posokwaw so. Payhokuaw, enekwei sohokwe uwrsa popua hay homkwe serey nuw-hokruw, Jisas hiykwe sawk sehe lok-nei-a-nei nok.
14 Sa omok Jisas hiy hye God so a pekney-weys mon lirway menkin, sa hye senkin mekow, “Kwa lonuayk, hunkwe yaprue po makiy-wak. Hunkwe yor piap-araw peie ma-mon o. Hunkwe ma-mon ankin, hne kokwe low piap-araw-ar hok senaw ma-lousne mon piapay.” 15 Uwr sohokwe sawk ley nok, Juda me senkin me-kow, “Ama, uwr, hano owh se ma mon popriy kow hokwe, mo Jisas hiykiaw.”
16 Wo, Juda homkwe Jisas se kokwe sa enekwei sohiy non kiy-mon yorpayor pie. Payhokuaw, Jisas hiykwe mey, uwr peik non me ma mon popriy kow mokwe, hiykwe sabat-enekwei sok mon popriy kow. 17 Sawk Jisas hiykwe Juda mo ok mokwe senkin lonuayk me, “Hano Aio hiykwe mey senkinaw meio wayr, mo pokon ohiy seyn. Ha seyn, mey meio nonaw lwak.” 18 Wo, Juda mo uron Jisas se lokin kwor okrue e ma mon sohokwe aiopey hay po nuw-ie. Seyr hiy sabat-enekwei so sow me ma kamaun sow me-aw hokuaw korey. Sawk hiy God se hyo Aio-ar ok ma me, seyr hiykiaw-ayay God se nion liyliy-aw ma lwak-ok ma me sohiy non. * Mat 26:4; Jon 7:1; 10:30
God so Ney hiykwe krai non, mey meio ey hokwe
19 Sa Jisas hiykwe hme senkin ma-sahre mekow, “Hakwe hme okar kiy-mekow, Ney hiykwe mey hiykiaw-aw liy meio ley. Hiykwe mey hyo Orih hiy ma meio seme lira nonkway ankin, hiykwe mey senkin me-aw liy meio. Payhokuaw, mey Aio hiy ma meio somokwe, seyr Ney hiykwe liyliy-aw ma-meio. * Jon 5:30 20 Aio hiykwe Ney se uron-pi ko-ar nuw-wak. Hiykwe mey lowpwarowp hiykiaw ma meio somokwe Ney se kokwe sehe mesair kow. Seyr Aio hiykwe Ney se kokwe mey aiopey hay-ar me ya mesair kow a. Mey somokwe mey, paraw hiy ma meio ha sohom mo eir mon lwak ey, seyr homkwe ya lira preir-yay a. 21 Payhokuaw, Aio hiykwe uwrsa ma lokrue mokwe ma-me-sian-sasian nok, hme su lwayr ey se kow ok. Seyr liyliy-aw, Ney hiykwe uwrsa me kokwe su lwayr ey se kow ey, hyo uron arian hiykiaw ma nan sohom mo liyliy-aw. 22 Seyr Aio hiykwe uwr prueyn se liy mesor anon-anon ley. Sawk hiykwe mey, mesor anon anon ey sokukwe, hyo Ney arian se po nuw-kow lowpway. * Jon 5:27; Ap 10:42 23 Hiykwe sehe kow, uwrsa lowpwarowp homkwe Ney so uru se ayaw mon way nonwey ie e, hom Aio so uru se ma way nonwey ie senkin. Uwr, Ney so uru se way nonwey ie pa lwak ankin, hiykwe seyr Aio hye ma me-ha so uru se seyn, way nonwey ie pey. * Fl 2:10-11; 1 Jn 2:23
24 Hakwe hme okar kiy-mekow, uwrsa hano ok me lonuayk me ankin, seyr hano Aio, hane ma me-ha se nak-nan kiykiy-ay ankin, uwrsa senkin somokwe, su lwayr peyow peyow ihey ey non. Hmekwe heyn-non-ok liy me ley. Homkwe lokrue se po preisia hain, sawk su lwayr yor hok po swahya sow ousne. * Jon 3:15-18 25 Hakwe hme ok-ar kiy-mekow, enekwei pa lousne ey, sawk enekwei sohokwe ehe, papo kiy-ousne. Lokrue-uwrsa homkwe ok, God so Ney hiy ma me seme lonuayk ey. Seyr uwrsa, ma lonuayk somokwe, su ma-lwayr. 26 Su lwayr ey so meyk-ar hokwe mo Aio so nian mon lwak. Seyr Aio hiykwe Ney se liyliy-aw po kow lowpway, Ney hiy su lwayr ey so meyk-ar lwak e. 27 Seyr Aio hiykwe mey, uwrsa mo yor me mesor anon-anon ey sokukwe, Ney se mekow meio, payhokuaw, hiykwe Uwrsa mo Ney.
28 Homkwe ok sokwe peie preiryay o, payhokuaw enekwei pa le, lokrue-uwrsa homkwe hyo wouk-ok ke lonuayk ey. 29 Seyr homkwe ki-eyh ko me lousne sa-ousne ey. Uwrsa, yor yaprue me ma mon hain sohom ma ma-loksian somokwe, homkwe su lwayr ey. Sawk uwrsa yor piap-araw me ma mon hain sohom ma ma-loksian somokwe, hmekwe heyn-non-ok me ey.”
Jisas hiy uwr seirpey-ar ma lwak hokwe, God o, mey hiy ma meio o, hom mesor kumay kow
30 Jisas hiy makiy-me, “Mey mokwe hakwe hakiaw-aw liy meio ley. Hakwe hakiaw ma lonuayk me-aw mesor anon anon. Hano mesor anon-anon yor kokwe luw-luw-aw. Payhokuaw, hakwe hane nian kar mon ey e meio pey. Sawk Aio, hane ma me-ha se kar mon ey e meio. * Jon 5:19; 6:38
31 Sawk mey, ha ma meio omokwe, hakwaw me-kumay kow mokwe, me-kumay-ok senkin kokwe, homkwe ok-ar-ok ke hieyn liy nan kiykiy-ay ley. 32 Sawk Uwr Prueyn hiykwe hane ma hiymon ey se po mesor kumay kow. Seyr hyo me-kumay-ok kokwe okar-ar.
33 Sawk hakwe nonkway, paraw kokwe homkwe uwr har me Jon so mon me-ha, hyo ok me lonuayk e. Jon hiykwe okar-ok me-aw mesor kumay kow. 34 Hakwe uwrsa ki ko mo me-kumay-ok, hane krai kow ey se aiopey hay nanpanan pey. Sawk hakwe Jon so me-kumay-ok me sehe me, God hiy hme ka kahya huonokyaw prosue e. 35 Jon hiykwe enekwei haraw-aw lam se hieyn po loum yar kow. Sa homkwe enekwei haraw-aw hyo ya mon lwak ey se kar ley.
36 Me-kumay-ok kamon, hano mey ke ma me-kumay hokwe ipey hay-ar, Jon so me-kumay-ok so eir mon lwak. Suw senkin, mey enkin ha ma meio, hano Aio hiy ha meio lowpway e ma kow somokwe, mey sohomkiaw mesair kumay kow, hane kokwe mo Aio hiy me-ha. * Jon 3:2; 14:11 37 Seyr Aio hane ma me-ha hiykwe, ok hane ma me mokwe, hiy seyn, po mesor kumay kow. Sawk hunkwe hyo wouk-ok kokwe lonuayk pa, seyr hyo ine-maku hokwe lira pa. * Mat 3:17; Jon 5:32; 8:18 38 Seyr hyo ok mokwe hmo uron mon nakruok pey, payhokuaw, homkwe Uwr, Aio hiy ma me-ha sohiy so ok mokwe nanpanan kiykiy-ay pey. 39 Homkwe God so mamey porih me nuw-ira mon sorasor kraiay popriy, payhokuaw, homkwe senkin nan, ok mamey porih mon ma lwak somokwe homkwe su lwayr peyow peyow ey se lonok ey. Sawk God so mamey porih sokukwe mo hane ma mesor kumay hok non. * Luk 24:27 40 Sawk homkwe hano owh mon le e nan pey, hom su lwayr ey se lonok ey hokwe.
41 Hakwe uwrsa ki erey suko hom hano uru se way nonwey ie e nan pey. 42 Sawk hom uwrsa penkin lwak e, hme kokwe ha nonkway. Hmo uron mon kokwe, homkwe God se kokwe uron-pi ko-ar lwak pey. 43 Ha ma le hokwe, hakwe hano Aio so uru arian non le. Sawk homkwe hane pase me-huonok yawriy e. Wo, sa uwr prueyn hiy hyo uru arian non le ankin, homkwe hye saw-me-huonok yawriy. 44 Me-ihey-ok God prueyn-awaw hiykiaw hme ma mekow mokwe, homkwe aiopey hay nanpanan pey, sawk homkwe uwrsa mo me-ihey-ok me lonok e pawk. Hai, hmo yor senkin lwak ankin, homkwe God se kokwe penkin nan kiykiy-ay a?
45 Ama, homkwe seyr senkin peie nan o, Aio so inour mon kokwe hme ha heyn-non-ok me ey. Korey law-ar. Sawk uwr Moses, hom uron hyohyo hye senkin ma lon, hiykwe hme hiymon ey, sawk hiykwe hme hiymon ey korey. Hiykwe hme heyn-non-ok me ey. 46 Sawk homkwe Moses so ok me nanpanan kiykiy-ay hokwe, homkwe hane liyliy-aw po nak-nanpanan kiykiy-ay, payhokuaw, ok, hiy ma mey mokwe, hane mey sanion sow. * Ap 3:22 47 Sawk homkwe ok, hiy ma me seme nanpanan kiykiy-ay lopa hokwe, hai, hunkwe seyr ok ha ma mesor omokwe penkin nanpanan kiykiy-ay a?”