KOLOSI
Pol so mamey, sios Kolosi mon ma lwak se ma mey kow ha hok non
Meyamey uwr hokwe: Aposel Pol.
Yier hiy ma lwayr meyamey hokwe: Hiykwe yier Rom mon lwak non meyamey.
Enekwei hiy ma meyamey hokwe: Hiykwe enekwei Yia 60 sok po meyamey kok pak e, Yia 61 sok po meyamey kok pak e, Jisas hiy ma lokrue so meyki.
Ok mamey mon ma lwak mokwe senkin: Aposel Pol hiykwe mamey okukwe hiy kalabus-uwr Rom mon-aw lwak non meyamey kow ha, yier Kolosi hiy ma ley ira lopa se. Hiykwe nan kiykiy-ay uwrsa yier serey suko mokwe, hiy Efesus mon lwak non nonkway, hiy hyo lanio mesor nok mey kamon kamon ke lanio meio nok non. Seyr hiykwe uron aiopey hay sehe nuw-nan kworpakwor kawk, payhokuaw, okpey piap-araw har sios Kolosi ko mon ma lousne sohom. Weynpaweyn Kolosi me ma mon piapay mokwe, okrei-okpey senkin senkin o, Juda mo yor me me-sasay pyay weynpaweyn o, sohom nuw-mon piapay, wo, Jisas se kokwe sawk ensel prueyn se hieyn-aw sehe lira me. Aposel Pol hiykwe weynpaweyn seme mon popriy e meyamey, senkin mesair kow e, Krais hiykwe mo God hiykiaw, seyr lwayr peyow God se hieyn-aw ma nuw-wak prusow hiy non.
Mamey ohok ko meyk-ar hokwe senkin: Aposel Pol hiykwe hyo mamey ipey-ar okukwe, Krais hiy God ma lwak se mesair kow popriy ihey. Krais hiykwe God hiykiaw panapan ma lwak se mesair popriy kow ihey.
1
Pol so peyrmawk-ok
1 Hakwe Pol, hakwe Krais Jisas so aposel. Ha aposel ma kiy-wak ohokwe, God so uron arian nonaw me-iaup. Mamey okukwe, ha Pol hiy mey, seyr Timoti hromo wayh hiy seyn, siraw non-mey.
2 Hrorkwe Kolosi mo kristen-uwrsa, Krais so kueir nonaw ma nan kiykiy-ay kraiay me mey kow ha.
God, hromo Aio ma lwak, hiykwe hme kokwe maym kow yor o, liwak marowhway yor o, seme ka kow.
Mesopok me-ihey-ok hok non
3 Enekwei enekwei hrom hme God se ma hiy-mesopok ohokwe, hromkwe hromo Hakamay Jisas Krais so Aio God se me-ihey. 4 Payhokuaw, hromkwe hmo yor yaprue me po lonuayk, hom Jisas Krais se ma nan kiykiy-ay o, seyr kristen-uwrsa lowpwarowp me uron-pi ko-ar ma lwak o. * Ef 1:15-16 5 Hmo nan kiykiy-ay yor o, hmo uron-pi ko-ar yor o, hom uron hyohyo ma lon mon lorok kraiay. Hom uron hyohyo pay me lon e, somokwe nonkumey mon-aw kawk popriy nak-okin sakawk kow koruay. Hom ok-ar-ok, God so ok-ihey ke lonuayk pie menkin, homkwe God so me-loray-ok, hrom hyohyo ma lon me lonuayk. * Ef 1:13; 1 Pi 1:4 6 God so ok-ihey sokukwe kipay lowpwarowp mon kokwe ayay yaprue po leip, seyr aiopey hay po lousne, hmo ompok mon yaprue ma leip wayr senkin, enekwei hom God so maym kow yor ko ok me lonuayk pie non, seyr yaprue nuw-nonkway popriy non. 7 Homkwe God so maym kow yor ko ok sokukwe hromo wayh ihey-ar prueyn Epafras so mon po lonuayk. Hiykwe hreme hokuaw kokwe Krais so hiymon kraiay wayr uwr ipey-ar. * Kol 4:12; Fm 1:23 8 Sa hiykwe hrere senkin mekow, uron-pi ko-ar lwak yor, God so Niohney hiy ma kow hokwe, hmo ompok mon lwak.
Krais hiykwe penkin uwr so
9 Hromkwe hom God so meyki ma pyay seme ma lonuayk pie hokwe, hromkwe God se pase mesopok kane kane e. Hromkwe God se sehe mesopok wayr, hiykwe hme hyo uron ko arian me ka mesair kow, seyr homkwe mawkhow ihey-ar o, nonkway yaprue o, Niohney hiy hme ma kow sohom non ka nak-wak. * Ef 1:16-17 10 Suw homkwe liwak-yor, God hiykiaw ma nan-ihey mon liy lanio. Seyr mey yaprue, God hiy kar ma ley mokwe homkwe kraiar mon ousne ey, seyr hom God se ma nonkway hokwe aiopey hay nuw-eyr ie ey. 11 Hyo krai panpaniowni non hokwe, hme ka mon kraipakrai, sa homkwe low senkin senkin mokwe yor yaprue nonaw, senkin-aw liy lorok kraiay ira huon. Sa homkwe kar nonaw, * Ef 1:19; 3:16 12 Aio God se liy me-ihey, payhokuaw, hiykwe hme ipan po lon, sa homkwe kristen-uwrsa, Ey-yar so Wayr-hre-yier mon ma lwak me nion, ompay-ompay, God hiy kow e ma liaup mokwe liy non-wawwaw onok. * Ef 1:11,18 13 Hiykwe hreme kokwe eym-nawp so krai so iha ko se po kahya prosue, seyr hyo Ney, hiy uron-pi ko-ar ma nuw-wak so Wayr-hre-yier mon po lokriy-yay kow. * Luk 22:53; Ef 2:2 14 Hyo Ney so mey ke hokuaw kokwe hreme kokwe po nakway prosue, suw senkin, hromo weynpaweyn piap-araw mokwe papo lorionay ha. * Ef 1:7
Krais hiykwe lowpwarowp mo eir mon lwak
15 God se kokwe liy lira ley, sa Krais hiykwe God hiykiaw panapan, senkin lousne. Hiykwe ompay-ompay lowpwarowp, paraw-ar ma monhre sohom mo ney norwayo peyr-mawk ko hiy non. * Jon 1:18; 2 Ko 4:4 16 Omeme lowpwarowp nonkumey ko o, ki ko o, omeme, hrom ma lira o, omeme hrom ma lira lopa o, Krais so kueir nonaw monhre. Mo krai senkin senkin ayaw ko hi, mo hakamay hi, mo hiy-wayr-uwr hi, mo makwey-uwr seirpey hi, lowpwarowp somokwe Krais so kueir nonaw monhre, seyr omeme lowpwarowp somokwe hye-aw monhre kow. 17 Omeme ki erey suko me ma monhre pie lopa ma lwak hokwe, Krais hiykwe po lwak. Sa Krais se hokuaw kokwe, omeme ki erey suko homkwe hmo yop arian mon-aw lorok. * Jon 1:1; 8:58 18 Hiykwe hyo owhi, sios ko makwey. Hiykwe meykyar, seyr lokrue ko se peyr-mawk ma loksian hiy non. Suw senkin sehe lousne, hiy omeme lowpwarowp mo eir mon lwak e. * Ap 26:23; Ef 1:22-23; MHO 1:5 19 Sawk God hiy Krais se kar ma nuw-ey hokwe, hyo kyai lowpwarowp mokwe Krais so mon nuw-wanohyay loum-a-loum. * Kol 2:9 20 Krais so kueir nonaw kokwe, God hiykwe omeme lowpwarowp hiy ma monhre, mo ki mon lwak hi, mo nonkumey mon lwak hi, somokwe hyo owh arian mon ma-me-huonokyaw nok lowpway, hye nion uron kamon-awaw manon-wak e. God hiykwe liwak marowhway yor kokwe Jisas so nioh, hiy now mon ma sawan eysow sohiy non-aw mon kampi ousne. * Ef 1:10; 2:16
21 Paraw kokwe, homkwe God so meiaw-ar nuw-wak, seyr homkwe God so awia-pow lwak, payhokuaw weynpaweyn hom ma meio o, uron hom ma nanpanan o, somokwe piap-araw. * Ro 5:10; Ef 2:12 22 Sawk enekwei enkin ohokwe, God hiykwe hyo ney, uwr ki ko se hieyn ma lokrue so kueir nonaw kokwe, hme hyo wayh ihey-ar po mon wak. Hiykwe senkin sehe lon, hiy hme hyo inour mon pekneyweys, orki lopa, seyr heyn lopa mesay iarok e. * Ef 2:14-16; 5:27 23 Sawk homkwe hmo nan kiykiy-ay yor ke kwa nakruok wayr. Yor sokukwe meyk ka loksow, seyr ka lorok kraipakrai wayr. Homkwe hyohyo lon yor, hom ok-ihey ke ma lonuayk non ma lonok kokwe, peie lokriy ha o. Ok-ihey sokwe hokuaw kokwe, Pol hakwe, mey-uwr sehe lwak. Ok-ihey sokukwe uwrsa lowpwarowp kipay lowpwarowp ko me po mesor kow.
Pol hiy sios so mey-uwr ma lwak hiy non
24 Sa hakwe hme hiymon ey me hokuaw aw ma nak-ok hokwe, hakwe kar ley. Payhokuaw, low, ha ki erey mon ma lonok hokwe, Krais so owhi, sios se ma me se hiy-mon. Sa hakwe yerki sohiy nonaw Krais so aw nak-ok yor me meio lowpway ey. 25 Sa God hiykwe hanekwe sios ko mey-uwr po mon wak. Hme hiymon ey hokwe, hiykwe hanekwe mey kamon ke meio e me-iaup. Mey sokukwe senkin, hyo ok-ihey hrawey hrawey ke nuw-mesor hrahra ha e. * Ef 3:2,7-8 26 Ok-ihey sokukwe enekwei meipey hokwe ouon-aw nuw-wak wayr, senkin-awaw, enekwei ohiy kiy-ousne. Sawk enekwei enkin ohokwe ok-ihey sokukwe hiykwe kristen-uwrsa me po kiy-mesair hrahra kow. * Ro 16:25-26; Ef 3:5,9 27 God so uron hokwe senkin, hiykwe hyo ok-ihey ouon-aw ma nak-wak se hyo uwrsa me mesair kow hrahra ha e mon wayr. Ok-ihey sokukwe seirpey-ar, seyr panpaniowni non, uwrkayn irweyk lowpwarowp me hiymon ey hok non. God so ok-ihey ouon-aw ma lwak sokukwe senkin, Krais hiykwe hmo mon lwayr. Suw senkin, homkwe God so panpaniowni hokwe ya non-swapeykyay onok a.
28 Sohiy so hokuaw kokwe, hromkwe Krais se kokwe uwrsa lowpwarowp me seme mesor kow. Mawkhow ihey-ar lowpwarowp hromo mon ma lwak non kokwe, hromkwe uwrsa me hiymon sorasor me-kupaku. Hrom uwrsa lowpwarowp seme Krais se hokuaw mnow-mnow-aw hiy-iarok e, God so inour mon. 29 Mey aiopey hay sokwe meio ey hokwe, hakwe krai ipey-ar, Krais so mon ma le, seyr hano owh mon ma meio sohiy non nuw-meio kraipakrai sese yay. * Ef 3:7,20; Fl 4:13