1 Hano wayh-om, hakwe God so ok-ihey, ha hme ma mesor kow ke hme ma-me nanpanan. Ok-ihey sokukwe hom ma lonok nan kiykiy-ay hok non, seyr hmo nan kiykiy-ay yor somokwe ok serey lorok kraipakrai. 2 God so ok-ihey ko kueir nonaw kokwe, hme po me-huonokyaw prosue. Homkwe ok-ihey, ha hme ma mesor kow me nakruok kraipakrai ankin, homkwe yaprue lwak ey. Senkin lon lopa lwak ankin, hmo nan kiykiy-ay yor mokwe, ayay leip lopa.

3 Hmekwe hakwe ok ipey-ar peyrmawk-ar ko hane ma me-kow me ma-sahre mesor kow: Krais hiykwe hromo yor piap-araw me po lokrue kow, God so mamey porih hok ma me senkin. * Ais 53:5-12 4 Hye kokwe ki-eyh mon kwawk nok, sa eypok krompri so meyki sok ma-me-oksian, God so mamey porih hok ma me senkin. * Mat 12:40; Ap 2:24-32 5 Hiy ma loksian hokwe, Pita so owh mon lousne nok, ki-wayh iha seys mu nareysyar non mo owh mon ma-sahre ousne. * Luk 24:34; Mat 28:16-17 6 Sohiy so meyki hokwe hiykwe enekwei kamon-aw hokwe hyo uwrsa 500 mo owh mon ma-lousne. Enekwei enkin ohokwe, uwrsa sohom mo kraiar homkwe su lwayr nonaw lwak, sawk har mokwe po lokrue. 7 Sei, sohiy so meyki hokwe, seyr Jems so owh mon lousne, seyr aposel lowpwarowp mo owh mon ma-lousne. * Luk 24:50 8 Pariawey-ar hokwe hiykwe hano owh mon lousne, sa hakwe ney prueyn, ipey hok enekwei-ar sok ma liwak lopa se hieyn-aw lwak. * Ap 9:3-6

9 Payhokuaw, hakwe uwr yaprue korey, aposel lowpwarowp mo ompok mon kokwe hano uru hokwe ouon mon lwak. Hanekwe aposel-ok liy me ley, payhokuaw, God so sios me kokwe mo ha nwaksu mon nokriy nokriy yay sowkriy. * Ef 3:8; 1 Ti 1:15 10 Sawk ha enkin ma kiy-wak ohokwe, hakwe God so maym kow yor ko kueir nonaw kiy-wak. Hyo maym kow yor, hiy hano mon ma meio hokwe, ayay leip lopa lwak pa. Korey, hakwe mey ipey-ar po meio, aposel har homkwe sankaw meio pa. Sawk hakwe senkin liy me ley, hakiaw-aw. Mey, ha ma meio mokwe, God so maym kow yor, hane nion ma non-wak hok meio. * 2 Ko 11:23 11 Suw senkin, ok-ihey somokwe, mo uwrsa har hom sor kow hi, mo ha sor kow hi, hrom lowpwarowp kokwe ok kamon-aw ke sor kow, sa homkwe po nan kiykiy-ay.

12 Enkin kokwe hromkwe senkin mesor, Krais se kokwe lokrue ko se po ma-me-sian. Hai, hmo har homkwe sawk senkin panoke lohruw-a o, uwrsa ma lokrue homkwe liy ma-loksian ley? 13 Sawk uwrsa sohom mo ok mokwe ok-ar lwak ankin, suw senkin, Krais se seyn, lokrue ko hokwe ma-me-sian pa. 14 Seyr Krais se kokwe lokrue ko hokwe ma-me-sian lopa lwak hokwe, hromo mesor-kow ok mokwe puraw-aw po nuw-ohruw-a, seyr hmo nan kiykiy-ay yor mokwe meyk lopa po nuw-wak. 15 Sohiykwaw korey, seyr hromkwe God so mey mokwe okrei lohruw-a, payhokuaw, hromkwe senkin mesor wayr, God hiykwe Krais se lokrue ko se po ma-me-sian. Sawk uwrsa ma lokrue ha hom ma-loksian lopa hokwe, okar lwak ankin, God seyn, hiykwe Krais se ma-me-sian pa. 16 Payhokuaw, sawk lokrue ha mokwe ma-me-sian lopa lwak ankin, Krais se kokwe seyr mo ma-me-sian pa. 17 Sawk Krais se ma-me-sian lopa lwak hokwe, hmo nan kiykiy-ay yor mokwe ayay leip lopa po lwak, seyr homkwe hmo yor piap-araw arian mo ouon mon-aw po lwak. 18 Suw seyr senkin lwak, uwrsa Krais se ma nan kiykiy-ay me ma lokrue ha mokwe, po lokrue pror ha. 19 Sawk hromo uron, Krais se hyohyo ma lon hokwe, enekwei enkin se-aw lon ankin, uwrsa ki ko homkwe hromo kristen mo nan kiykiy-ay yor mokwe, lawk-lawk ey me hieyn liy lira muar ourde.

20 Sawk Krais se lokrue ko se ma me-sian hokwe, mo ok-arar. Hiykwe uwrsa ma lokrue ha mo peyr-mawk loksian uwr. Suw senkin sehe mesair kow, uwrsa ma lokrue ha somokwe ya ma-lok-sian a. 21 Payhokuaw, lokrue yor kokwe uwr prueyn-aw hiy mon ousne, seyr liyliy-aw, ma-loksian yor kokwe uwr prueyn-aw hiy mon ousne. * Ro 5:12 22 Payhokuaw, uwrsa lowpwarowp homkwe Adam so yor ko kueir nonaw laway. Seyr liyliy-aw, uwrsa lowpwarowp homkwe Krais so mey ko kueir nonaw ma-loksian wayr ey. 23 Suw senkin lousne ey, peyrmawk hokwe, Krais hiykiaw po loksian pie, sa omok hiy ma-laye ankin, uwrsa hye ma nan kiykiy-ay hom ma-loksian ey. * 1 Te 4:16; MHO 20:5 24 Sohiy so meyki hokwe, enekwei pariawey-ar hiy lousne ey. Enekwei sohokwe, Krais hiykwe hromo ki so makwey-uwr o, hiy-wayr-uwr senkin senkin o, krai senkin senkin o, lowpwarowp seme nak-swakakar nok, Wayr-hre-yier se Aio God so iha arian mon kow ok. 25 Payhokuaw, Krais hiykwe king se hieyn senkinaw hiy-wayr ey, enekwei God hiy hyo awia-pow me hyo sune ouon mon lyay sowkriy kow sehe. * Mat 22:44 26 Awia-pow pariawey-ar mon piapay ey hokwe, lokrue yor. * MHO 20:14 27 Payhokuaw, God so mamey porih hokwe senkin me, “Hyo sune ouon mon kokwe God hiykwe omeme lowpwarowp me lyay sowkriy ey.” Ok “omeme lowpwarowp” sohok ko meykyar kokwe senkin: God hiykwe hiykiaw-ayay Krais so ouon mon lwak e me pa, payhokuaw, omeme lowpwarowp somokwe, Krais so ouon mon kokwe mo God hiykiaw lyay sowkriy kow. Sng 8:6

29 Hai, homkwe hu mon prouk yor, uwrsa ma lokrue ha me hiymon ey, yor sokukwe panoke meio o? Sawk uwrsa ma lokrue ha homkwe ma-loksian lopa lwak ankin, hai, hmo har homkwe, mey sokukwe panoke meio o? 30 Hai, uwrsa me mon oksian yor lopa lwak hokwe, hromkwe hromo mey mokwe enekwei enekwei awia-pow mo yeik-pi ouon mon payhokuaw meio wayr o? 31 Hano wayh-om, enekwei enekwei, lokrue hokwe hano inour mon kiynuw-wak. Ok sokukwe okar, okrei korey. Ha hme hromo Hakamay Jisas Krais so ouon mon ma nak-me-heyr se hokuaw kokwe, hakwe okar-ok sokukwe sehe me. * Ro 8:36 32 Hai, ha yier Efesus erey mon iwar ki ko hom hane yaprue ma lira me hokuaw, ay-kaman piap-araw me aw non-ono hi, aw senkin somokwe hane pay se kow ey so? Suw senkin, lokrue-ha mokwe ma-me-sian lopa lwak ankin, mo sehe, hromkwe ok kamon senkin ma me ko meyki ley e,

35 Hai, hmo har homkwe senkin mesopok wayr-wayr, “Uwrsa ma lokrue-ha mokwe penkin ma-mon-sian o? Hmo owhi mokwe ya penkin ma-lwak a?” 36 Lawk-lawk ey ama, enekwei hom ayay-yok me ki mon saro mokwe, ayay-yok somokwe lokrue lopa lwak hokwe, liy swaseyr ie ley. * Jon 12:24 37 Seyr ayay-yok hom ma saro somokwe, homkwe owhi, omok nak-swaseyr ousne ey non nak-saro pey. Hwon pay i se saro me, owhnan-ok, hwon wit-i se saro ankin, seyr hwon ayay-yok har me saro ankin, homkwe mo i me-aw saro. 38 Sawk God hiykwe ayay-yok somokwe owhi iwon, hiykiaw ma nanpanan senkin kow. Seyr ayay-yok senkin senkin mokwe, hmo owhi arian me ma-sahre kow. 39 Payhokuaw, ayay, su ma lwayr mo owhi mokwe liy-liy-aw lira pey: Iwar mo owhi mokwe irweyk, ayay ki-aw ko mo owhi mokwe irweyk, seyr ahney mo owhi mokwe irweyk, ay hu ko mo owhi mokwe irweyk. 40 Seyr nonkumey mon kokwe owhi senkin senkin non. Seyr ki mon kokwe owhi senkin senkin non. Owhi ki ko mo panpaniowni mokwe irweyk, seyr owhi nonkumey ko mo panpaniowni mokwe irweyk. 41 Ey hiykwe hyo panpaniowni arian non. Yeyn hokwe hoko panpaniowni arian non, seyr napuar homkwe panpaniowni irweyk non. Seyr napuar kamon kamon-aw mo panpaniowni mokwe liy-liy-aw korey.

42 Lokrue-ha uwrsa me ma-me-sian ankin, mo senkin lwak ey. Owhi, ki mon ma lopru kwawk kokwe, lwayr peyow lopa. Sawk owhi ma ma-me-sian kokwe lwayr peyow ey. 43 Enekwei ki mon lopru kwawk ankin, owhi sokukwe piaparaw-araw, seyr nompou lwak. Sawk enekwei owhi sokwe ma-me-sian ankin, hokwe panpaniowni non, seyr krai non lwak. * Fl 3:20-21 44 Ki mon lopru kwawk ankin, owhi sokukwe ki ko, sawk ma-me-sian ankin, owhi sokukwe niohney so. Ki ohokwe mo owhi non, sa hromkwe senkin seme nonkway, niohney hokwe seyr owhi non. 45 Payhokuaw, God so mamey porih hokwe senkin me, “Uwr peyr-ar ko hokwe, Adam, hiykwe iwar, su ma lwayr hiy non. Sawk Adam pariawey hiykwe niohney, su lwayr peyow ey se ma kow hiy non.” * Stt 2:7 46 Suw senkin, niohney ko hiy seyn lousne pie pey, sawk owhi ko hok lousne pie. Sa niohney ko hiykwe omok seyn lousne. 47 Adam, peyrmawk-uwr hiykwe ki ohiy so kosi-pow ko, sawk Krais, uwr meyki ko hiykwe nonkumey ko. 48 Uwrsa ki ko homkwe uwr kosi-pow non ma mon-hre se hieyn lwak. Seyr uwrsa nonkumey ko homkwe uwr nonkumey ko se ma laye se hieyn lwak. 49 Enkin ohokwe hromo owhi mokwe, uwr kosi-pow non ma mon-hre se hieyn lwak. Suw seyr liyliy-aw, omok kokwe hromo owh mokwe uwr nonkumey ko se ma laye se hieyn lwak ey.

50 Hano wayh-om, hano ok-ku kokwe senkin, iwar enkin ma lwak mo owhi nioh non homkwe God so Wayr-hre-yier mon liy non-yawriy wayr wayh-wayh ley. Seyr lokrue pror ha yor hokwe, su lwayr peyow peyow kyai ke nion liy non-wayr wayh-wayh ley. 51-52 Ama, kwa lonuayk, hakwe hme ok kamon ouon-aw ma lwak ke mesor kow ey. Hrom lowpwarowp kokwe lokrue lopa, sawk hromo owhi mokwe irweyk-aw ka-hriysow ey, nene hiy ma lira kopra se hieyn, enekwei hu pariawey-ar se lou non. Suw senkin, enekwei hu-oksa hiy lwoun ankin, lokrue-ha homkwe owhi lwayr peyow ey non nak-oksian sasian ey, seyr hrom o, hromo owhi mokwe irweyk-aw ka-hriysow ey. * Mat 24:31; 1 Te 4:15-17 53 Payhokuaw, owhi preir kawk ey hokwe peyr owhi su lwayr peyow ey ke lie e. Seyr lokrue owhi hokwe, peyr lwayr peyow owhi ke lie e. * 2 Ko 5:4 54 Sa enekwei owhi preir kawk ey sokukwe owhi su lwayr peyow ey ke lie ankin, seyr lokrue owhi hokwe lwayr peyow owhi ke lie ankin, suw God so ok mamey porih ko kokwe, ok-arar senkin po mon ousne hrahra sow ha: “Lokrue kyai kokwe po mon piapay swakakar ha lowpway.” Ais 25:8

58 Hano wayh ihey-ar om, seme hokuaw kokwe, kwa lorok kraipakrai, homkwe eriey ley, erey le, peie ley o. Hakamay so mey me-aw kwa nuw-meio wayr-wayr, payhokuaw, homkwe po nuw-nonkway, Hakamay so mey hom ma meio somokwe, ayay leip lopa liy lwak ley.