BABYOR NI
JOEL
Murung’agen e Re Ke Babyor Ney
Joel ni profet e buchu’uw murung’agen ni yi manang, sana i rin’ e maruwel ko profet u nap’an e duw ni 400–350 u m’on ndawori yib Kristus ko ngiyal’ nib gel e nam nu Persia. Joel e weliy murung’agen e asmen’ing ni kay e woldug nge yal’ ni yib nib gel ni bochan e dariy e n’uw. Urngin e pin’ey e pow riy ni birok Somol e Rran e ke chugur, ni aram e ngiyal’ ni bayi gechignag Somol e pi’in yad be togopluw ngak. Joel ni profet e yog e thin rok Got ngak e girdi’ nu Israel ni ngar kalgadngan’rad ngar pi’ed keru’rad ko kireb ni yad be rin’, me ayuwegrad Got nge fulwegrad nga rogorad. Miki micheg Got ni bayi pi’ e Kan Nthothup rok ngak urngin e girdi’, ni pumo’on nge ppin, ni pi’in kiyad ba gel nge pi’in ni kar pilibthirgad.
Gathon e Re Ke Babyor Ney
Gafgow ntay ko asaman’ing 1:1—2:17
Ba michmich ni yira sul nga rogoy 2:18–27
Fare Rran ku Somol 2:28—3:21
1
1 Thin rok SOMOL ngak Joel, nib mo’on ni fak Pethuel.
Miyor ni tay e girdi’ ni bochan e woldug ni kireb
2 Mu telmed e pi’in pi’lal,
mu telmed urngin e girdi’ nu Judah.
Mogned, ka’a m’ug ban’en ni ara’ rogon u lan e yafos romed,
ara lan e yafos ko pi chitamangimed kakrom?
3 Mogned murung’agen ngak pifakmed;
miyad yog ngak pifakrad,
miyad yog ko bin migid e mfen.
4 Asmen’ing ni pire’ ni pire’ e yib ko woldug ni nge longuy,
nra chuw boch me yib boch
i longuy e tin ke magey.
5 Mu odgad ngam yorgad, gimed e pi tachingaw’;
mu yorgad, gimed e pi tamu’un wayin nir;
fapi grape ni ngan ngongliy e wayin nib be’ech riy e kan kirebnag.
6 Asmen’ing ni pire’ ni pire’ e kar kireb niged e nam rodad;
yad bgel ma dabiyag i the’egrad;
nguwelrad e bod feni m’uth nguwelen e layon. Rev 9:8
7 Kar kireb niged e yu ke grape rodad
ma kar longuyed e yu ke gek’iy rodad ni fig.
Kar fathiyed keru’ ni gubin,
ke par papa’ngin nike wech.
8 Mu yorgad e girdi’, ni bod ba rugod ni be yornag be’
nib mo’on ni kan m’ag e mabgol rorow ma ke yim’.
9 Dariy e grain nge wayin ni ngan pi’ u Tempel;
ma be yor e pi prist ni bochan e dariy e n’en ni ngar pi’ed ngak SOMOL.
10 Dakuriy ban’en u daken e yung i milay’;
kari kireban’ e but’,
ya ke kireb e grain,
ma ke l’ud e grape,
ma ke mororoy e yu ke gek’iy ni olive.
11 Nge kireban’med e pi’in gimed ma woldug;
mu yorgad e pi’in gimed ma ayuweg e woldug ni grape,
ya wheat nge barley,
nge urngin e woldug e ke kireb.
12 Fa yu ke grape nge gek’iy ni fig e ke l’ud,
ma gubin e gek’iy nma k’uf e ke mororoy ke yim’.
Ke chuw e felfelan’ ko girdi’.
13 Gimed e pi prist ni gimed ma pi’ fapi maligach u daken e altar
e nga mon’ed nga dakenmed e mad ni tutuw ngam yorgad,
marod ngalan e Tempel ngam yorgad ni polo’ e nep’!
Dariy e grain ara wayin ni ngam pi’ed ngak e Got romed.
14 Mu reged e thin ni ngan pag e abich;
mi gimed pining e mu’ulung,
mu kunuyed e pi’in yad be yog e thin
nge urngin e girdi’ nu Judah
ngalan e Tempel rok SOMOL ni ir e Got romed,
mi gimed yor ngak.
15 Birok SOMOL e rran e ke chugur; fa’anem ni Gubin ma Rayag Rok e bayibnag e riya’.
Ba ga’ ba marus ni yira tay e rofen nem!
16 Ke math e liyab ngomad ko woldug romad nike mogothgoth.
Dakriy e felfelan’ u lan e Tempel ko Got rodad.
17 Be yim’ awochngin e woldug u fithik’ e but’ nike mlik’.
Ma dariy e grain ni ngan cha’riy,
ere fapi naun ni tafen e grain ni dariy ban’en u langgin e ke kireb.
18 Be moen e garbaw ni kar gafgowgad
ya dakriy e yungin ngar ked e pan riy;
fa yu ran’ i saf e ku arrogon ni kar gafgowgad.
19 SOMOL, kug pag lamag ngalang kug yor ngom,
ya yungi garger nge yuchowo’ i gek’iy e yigo’ ke mororay,
ni gowa ke mo’oruf.
20 Mus ko gamanman ni malboch ma yad be yor ngom,
ya yu pa’ i lul’ ma ke mlik’.
DRAFT VERSION — Proofreading in progress