1 ไก โม อิซราเอน ติ ปุย, มอยฮ อื มัฮ อาคัน. เปือะ อื มัฮ คามี. ตะ อื มัฮ ซัปดี่. มัฮ จัตเจือ เซรา, เจอ ยูด่า. อาคัน เซ เนอึม โตว รพาวม ละ พะจาว นึง โอเอีฮ ลัง ทไว ลุต ปุย ละ พะจาว. บระ ตุย เม่าะ โอเอีฮ ป ลัง ทไว ลุต ปุย ละ พะจาว เซ. พะจาว ฮาวก รพาวม ฆาื อื ละ โม อิซราเอน.

2 เญือม เซ โยชูวา ดวน ปุย โอก โฮว เน่อึม นึง เวียง เยรีโค ง่อน. เกือฮ อื ฮาวก เลียป แลน เมือง ไอ. โม เซ โฮว เนอึม. เมือง ไอ เซ อาวต ซดิ โบ ย่วง เบ่ทาเวน. ปุก บลัฮ ย่วง เบ่ตเอน ลวง ลั่ก โอก ซเงะ นึง อื.

3 เญือม เอีจ ยุ อื เมือง ไอ เซ เอีญ รโฮงะ อื ละ โยชูวา ตอก เฮี, “ทัน โตว เกือฮ ปุย ฮาวก รุป เมือง เซ เตือง โอยจ แตะ. เกือฮ ฮาวก ละ อื เมาะ ลอา ลอวย เปือน ปุย โฮ, ปอ อื, ปัง โอ ฮาวก เอิน เตือง โอยจ แตะ ตฮัน เซ. ปุย เมือง ไอ เซ รมัฮ, โฮวน โตว,” อัฮ เซ. 4 โยชูวา เกือฮ เนอึม โม ตฮัน ฮาวก รุป เมือง เซ ลอวย เปือน ปุย โน่ง. เญือม รุป อื ปุ แตะ, โม อิซราเอน ไป นึง ปุย เมือง ไอ เซ. แตกฟุง ตอ เฮีย ไฮ ฆาื อื. 5 ปุย เมือง ไอ เซ ครัป โม อิซราเอน โอก ฮา ย่วง แตะ. อาื อื ฮอยจ ละ บ่อ ซโมะ. อาื มอก อื ลไล เลีฮ อื ฌื. ยุม ยุฮ อื เมาะ ง่วย โรฮ แลฮ ปุย. โม อิซราเอน ไลจ รพาวม. ชุม ลัมเลือ รพาวม ฆาื อื.

6 เญือม ยุ อื โอเอีฮ ตอก เซ โยชูวา ไม่ โม ฮัวนา เมือง อิซราเอน เนอ, แจฮ ไอฮ ลปิ แตะ นึง ตุก รพาวม แตะ. นุ่ม ปอ จิ ไกญ แตะ เตะ ลั่กกา ฮิต ลปุง ซันญา ยุฮ พะจาว เซ. ไอจ รเคอึป ลังเตะ นา เซ ฮอยจ ละ ปู พริ. ตุย ครวย รกาื นึง ไกญ แตะ ไม่ อื. 7 โยชูวา ไววอน อัฮ เฮี, “โอ พะจาว เยโฮวา, เมอยุ นัม เปอะ เอะ เตือง โกลง จอแด่น ละ ซ เกือฮ เปอะ โม อาโมไร ยุฮ ยุม ไม่ เอะ ตอก เซ เยอ? มัฮ อาวต ลั่ง เงอะ บลัฮ โกลง ลั่กเติต ไมจ เดียก เนิ. 8 โอ พะจาว, อาึ ซ เกียฮ อัฮ ตอก เมอ? โม อิซราเอน เฮี เอีจ ลเตือฮ ตอ แม ฆาื ไป แตะ นึง ป รุป ไม่ แตะ. 9 ปุย คะนาอัน ไม่ ปุย แควน เฮี ตึน ซ ฮมอง ตื อื ไลลวง เฮี. ตึน ซ บะ ปุ แตะ โฮว แวต เอะ ละ ซ ยุฮ แตะ ยุม ไม่ เอะ เตือง โอยจ เจอะ. ปะ ซ ยุฮ เปอะ ตอก เมอ ตอก ซ เกือฮ เปอะ ปุย โอ โฮลฮ เพียก แฮม มอยฮ ระ ไล ยุฮ เปอะ เซ?” อัฮ เซ ละ พะจาว.

10  พะจาว อัฮ เฮี ละ โยชูวา, “โกฮ แปฮ. เมอยุ ไอจ รเคอึป เปอะ ลังเตะ ตอก เซ? 11 โม อิซราเอน เอีจ พิต. ยุฮ โตว อื ตัม ลปุง ซันญา ดวน อาึ แตะ ยุฮ. บระ เม่าะ โอเอีฮ ป ลัง ทไว แตะ. ริ เกือฮ อื แปน คอง โกะ แตะ. โนก ฮา บระ อื, อัฮ แม ป โอ เนอึม ไม่ อื. 12 มัฮ เซ ป ไป อื ฆาื อื นึง โม ป รุป ไม่ แตะ เซ. มัฮ ฆาื มั่ป พิต ยุฮ อื ไอฮ ป โฮลฮ อื ลเตือฮ ตอ ยุม ตอ ไอม ฆาื อื ตอก เซ. อาึ เญือะ ซ อาวต โตว ไม่ โม เปะ ดัฮ เปอะ โอ ยุฮ ไลจ ไม่ โอเอีฮ ป ลัง ทไว ลุต แตะ ละ อาึ เซ.

13 “โกฮ เมิฮ. ไมจ เปอะ ดวน ปุย เตือง โอยจ อื เกือฮ ติ แตะ แปน ปุย ซง่ะ ไล ละ อาึ. ไมจ เปอะ เพรียง ติ เปอะ ละ ซง่าวป. อาึ ป มัฮ เยโฮวา พะจาว ทื อิซราเอน อัฮ เฮี ละ เปอะ, เออ อิซราเอน, โม เปะ เอีจ ไก โอเอีฮ ป ดวน อาึ เปอะ ยุฮ ไลจ ไม่ ลลาึง เปอะ. ไมจ เปอะ เกือฮ โอเอีฮ เซ โอก ฮา เปอะ เดอึม เปอะ โอ เญาะ ซ ไป เญือม รุป แตะ. 14 ซง่าวป ก ซะ ไมจ เปอะ เลียก ซองนา อาึ แปน แปน เจอ อื ละ ซ ยุง ที เปอะ ป ยุฮ กัน พิต เซ. โร พะจาว เจอ ออฮ เอีจ มัฮ เจอ เซ ป พิต เตอ. เกือฮ แม เจอ เซ ฮอยจ แปน แปน มู แตะ. โร พะจาว มู ออฮ นึง อื เอีจ มัฮ มู เซ ป พิต เตอ. เกือฮ แม มู เซ ฮอยจ แปน แปน เญือะ แตะ. โร พะจาว เญือะ ออฮ นึง อื เอีจ มัฮ เญือะ เซ ป พิต เตอ. เกือฮ แม เญือะ เซ ฮอยจ แปน แปน ปุย แตะ. โร พะจาว ปุย ออฮ, เอีจ มัฮ ปุย เซ ป พิต นึง อื. 15 ป ไปญ โอเอีฮ ป ดวน อาึ เปอะ ยุฮ ไลจ ไม่ เซ, ปุย เซ ซ โฮลฮ ปุย ตอง โตะ งอ, เตือง เญือะ เตือง ม่า อื เตือง คาวคอง ยุฮ อื เตือง โอยจ อื, นึง เอีจ พิต อื ลปุง ซันญา ปุย อาึง ไม่ พะจาว. กัน ยุฮ อื เซ มัฮ เนอึม ป ไลจ มอยฮ โม อิซราเอน ฆาื อื,” อัฮ เซ พะจาว.

16 ปวยฮ พริ เซ โยชูวา เกือฮ เนอึม โม อิซราเอน เลียก เคะ แตะ แปน แปน เจอ อื. เญือม เลียก อื ตอก เซ ปุก เจอ ยูด่า ป ยุฮ กัน พิต เซ. 17 ฟวยจ เซ กอก แม เจอ ยูด่า เซ เลียก แปน แปน มู อื. เญือม เลียก อื ปุก จัตเจือ เซรา นึง อื. เลียก แม แปน แปน เญือะ อื. ปุก เญือะ ซัปดี่. 18 กอก แม เญือะ เซ เลียก แปน แปน ปุย อื. ปุก อาคัน กวนโซะ ซัปดี่ เซ. (เปือะ อาคัน เซ มัฮ คามี. ตะ อื มัฮ ซัปดี่. มัฮ จัตเจือ เซรา, เจอ ยูด่า.)

19 โยชูวา อัฮ เฮี ละ อาคัน, “กวน, ไมจ เปอะ อัฮ ป เนอึม ซองนา เยโฮวา พะจาว ยุฮ โม อิซราเอน. มัฮ กัน พิต เมอ ป ยุฮ ปะ อา? รโฮงะ เนิ ตัม ซื อื, เดอึม ซ แปน โญตซัก ละ พะจาว. ปุ เม่าะ ฮา อาึ เฟือฮ เอิน,” อัฮ เซ ละ อื.

20 อาคัน เซ โลยฮ อื, “เนอึม, อาึ เอีจ พิต เนอึม เมอะ. อาึ เอีจ พิต เนอึม ละ พะจาว ยุฮ อิซราเอน. กัน พิต ยุฮ อาึ มัฮ ตอก เฮี, 21 ลลาึง เครอึง ตุย ปุย โรวก เซ, อาึ ยุ ลปิ ไมจ นึง ติ ปลัฮ, มัฮ ลปิ เมือง บ่าบี่โลน. ยุ แม ไม่ มาื ลอา รอย เชเคน ไม่ ไคร ติ แฮลป นัมนัก เมาะ รฮอน เชเคน, อาึ ไก รพาวม ฆวต ไอฮ แฮะ. ตุย เนอึม เมอะ เม่าะ รปาึง โตะ เตะ ฆรึม พากัง อาวต แตะ. มาื เซ อาวต ฆรึม โอเอีฮ ไฮญ,” อัฮ เซ.

22 โยชูวา เกือฮ ปุย ตอ โฮว ซาวป อื นึง พากัง อาวต อื ฆาื อื. ยุ เนอึม อื. เอีจ เม่าะ เนอึม อาึง อื ตอก อัฮ อื เซ. มาื เซ อาวต เนอึม ฆรึม โอเอีฮ ไฮญ. 23 ปุย เซ โรวก เปลีฮ อื ละ โยชูวา ไม่ โม อิซราเอน เตือง โอยจ อื. ฟวยจ เซ ละ อาึง อื ซองนา พะจาว.

24 เญือม เซ โยชูวา ไม่ โม อิซราเอน เตือง โอยจ อื ตาว เญือะ อาคัน เตือง ลปิ เซ ไม่ ไคร ไม่ มาื เซ, เตือง กวน รเมะ กวน รโปวน อื ไม่ โมวก ไม่ บรัง ไม่ แกะ เลียง อื, เตือง พากัง ยุฮ อื ไม่ คาวคอง อื เตือง โอยจ อื, เกือฮ อื ฮาวก นึง โตะ โลก อาโค. 25 โยชูวา อัฮ เฮี, “ปะ เมอยุ เกือฮ เปอะ ป โตะ ป ตอง ฮอยจ ละ เอะ เอ? ซเงะ เนาะ เฮี พะจาว ซ เกือฮ โรฮ ป โตะ ป ตอง ฮอยจ ละ ปะ ฆาื อื,” อัฮ เซ ละ อื.

เญือม เซ โม อิซราเอน แล่น ปุย เซ นึง ซโมะ เตือง เญือะ อื เตือง คาวคอง อื. โตก แม อื นึง งอ. 26 รชุก ซโมะ ราว อื แปน กอง อื. กอง ซโมะ ระ เซ อาวต ลั่ง นา เซ ฮอยจ ปเลี่ย. ฟวยจ เซ พะจาว เญาะ ฮาวก รพาวม โตว ละ โม อิซราเอน. นา เซ ลอต ปุย อัฮ โตะ โลก อาโค* 7:26 ตัม ลปุง ฮีบรู “อาโค” เซ มัฮ อัฮ อื “ป โตะ ป ตอง” ไม่. ไม่ ฆาื อื.