1 อาึ ไววอน ละ พะจาว นึง ลเลาะ เรียง แตะ. อาึ กอก ปัว พะจาว เรอึม แตะ. 2 อาึ อู รไต ไลลวง เม่ะมั่ก อาวม แตะ ละ พะจาว ยุฮ แตะ. อาึ รโฮงะ โรฮ รพาวม ตุก แตะ ละ อื โรฮ. 3 เญือม อาวต อาึ ไม่ ชุม โกะ ลปิ พาวม แตะ, พะจาว ยุง โอยจ อื ป ยุฮ ป อัฮ อาึ อื. นึง คระ โครง ซ โฮว อาึ นึง เซ, เอีจ บระ ปุย ดาวง อาึง แฮวะ ซราว นึง, ละ ซ เกือฮ อื เคริ อาึ. 4 เญือม แลน เนอะ ลวง เฆียง แตะ, อาึ ยุ โตว ป ซ เกียฮ เรอึม แตะ นึง ติ ปุย เนอึม. ไก โตว ป เฆีญ ป เดีย อาึ อื. ไก โตว ติ ปุย เนอึม ป ไก รพาวม เลียก พาวม นึง เงอ.

5 โอ พะจาว, อาึ กอก ปัว นึง ปะ. อาึ อัฮ เฮี ละ เปอะ, “เอีจ มัฮ ปะ ป มัฮ ตัว เปิง อาึ อื. ติ เจน อาวต เตอะ นึง ปลัฮเตะ เฮี อาึ ตองกัน ปะ ระ ฮา โอเอีฮ ไฮญ เตือง โอยจ อื.” 6 ปัว เปอะ ง่อต รซอม ปัว อาึ นึง เปอะ, อาึ เอีจ ชุมเช ลัมเลือ เอิน รพาวม เมอะ. ปัว เปอะ เรอึม อาึ เกือฮ โปน ฮา โม ป โคมเฮง เงอะ เซ, นึง ระ ลัมเลือ เอิน เรียง โม เซ ฮา เยอะ. 7 ปัว เปอะ เรอึม อาึ เกือฮ โปน ฮา เม่ะมั่ก อาวม เมอะ เฮี, เดอึม อาึ ซ โฮลฮ ลืลาว มอยฮ เปอะ นา ก โพรม โม ปุย ซื ปุย ไซ, นึง เอีจ ยุฮ เปอะ ป ไมจ ละ อาึ.