1 โอ เยโฮวา ป มัฮ พะจาว ยุฮ เอะ, มอยฮ ปะ มัฮ เนอึม ป คึ ป นัก ละ ปุย ติ ปลัฮเตะ. อัมนัต โญตซัก เปอะ เอีจ เปลีฮ ติ แตะ เลี่ป มะลอง. 2 ปะ เอีจ เกือฮ เปอะ โม กวนดุ ไม่ กวนงัก แตวะ ลืลาว แตะ. เอีจ เป เปอะ โม ป ฆวต ตอซู ปุ แตะ ไม่ เปอะ เตือง โอยจ อื เบือ อัมนัต ระ ยุฮ แตะ. โม ป ตอซู ไม่ เปอะ ไม่ โม ป ยุฮ ปไฮะ ปฮอน, ปะ เอีจ ปุน เกือฮ เปอะ อาวต โฆย.

3 เญือม แก อาึ มะลอง ยุฮ เปอะ, เตือง เคิ ไม่ ซโมยญ ป เกือฮ ปะ อื อาวต เบือง แตะ เซ อาึ เงอึต เนอึม ฆาื. 4 ปุย ปลัฮเตะ เฮี มัฮ ซัมคัน อื ละ เปอะ ตอก เมอ บุย? เกียฮ ดอฮ บุย เปอะ ละ ป แตวะ ไล ตอก เอะ เฮี เมอ? 5 ปะ เอีจ เกือฮ เปอะ แปน ป เตียม ไล ฮา เตปด่า เญี่ยะ โน่ง. เอีจ เกือฮ เปอะ โฮลฮ โญตซัก ไม่ ไก นา ไก ตา แตะ ตอก ป โปง ไม่ ป โฮลฮ กซัต โฮ. 6 เอีจ เกือฮ โรฮ เปอะ ปุน ตัตเตียง โอเอีฮ ป ยุฮ เปอะ เบือ อัมนัต แตะ โครยญ เจือ. เอีจ เกือฮ เปอะ โอเอีฮ เตือง โอยจ อื อาวต ฆรึม อัมนัต อื. 7 เอีจ เกือฮ เปอะ โฮลฮ ตัตเตียง ครัก โมวก ไม่ แกะ ปิ ฮอยจ ละ โกะพริ เตือง โอยจ อื. 8 ตัตเตียง โรฮ อื ไม่ ไซม ไล่ ไม่ กะ ระ กะ แตวะ ฮอยจ ละ โอเอีฮ ป อาวต โตะ ปลัฮ รอาวม โครยญ เจือ. โอเอีฮ ตอก เซ มัฮ เนอึม ป เงอึต ปุย นึง.

9 โอ เยโฮวา, ป มัฮ พะจาว ยุฮ เอะ, มอยฮ ปะ มัฮ เนอึม ป คึ ป นัก ละ ปุย ติ ปลัฮเตะ.