1 ไก ปรเมะ เจอ เลวี ติ ปุย. ปรโปวน เญือะ อื มัฮ โรฮ เจอ เลวี. 2 เญือม เซ ไก แม กวน ไม่ ปุ แตะ ติ, รเมะ. มะ อื เญือม ยุ อื กวน แตะ เซ เลียก พาวม นึง อื. ฮรัก อื. เม่าะ อื ลอวย เคิ ฆาื อื. 3 เญือม โอ อื เญือะ ปุน เม่าะ ออ, ตุย อู ไตญ ปุย นึง ฮละ โด่ะ กอ. ตา ยั่ง ลอง นึง อื. อาึง กวน แตะ เซ นึง อื. ฟวยจ เซ โฮว ตาว อื นึง โกลง, เกือฮ อื ตอยฮ ราว รอาวม เฆียง โกลง เซ. อาวต ลลาึง ไรป ลโล. 4 ป มัฮ ออระ อื ชุง แก อื เน่อึม ก ซไง อื. มอง แก ป ซ เกิต ละ อื.

5 เญือม เซ กวน รโปวน ฟาโร เลีฮ ฮอยจ นึง โกลง เซ ละ ซ ฮาวม แตะ. กวนไจ อื โฮว ไร เฆียง โกลง เซ. เญือม ยุ กวน ฟาโร อาวต อู ลลาึง ไรป เซ, ดวน กวนไจ ยุฮ แตะ โฮว ตุย อื ละ แตะ. 6 กวนไจ อื เซ โฮว ตุย เนอึม อื. เญือม เอีจ โปฮ กวน กซัต อู เซ เยอ ยุ กวนงัก เซ, ปุก เยือม อื. เลียก พาวม นึง อื ฆาื อื. “เฮี ตึน ซ มัฮ กวนงัก ยุฮ โม ฮีบรู,” อัฮ เซ ไม่ อื.

7 เญือม เซ ออระ กวนงัก เซ ฮอยจ ไฮมญ กวน ฟาโร ตอก เฮี, “อัม ฆวต เกือฮ เปอะ อาึ โฮว ซาวป โม ฮีบรู ละ เปอะ ติ ปุย, ละ ซ เกือฮ กวนงัก เฮี โฮลฮ ปุ?” อัฮ เซ. 8 “โฮว เมิฮ,” อัฮ เซ ละ อื. ออระ กวนงัก เซ โฮว เนอึม. กอก เอิน มะ กวนงัก เซ ไอฮ. 9 เญือม เอีจ ฮอยจ อื กวน ฟาโร อัฮ เฮี ละ อื, “โรวก กวนงัก เฮี เอีญ ไม่ เปอะ. เกือฮ ปุ. เลียง เนิ. อาึ ซ เกือฮ จัง เปอะ ละ เปอะ,” อัฮ เซ ละ อื. มะ อื เซ โรวก เนอึม เลียง กวนงัก เซ. 10 เญือม เอีจ ระ บุย โรฮ อื ตาว อื ละ กวน ฟาโร. กวน ฟาโร เซ เมีญ อื แปน กวน รเมะ แตะ. ปุก มอยฮ อื, อัฮ ไอ โมเซ* 2:10 นึง ลปุง ฮีบรู เยอ, ไอ โมเซ มัฮ อัฮ อื “ยวก โอก ฮา รอาวม” ไม่ อื. ละ อื. “อาึ มัฮ ยวก เกอะ โอก ฮา รอาวม,” อัฮ เซ.

11 กังเคะ เอ เญือม เอีจ ระ อื, ไอ โมเซ เซ โฮว เลีม นา ก อาวต โม ฮีบรู ป มัฮ จัตเจือ โกะ แตะ เซ. มอง แก อื ลไล ยุฮ อื กัน โซะ เซ. เญือม เซ ชวน โม อียิป ติ ปุย, ปุฮ เนอึม ปุฮ แนม โม ฮีบรู ป มัฮ จัตเจือ โกะ อื เซ ติ ปุย. 12 ซาวป แก รวิต รเวียง แตะ เมือต โอ ยุ ปุย ไฮญ, ดัม เอิน ยุฮ ยุม ไม่ ปุย อียิป เซ ฆาื อื. ฟวยจ เซ รปาึง อื นึง ไฮมจ. 13 ปวยฮ พริ เซ โฮว เลีม แม ติ โฮน. ยุ โม ฮีบรู ลอา ปุย, รเจ ปุฮ ปุ แตะ. ไอ โมเซ อัฮ เฮี ละ ป ระ พิต นึง อื, “ปะ เมอยุ ปุฮ เปอะ ปุ แตะ ไม่ เอียกปุ ฮีบรู เปอะ เซ?” อัฮ เซ ละ อื.

14 ปุย เซ โลยฮ อื ละ อื, “มัฮ ปุย ป เกือฮ ปะ แปน ป ตัตเตียง รเตีฮ รตุม เอะ เอ? อัม มัฮ แกต เปอะ ติ แตะ ซ ปุน ยุฮ ยุม ไม่ อาึ ตอก ยุฮ เปอะ ไม่ ปุย อียิป เซ โรฮ?” อัฮ เซ ละ อื. เญือม เซ ไอ โมเซ ฮลัต ฆาื อื. อัฮ เฮี โตะ รพาวม แตะ, “ปุย ตึน ซ เอีจ ฮมอง ตื อื ป ยุฮ อาึ เฮี,” อัฮ เซ.

15 เญือม ฮมอง ฟาโร ไลลวง อื เซ, ริ ยุฮ ยุม ไม่ ไอ โมเซ ฆาื อื. ไอ โมเซ ตอ ฆาื อื ฮา ฟาโร. โฮว อาวต นึง เมือง มีเดี่ยน. เญือม ฮอยจ อื นา เซ งาวม โบ นัมโม่ ติ โดฮ. 16 เญือม เซ ไก ซตุ เมือง มีเดี่ยน ติ. ไก กวน เครีฮ อาแลฮ. ปุย อาแลฮ เซ ตาว แกะ ยุฮ เปือะ แตะ ฮอยจ นึง นัมโม่ เซ, เชียต รอาวม ละ แกะ เซ, โทก อื ละ อื โตะ กัวะ. 17 เญือม เซ ฮอยจ แม โม ปรเมะ เลียง แกะ นึง ติ มู, ริ โครฮ โม ปรโปวน เซ โอก ฮา นัมโม่ เซ. ไอ โมเซ โกฮ เรอึม ปรโปวน โม เซ เกือฮ โตว โม ปรเมะ เซ ปัก อื. เชียต โรฮ รอาวม ละ อื เกือฮ แกะ ยุฮ อื ญุ อื.

18 โม ปเครีฮ เซ เอีญ ฮอยจ เคะ เรอูเอน ป มัฮ เปือะ แตะ. เปือะ อื ไฮมญ อื, “โม เปะ เฌือน เอีญ บุย เปอะ เมอ เนาะ เฮี?” อัฮ เซ ละ อื.

19 กวน อื เซ โลยฮ อื ตอก เฮี, “ไก ปรเมะ โม อียิป ติ ปุย เรอึม เอะ, เกือฮ โตว ปุย ปัก เอะ. เชียต โรฮ รอาวม ละ แกะ ยุฮ ฮุ ไม่ อื,” อัฮ เซ ละ เปือะ แตะ.

20 เปือะ อื อัฮ เฮี, “ปุย เซ อาวต ก เมอ? ละ โน่ง เปอะ ก พริ ย่วง ตอก เซ เมอ? โฮว กอก เกือฮ เอีญ โซม ไม่ เอะ,” อัฮ เซ ละ กวน แตะ.

21 กวน อื เซ โฮว กอก เนอึม อื. ไอ โมเซ เอีญ เนอึม ฮอยจ เญือะ เซ. ลอต อาวต ไม่ อื. ฟวยจ เซ เรอูเอน เซ เกือฮ ซิปโปรา ป มัฮ กวน แตะ ละ ไอ โมเซ แปน ปุย เญือะ อื. 22 กัง เคะ เอ ซิปโปรา เซ ไก กวน รเมะ ติ, ไอ โมเซ อัฮ เกอโชม* 2:22 นึง ลปุง ฮีบรู เยอ, เกอโชม เซ มัฮ อัฮ อื “ปุย ตังเมือง” ไม่ อื. ละ อื. “อาึ มัฮ ปุย ตังด่าว อาวต ตังเมือง,” อัฮ เซ.

23 เญือม เอีจ เลี่ญ อื กซัต เมือง อียิป เซ ยุม. เญือม เซ โม อิซราเอน แงงัฮ นึง โซะ ป อาวม แตะ นึง แปน อื ครา ปุย, กอก ปัว พะจาว เรอึม แตะ ฆาื อื. รซอม ปัว อื เซ ฮอยจ เนอึม ละ พะจาว. 24 เญือม แงงัฮ อื ฆาื โซะ ป อาวม แตะ เซ พะจาว ฮมอง อื. โตก โรฮ ละ ลปุง ซันญา แตะ อาึง ไม่ อัปราฮัม ไม่ ยิซฮัก ไม่ ยาโคป. 25 พะจาว ยุ ป เกิต ป ไก ละ โม อิซราเอน เซ โครยญ เจือ. ไฌม เนอึม ไฌม แนม อื ฆาื อื.