1 เญือม โฮลฮ โรง โยซียา แปน กซัต เตอ, เดอึม ไก อาญุ ซเตะ เนอึม โน่ง. โฮลฮ โรฮ ตัตเตียง ปุย นึง เยรูซาเลม ง่วย โรฮ ติ เนอึม. มอยฮ มะ อื มัฮ เยดี่ด่า. มัฮ กวน รโปวน อาด่ายา ปุย ย่วง โบ่ตคัต เซ. 2 กซัต โยซียา เซ ยุฮ เนอึม ป ปุก รพาวม พะจาว. มัฮ โรฮ โฮว อื นึง คระ ไมจ ยุฮ ด่าวิต ป มัฮ จัตเจือ ไพรม แตะ เซ โรฮ. เกือฮ โตว ติ แตะ แพก คระ ยุฮ อื เซ, ปัง มัฮ ลวง วิ ญุ่ก, ลวง ดอม ญุ่ก.

3 เญือม เอีจ มัฮ อื เนอึม กาว โรฮ ซเตะ นึง กัน โฮลฮ โยซียา เซ แปน กซัต เตอ, ดวน ชาฟัน ป มัฮ เลคา ยุฮ แตะ โฮว นึง วิฮัน ยุฮ พะจาว. ชาฟัน เซ มัฮ กวน อาซาลิยา, ปุก มัฮ กวนโซะ เมชุนลัม. อัฮ เฮี ละ อื, 4 “ไมจ เปอะ โฮว เคะ ฮินคียา ป มัฮ ฮัวนา ซตุ เซ, ละ ซ เกือฮ เปอะ เมีญ แลน เมาะ ไก มาื ป อาวต นึง วิฮัน เซ. มาื เซ เอีจ มัฮ มาื เกป ป มอง โตะ รเวือะ วิฮัน เซ เน่อึม นึง โม ลัปซด่อน. 5 เกือฮ โรฮ เกือฮ มาื เซ ละ โม ไน ชัง ระ นึง วิฮัน ยุฮ พะจาว เซ ละ ซ เกือฮ อื ละ โม ป ยุฮ กัน นึง กัน ซอมแซม อื วิฮัน เซ, 6 ป มัฮ โม ชัง ไมะ, ชัง ปุน, ชัง กอซัง, ละ ซ กัฮ อื งวยฮ โคะ, งวยฮ ซโมะ เพรียง ปุย ละ ซอมแซม แตะ วิฮัน เซ นึง โครยญ เจือ. 7 โม ป กุม กัน นึง วิฮัน เซ มัฮ เนอึม ปุย ซืไซ. เญือะ จัมเปน เปอะ โตว ซาวป แม กวต แลน บั่นชี ยุฮ อื,” อัฮ เซ กซัต เซ.

8 ฟวยจ เซ ฮินคียา ป มัฮ ฮัวนา ซตุ เซ อัฮ เฮี ละ ชาฟัน ป มัฮ เลคา ยุฮ กซัต เซ, “อาึ อื รโตฮ ยุ นังซื โกตไม นึง โตะ วิฮัน ยุฮ พะจาว เฮี,” อัฮ เซ ละ อื. ฟวยจ เซ ฮินคียา เกือฮ นังซื โกตไม เซ ละ ชาฟัน. ชาฟัน เซ ลาว อื. 9 ฟวยจ เซ เอีญ รโฮงะ แม โรฮ อื ละ กซัต โยซียา ตอก เฮี, “เอะ โม ป มัฮ กวนไจ ยุฮ เปอะ เฮี เอีจ ฟวยจ ซเพระ เยอะ มาื นึง วิฮัน ยุฮ พะจาว เซ. เอีจ มอป โรฮ ละ โม ไน ชัง ระ ป ยุฮ กัน นึง วิฮัน เซ,” อัฮ เซ ละ อื. 10 ฟวยจ เซ ชาฟัน อัฮ แม เฮี ละ กซัต, “ฮินคียา ป มัฮ ฮัวนา ซตุ เซ เกือฮ แม โรฮ นังซื ละ อาึ ติ มวน,” อัฮ เซ ละ อื. ฟวยจ เซ ชาฟัน ลาว นังซื เซ ละ กซัต โยซียา เซ.

11 เญือม เอีจ ฮมอง กซัต รซอม นึง นังซื โกตไม เซ, แจฮ เอิน ลปิ แตะ ฆาื อื. 12 ฟวยจ เซ ดวน แม ฮินคียา ป มัฮ ฮัวนา ซตุ เซ, ไม่ อาฮิคัม กวน ชาฟัน, ไม่ อักโบ่ กวน มีคายา, ไม่ ชาฟัน ป มัฮ เลคา ยุฮ แตะ, ไม่ อาซายา ป มัฮ กวนไจ แตะ เซ. อัฮ เฮี ละ อื, 13 “ไมจ เปอะ โฮว ไฮมญ แลน พะจาว ละ อาึ ไม่ ละ โม ยูด่า เฮี เตือง โอยจ อื เกว ไม่ รซอม ป ไก นึง นังซื เฮี. พะจาว อัฮ ติ แตะ ซ เปลีฮ รพาวม ฮาวก แตะ ละ โม เอะ, มัฮ ฆาื โอ โม จัตเจือ ไพรม เอะ ง่อต ลปุง ป ไก นึง นังซื เฮี, ไม่ โอ อื ยุฮ ตัม ป ไซฮ ปุย อาึง, ตัม ป ดวน อื เอะ ยุฮ เซ โครยญ เจือ,” อัฮ เซ กซัต เซ.

14 ฮินคียา, ไม่ อาฮิคัม, ไม่ อักโบ่, ไม่ ชาฟัน, ไม่ อาซายา เยอ, โกฮ โฮว เนอึม เคะ ป ซึป ลปุง พะจาว ติ ปุย. มัฮ ปรโปวน, มอยฮ อื มัฮ ฮุนด่า, มัฮ ปรโปวน เญือะ ชันลุม. ชันลุม เซ มัฮ กวน ทิกวา, ปุก มัฮ กวนโซะ ฮารฮัต, มัฮ โม ป ซเพระ ซแน่ม เครอึง เซอึก ซตุ นึง วิฮัน. (เญือม เซ ปรโปวน เซ เยอ อาวต นึง เวียง เยรูซาเลม มู ลอา นึง อื.) โม ป ฮอยจ เซ อู ดิ ไม่ ปรโปวน เซ นา เซ. 15 เญือม เซ ปรโปวน เซ อัฮ เฮี ละ อื, “เยโฮวา พะจาว ยุฮ โม อิซราเอน เนอ อัฮ เฮี ละ เปอะ, ‘ไมจ เปอะ เอีญ อัฮ ละ ปรเมะ ป ดวน โม เปะ โฮว เคะ อาึ เซ ตอก เฮี, 16  พะจาว อัฮ เฮี ละ เปอะ, ง่อต แลน. อาึ ซ เกือฮ เนอึม ป โตะ ป ตอง ฮอยจ ละ เวียง เยรูซาเลม ไม่ ปุย อาวต นึง อื, ตัม รซอม นึง นังซื ป เอีจ โฮลฮ กซัต เมือง ยูด่า ลาว เซ. 17 มัฮ ฆาื เอีจ ละ โปวฮ โม เซ อาึ, ไม่ เอีจ ตอง อื ทไว ป ซออย ฮงาื ละ พะจาว ไฮญ โรฮ. โม เซ ซาวป แนฮ ยุฮ ควน รอก พาวม อาึ นึง ยุฮ แตะ กัน ตอก เซ. เซ ป ซ เปลีฮ อาึ รพาวม ฮาวก แตะ ฆาื อื ละ ปุย เมือง เฮี เยอ. รพาวม ฮาวก อาึ เซ เญาะ เกียฮ ญึ่ต โตว. 18 ละ กซัต ยุฮ โม ยูด่า ป ดวน โม เปะ โฮว ไฮมญ พะจาว เซ, ปังเมอ ไมจ โม เปะ รโฮงะ ละ อื ตอก เฮี, เยโฮวา พะจาว ยุฮ โม อิซราเอน อัฮ เฮี ละ เปอะ. 19 ปะ เกือฮ เปอะ โตว รพาวม แตะ กอ บุ่ง. ญอม เปอะ เกือฮ ติ แตะ แปน ปุย ตุเตียม เบือ เอีจ ฮมอง เปอะ ลปุง เซ. เญือม เอีจ ฮมอง เปอะ ตอก ซ เกือฮ อาึ เมือง เฮี ไลจโลม ปอ ฮัง อื, ไม่ เกือฮ ปุย นึง อื ลอก ป โอยจ นึง โซะ แตะ เซ, ปะ แจฮ เอิน เปอะ ลปิ แตะ, ไม่ เยือม เปอะ ฆาื. อาึ เอีจ ยุ เอีจ ฮมอง โรฮ โฮะ ป ยุฮ ปะ เซ. 20 เคียง มัฮ อื ตอก เซ, อาึ ซ รโจะ ปะ ไม่ โม จัตเจือ ไพรม เปอะ, ปะ ซ โฮลฮ ลั่ง ปุย รมอยจ เปอะ ไม่ รพาวม ไมจ มวน แตะ. ปะ ซ โฮลฮ เปอะ โตว ยุ ป โตะ ป ตอง ป ซ เกือฮ อาึ ฮอยจ ละ ปุย เมือง เฮี เฟือฮ,’ อัฮ เซ ละ เปอะ พะจาว เยอ.” เญือม เซ, โม เซ เอีญ รโฮงะ เนอึม รซอม เซ ละ กซัต เซ.