1 ไก ปุย ติ. มอยฮ อื มัฮ นาอามัน, มัฮ ฮัวนา ตฮัน ระ เมือง ซีเรีย. มัฮ ปุย ระ ไกญ ติญ มอยฮ ไม่ มัฮ แตะ ปุย ปุก รพาวม กซัต. ปุย นัปทื อื นึง โกว พะจาว อื ละ เกือฮ แตะ โม ตฮัน ซีเรีย เกียฮ เป ปุย. มัฮ ตฮัน เกง เนอึม ปังเมอ ลอก ลาวต.

2 เญือม โฮว รุป โม ตฮัน ซีเรีย ติ โฮน อื โฮมวต โรวก ป เครีฮ แตวะ เมือง อิซราเอน ติ ปุย. ปุย เซ โฮลฮ แปน กวนไจ ปรโปวน เญือะ นาอามัน เซ. 3 ปรโปวน เซ อัฮ เฮี ละ แมเลียง แตะ, “ปอเลียง เงอะ เฮี, มัฮ ฮอยจ อื เคะ ป ซึป ลปุง พะจาว ป อาวต นึง เวียง ซามาเรีย โฮ, แจง ซ ไฮ อื ยุฮ ลาวต อื เซ,” อัฮ เซ ละ อื.

4 นาอามัน เซ โฮว รโฮงะ ป อัฮ ป เครีฮ เมือง อิซราเอน เซ ละ กซัต ยุฮ แตะ. 5 กซัต เซ ดวน นาอามัน โฮว เคะ กซัต เมือง อิซราเอน ฆาื อื. เกือฮ โรฮ อื โรวก นังซื รโปะ แตะ ละ อื. นาอามัน โฮว เนอึม ฆาื อื. โรวก มาื ไม่ แตะ ลอวย ฮมาึน แทป ไม่ ไคร แลฮ เปือน แทป ไม่ เครอึง เซอึก ไมจ กาว จุม. 6 รซอม นังซื รโปะ อื ละ กซัต เมือง อิซราเอน เซ มัฮ ตอก เฮี, “นังซื เฮี มัฮ ควน ลัปลอง มัฮ อาึ ป เกือฮ นาอามัน ป มัฮ กวนไจ อาึ เฮี ฮอยจ เคะ เปอะ ละ ซ เกือฮ ปะ เรอึม เกือฮ ลาวต อื ไฮ,” อัฮ เซ.

7 กซัต เมือง อิซราเอน เมือต แลน นังซื เซ แจฮ ไอฮ ลปิ แตะ ฆาื อื นึง ตุก รพาวม แตะ. อัฮ เฮี, “ตังฮลัก โน่ง ป ยุฮ ป อัฮ ละ อาึ เมอ? ปุย เฮี เกียฮ เกือฮ โน่ง ปุย ฮอยจ เคะ อาึ ละ ซ ไฮ ลาวต แตะ ตอก เฮี เมอ? อัม มัฮ แกต อื อาึ มัฮ พะจาว? อัม มัฮ แกต อื อาึ ไก อัมนัต ปุน เกือฮ ปุย ยุม ง่อน ไอม ง่อน? เอีจ ที นึง เซ มัฮ ซาวป อื ตอก ซ รเจ แตะ ไม่ อาึ อื,” อัฮ เซ กซัต เซ. 8 เญือม ฮมอง เอลีชา ป ซึป ลปุง พะจาว เซ ไลลวง แจฮ กซัต เมือง อิซราเอน ลปิ แตะ ตอก เซ, ตอม มวยญ แตะ ละ อื ตอก เฮี ฆาื อื, “เมอยุ ตุก รพาวม เปอะ ปอ แจฮ เปอะ ลปิ แตะ ตอก เซ? เกือฮ ปุย เซ ฮอยจ เคะ อาึ เฮี, เดอึม ซ ยุง อื ไก เนอึม ป ซึป ลปุง พะจาว นึง เมือง อิซราเอน เฮี,” อัฮ เซ เอลีชา เซ. 9 เญือม ฮมอง นาอามัน ไลลวง เซ เยอ โฮว เอิน ไม่ บรอง ไม่ เลาะ รุป เซิก ยุฮ แตะ ฮอยจ นึง โตะ รเวือะ เญือะ เอลีชา เซ. 10 เอลีชา เกือฮ กวนไจ ยุฮ แตะ โอก อัฮ เฮี ละ อื, “โฮว ฮาวม ติ เปอะ นึง โกลง จอแด่น อาแลฮ โฮน. ลาวต เปอะ เซ ซ ไฮ ไมจ ฆาื อื,” อัฮ เซ ละ อื.

11 เญือม ฮมอง นาอามัน ป อัฮ อื ละ แตะ เซ โอก โฮว ฆาื อื ไม่ ฮาวก รพาวม แตะ. อัฮ เฮี, “ลวง เญี่ยะ อื อาึ แกต ปุย เซ ซ โอก ชุง โบ แตะ ไม่ กอก อื ปัว นึง มอยฮ เยโฮวา พะจาว ยุฮ แตะ ไม่ ย่อง โรฮ อื เตะ แตะ ราว นา ก โซะ อาึ เฮี ละ ซ เกือฮ อื ไฮ. 12 โกลง อาบ่านา ไม่ โกลง ฟาปา ป อาวต เมือง ด่ามาซกัต แจง ไมจ อื ฮา โกลง เมือง อิซราเอน โครยญ โกลง อื. ดัฮ ซ ไฮ เบือ รอาวม โฮ เอีญ ฮาวม นึง โกลง โม เซ โม่ ซ แปน?” อัฮ เซ. ลเตือฮ ติ แตะ โฮว ฮา อื. โฮว ไม่ ฮาวก รพาวม ซาวม ไง่ แตะ.

13 โม กวนไจ นาอามัน เซ เลียก เคะ อื, อัฮ เฮี ละ อื, “จาวไน, ป ซึป ลปุง พะจาว เซ, มัฮ ดวน อื ปะ ยุฮ ป ญัก ป นอ ติ เจือ ตึน ซ ญอม เปอะ ยุฮ. เมาะ ดวน อื ปะ ฮาวม ติ แตะ บ่ได่ะ โฮว เปอะ ละ ไมจ แตะ ลอง แลน ยุฮ ละ ซ เกือฮ เปอะ ติ แตะ ไฮ,” อัฮ เซ ละ อื. 14 นาอามัน เซ เลีฮ เนอึม ฆาื อื ฮอยจ โตะ โกลง จอแด่น เซ. ชึต เนอึม ติ แตะ อาแลฮ โฮน ตัม ดวน ป ซึป ลปุง พะจาว แตะ ยุฮ เซ. เญือม เซ เนะซอัง อื ไมจ ฆาื อื ตอก เอิน เนะซอัง กวนดุ โฮ. ไฮ ไมจ เอิน ฆาื อื.

15 ฟวยจ เซ เอีญ เคะ เอลีชา ฆาื อื ไม่ โม กวนไจ แตะ เตือง โอยจ อื. ชุง ซองนา อื. อัฮ เฮี ละ อื, “ปเลี่ย เฮี อาึ ยุง เงอะ โอ พะจาว เนอึม ไก ก ไฮญ. มัฮ ไก อื นึง เมือง อิซราเอน โน่ง. ฆวต ปัว เปอะ ไอฮ ป เกือฮ ป กอยฮ อาึ ป มัฮ กวนไจ ยุฮ เปอะ เฮี ละ เปอะ เญี่ยะ,” อัฮ เซ ละ อื. 16 เอลีชา เซ อัฮ เฮี, “แจง ไอม พะจาว ป รซอฮ อาึ ละ เซ ตอก ออฮ, อาึ แจง โรฮ โอ ซ รัป ป เกือฮ เปอะ ละ แตะ ตอก เซ โรฮ,” อัฮ เซ. ปัง ปัว เลาะ ปัว ลาึน อื รัป อื ญอม โตว ไอฮ อื.

17 นาอามัน อัฮ เฮี, “ดัฮ เปอะ โอ รัป โฮ ปัว เปอะ เกือฮ เนิ ติ เจือ. ปัว เตะ เมือง เปอะ ลอา รตัง ลอ ละ ซ โรวก ฮอยจ เมือง แตะ.* 5:17 เจน เซ ปุย ง่อน อื แกต ติ แตะ ไมจ ไว พะจาว นึง เตะ เมือง อิซราเอน เซ โน่ง. มัฮ เซ ป ปัว อื โรวก เตะ เซ ฆาื อื. เน่อึม ปเลี่ย โฮว ไป นา เยอ อาึ ป มัฮ กวนไจ เปอะ เฮี เญือะ ซ ทไว โตว โอเอีฮ ละ พะจาว ไฮญ โนก ฮา เยโฮวา. ปัง มัฮ ตอง ทไว โอเอีฮ ญุ่ก, ปุ เญาะ ซ ยุฮ. 18 อาึ ปัว พะจาว โอ ทื แตะ นึง โอเอีฮ ติ เจือ เฮี. เญือม เลียก ดิ ไม่ กซัต ยุฮ แตะ นึง เวือต ยุฮ พะริมโมน ละ ซ ไว อื, ดัฮ กซัต เซ นั่กเนี่ เตะ อาึ อาึ ตึน ซ จัมเปน โรฮ นุ่ม ไม่ อื. ปัว พะจาว โอ ทื แตะ นึง เซ,” อัฮ เซ ละ เอลีชา. 19 เอลีชา อัฮ เฮี, “เอีญ ไมจ เอีญ มวน เมิฮ,” อัฮ เซ ละ อื. นาอามัน เอีญ เนอึม.

20 เญือม เอีจ เอีญ โม เซ เมาะ โล่ว โฮ, เกฮะซี ป มัฮ กวนไจ เอลีชา เซ ง่อต อื โตะ รพาวม แตะ ตอก เฮี, “ปอเลียง อาึ เคียต โอ ไอฮ ป ติ ป เตอื เน่อึม นึง นาอามัน ปุย ซีเรีย เซ, โคะ เกือฮ โน่ง เอีญ เยือ เตือง เซ เมอ? แจง ไอม พะจาว ตอก ออฮ, อาึ แจง โรฮ ซ โฮว อาื เยอะ ปัว โอเอีฮ เน่อึม นึง ปุย เซ ง่อน,” อัฮ เซ โตะ รพาวม แตะ.

21 ฟวยจ เซ เกฮะซี โกฮ โฮว อาื เนอึม อื. เญือม ชวน นาอามัน ตอ ปุย โฮว อาื แตะ ตอก เซ เลีฮ ฆาื อื ฮา เลาะ ยุฮ แตะ. ไฮมญ อื ตอก เฮี, “เมอ ฮอยจ อัฮ เปอะ?” อัฮ เซ ละ อื. 22 เกฮะซี เซ โลยฮ อื, “ไก โตว ป ไฮญ เญอ. มัฮ ดวน ปอเลียง เงอะ อาึ โฮว อาื โม เปะ. ปเลี่ย เฮี ฮอยจ โม ป ซึป ลปุง พะจาว เคะ อื เน่อึม นึง บลาวง เอฟราอิม ลอา ปุย. ดวน อาึ โฮว อาื ปัว มาื ละ อื, เมาะ ติ ตะลัน ไม่ เครอึง ลอา จุม, อัฮ เซ ละ เปอะ ปอเลียง เงอะ,” อัฮ เซ.

23 นาอามัน อัฮ เฮี, “ปัง ปัว อื ติ โน่ง โรวก เอิน ละ อื ลอา ตะลัน,” อัฮ เซ. อัฮ เลาะ อัฮ ลาึน อื ละ อื. เกฮะซี โรวก เนอึม อื ฆาื อื. เพาะ อื ละ อื ไมจ นึง ฮาื ลอา. เกือฮ อื ละ อื ไม่ เครอึง ไมจ ลอา จุม. เกือฮ กวนไจ โกะ แตะ เอีญ ตาว อื ละ อื เกือฮ โฮว กา เกฮะซี เซ ลอา ปุย. 24 เญือม เอีจ ฮอยจ อื ชวง บลาวง อาวต เอลีชา เซ เกฮะซี ตุย โอเอีฮ เซ ฮา กวนไจ ลอา เซ. โรวก ไอฮ แฮรน อื เญือะ โกะ แตะ ไอฮ. เกือฮ กวนไจ ยุฮ นาอามัน เซ เอีญ. 25 ฟวยจ เอีญ โม เซ, โกะ อื เลียก ชุง ซองนา เอลีชา ป มัฮ ปอเลียง แตะ เซ. เอลีชา ไฮมญ อื, “เกฮะซี, เอีญ เปอะ เน่อึม ก เมอ,” อัฮ เซ ละ อื. เกฮะซี โลยฮ อื, “อาึ ป มัฮ กวนไจ เปอะ โฮว โตว นา ออฮ นา เอีฮ ติ โดฮ เนอึม,” อัฮ เซ ละ อื.

26 เอลีชา อัฮ เฮี, “เญือม เลีฮ ปุย เซ ฮา เลาะ ยุฮ แตะ ละ อู แตะ ไม่ ปะ เซ, ลปุ อาึ โม่ อาวต โรฮ ไม่ เปอะ? ปุก โตว ป ยุฮ ปะ เซ. เวลา ปเลี่ย มัฮ โตว เวลา ปุก ละ ไอฮ ปะ มาื ไม่ เครอึง เซอึก ไม่ รปึม อะงุน รปึม กาวก ไม่ แกะ ไม่ โมวก ไม่ กวนไจ รเมะ รโปวน เปอะ. 27 ไลลวง ลาวต ฆอก ป ลอก นาอามัน เซ ซ ลอก ปะ ฆาื อื. ซ ฮอยจ ละ จัตเจือ เปอะ เฆียง เฮี โอ เญาะ ไก ลอยจ,” อัฮ เซ ละ อื. เญือม โอก เกฮะซี ฮา เญือะ เอลีชา เซ, เอีจ อาวม เอิน เตอึม ลาวต ละ แตะ. ฮัก อื ปิญ เอิน ตอก เตีย เปลาะ โฮ.