7
1 I oƣlum, sɵzlirimgǝ ǝmǝl ⱪil,
Tapxuruⱪlirimni yürikingdǝ saⱪla.
2 Tapxuruⱪlirimƣa ǝmǝl ⱪilsang, yaxnaysǝn;
Tǝlimlirimni kɵz ⱪariquⱪungni asriƣandǝk asra.■ Law. 18:5; Pǝnd. 4:4
3 Ularni barmaⱪliringƣa tengip ⱪoy,
Ⱪǝlb tahtangƣa yeziwal.■ Ⱪan. 6:8; 11:18
4 Danaliⱪni, sǝn ⱨǝdǝ-singlim, degin,
Pǝm-parasǝtni «tuƣⱪinim» dǝp qaⱪir.
5 Xundaⱪ ⱪilsang, ular seni yat hotundin yiraⱪlaxturidu,
Aƣzidin siliⱪ sɵz qiⱪidiƣan yoqun ayaldin neri ⱪilidu.■ Pǝnd. 5:3
Buzuⱪ hotun
6 Bir ⱪetim ɵyning derizǝ kɵznǝkliridin taxⱪiriƣa ⱪariƣinimda,
7 Birnǝqqǝ yax, sadda yigitlǝrni kɵrdüm,
Ularning iqidin bir ǝⱪilsizni kɵrüp ⱪaldim,
8 U koqa boylap buzuⱪ hotun turuxluⱪ doⱪmuxtin ɵtüp,
Andin uning ɵyi tǝrǝpkǝ ⱪarap mangdi.
9 Kǝqⱪurun ⱪarangƣu qüxkǝndǝ,
Zulmǝt keqǝ, ay ⱪarangƣusida ixiki aldidin ɵtti.
10 Mana, ɵydin bir hotun qiⱪip uni kütüwaldi;
Kiyimi paⱨixǝ ayallarningkidǝk bolup,
Niyiti ⱨiylǝ-mikir idi.
11 Aƣzi bixǝm-ⱨayasiz, naⱨayiti jaⱨil bir hotun,
U ɵyidǝ turmaydu,■ Pǝnd. 9:13
12 Birdǝ mǝⱨǝllidǝ, birdǝ mǝydanlarda,
U koqilardiki ⱨǝr doⱪmuxta paylap yüridu.
13 Ⱨeliⱪi yax yigitni tartip, uni sɵyüp,
Nomussizlarqǝ uningƣa: —
14 «Ɵyümdǝ «inaⱪliⱪ ⱪurbanliⱪi» gɵxi bar,
15 Xunga mǝn sizni qaⱪirƣili qiⱪtim,
Didaringizƣa tǝlpünüp izdidim.
Əmdi sizni tepiwaldim!
16 Karwitimƣa Misirning kǝxtilik, yolluⱪ libas yapⱪuqlirini yaptim.
17 Orun-kɵrpilirimgǝ hux puraⱪ murmǝkki, muǝttǝr wǝ ⱪowzaⱪ darqinlarni qaqtim.■ Küy. 4:14.
18 Keling, tang atⱪuqǝ muⱨǝbbǝtlixǝyli, oynap ⱨuzurlinayli,
Kɵnglimiz ⱪanƣuqǝ ɵzara ǝyx-ixrǝt ⱪilayli,
19 Erim ɵydǝ yoⱪ, yiraⱪ sǝpǝrgǝ qiⱪip kǝtti.
20 U bir ⱨǝmyan pul elip kǝtti,
Ay tolƣuqǝ u ɵygǝ kǝlmǝydu» — dedi.
21 Ayal kɵp xerin sɵzliri bilǝn rasa ⱪiziⱪturdi,
Qirayliⱪ gǝpliri bilǝn uni ǝsir ⱪiliwaldi.■ Pǝnd. 1:17
22-23 Soyuxⱪa elip mangƣan ɵküzdǝk,
Ⱨamaⱪǝt kixi kixǝn bilǝn jazaƣa mangƣandǝk,
Ⱪiltaⱪⱪa qüxkǝn ⱪuxtǝk,
Yigit uning kǝynidin mangdi.
Jigirini oⱪ texip ɵtmiguqǝ,
U bu ixning ⱨayatiƣa zamin bolidiƣanliⱪini ⱨeq bilmǝydu.
24 I oƣullirim, sɵzlirimni kɵngül ⱪoyup anglanglar,
Degǝnlirimgǝ ⱪulaⱪ selinglar,
25 Ⱪǝlbinglarni bundaⱪ hotunning yoliƣa kǝtküzmǝnglar,
Uning aldam haltisiƣa qüxüp kǝtmǝnglar.
26 Bundaⱪ ayal nurƣun kixilǝrni yiⱪitip yarilandurƣan,
Uning boƣuzliƣan adǝmliri tolimu kɵptur,
27 Uning ɵyi bolsa tǝⱨtisaraning kirix eƣizidur,
Adǝmni «ⱨalakǝt meⱨmanhanisi»ƣa qüxürüx yolidur.□ «tǝⱨtisara» — ibraniy tilida «xeol», ɵlüklǝrning roⱨliri ⱪiyamǝt künini kütidiƣan yǝr. ■ Pǝnd. 2:18; 5:5
□7:14 «inaⱪliⱪ ⱪurbanliⱪi» — Musa pǝyƣǝmbǝrgǝ tapxurulƣan muⱪǝddǝs ⱪanun bekitkǝn bir hil ⱪurbanliⱪ, uning ǝⱨmiyiti; (1) Huda bilǝn bolƣan inaⱪliⱪⱪa erixix üqün; (2) Hudaƣa alaⱨidǝ rǝⱨmǝt eytix üqün; (3) Hudaƣa dua bilǝn ⱪilƣan ⱪǝsimini ipadilǝx üqün. Ⱪurbanliⱪⱪa kala, ⱪoy yaki ɵqkimu bolidu. Bu hil ⱪurbanliⱪning alaⱨidiliki, ⱪurbanliⱪ sunƣuqi kixi uni ⱪurbanliⱪ ⱪilƣandin keyin, gɵxidin elip yeyǝlǝydu. Muxu yǝrdǝ bu ayal: «Mǝn Huda aldida pak» demǝkqi bolidu. Bu pütünlǝy sahtipǝzlik, ǝlwǝttǝ.
□7:27 «tǝⱨtisara» — ibraniy tilida «xeol», ɵlüklǝrning roⱨliri ⱪiyamǝt künini kütidiƣan yǝr.