1 ABuulus jin ta a’di jin karu ki she/ mo – yisa ’peni ’kwani mo walla ki wathiŋ kamu/ mo, hili ka Yesus Ḵrisṯẖos mo dhali Arumgimis jin ta’da Baba mo, a’di jin ’de’kki a’di mo ’peni mowu mo be – 2 dhali arisa waḵ pemi ’baar mo, uni kun nyaḵki ’ko ki aha/ mo.

Eya risa ḵaniisa gi Paŋ Galathiyya mo be.

3 A’the e um mo dhali moŋḵu’th is ’peni Arumgimis jin ta’da Baba mo dhali Tap̱a Yesus Ḵrisṯẖos bana mo be, 4 a’di jin c̱iki is piti mo gom miinthus bana mo mmo’cuḵ ana mo ’peni she/ yil jin ta jin thus yan mo isi ki bwa ma Arumgimis bana mo dhali a’di jin ta Com mo. 5 E a’di mo tani imina monyca icil mo gom mo jin minu ’ko ki sule/ mo dhali ki sule/ ya ye ’ba/ mo be. Amen.

6 Aha/ merkina mo ki um ki jahanne/ kan aḵki a’di e mo a’di jin yuḵki um mo eya ’the ma Ḵrisṯẖos mo dhali ṯu’k mo e gwom ’borgaŋ kamu/ mo – 7 yisa e gwom ’borga/ jin ta jiŋ kamuwa, hili haali/ kun tiya ’kokin mo kun ṯo’cki um bwa mo dhali kun ona bwa ki aḵ gwom ’borga/ ma Ḵrisṯẖos e mo be. 8 Hili isi kani waḵki/ aman walla aman’doyu gwo ’peni momis mo mini ’taki c̱i um gwom ’borgaŋ kamu/ ki c̱a’ckon mo ki a’di jin c̱ikina aman e um mo tani dhalki a’di jeenu mo. 9 Me’d gwo jin okina aman iṯwa/a/ mo wakan shwane/ mo tani aha/ ona gwo doḵ/e mo ki: Waḵki/ a’din ’deŋ kamu/ c̱i um gwom ’borga/ ki c̱a’ckon mo ki a’di jin bu’thkina um mo tani dhalki a’di jeenu mo ma.

10 A/aha/ shwane/ simmkina ’the gi ’kwani eya, walla ’the ma Arumgimis mo? Walla aha/ palkina mii mo mmo’bor ’kwani bwa mowa? Waḵki/ aha/ dina mo naskina/ mo mmo’bor ’kwani bwa mo tani aha/ mina ’taki diki ta c̱iŋkina/ ma Ḵrisṯẖos mo be.

11 Haali/ aha/ mina ’taki dhal um imish mo moyi, iwaḵ mo, ki gwom ’borga/ a’di jin c̱inu ki aha/ mo tani diki ta gwo ’peni isi gwo gi wathi/ en’thi/ mo. 12 Haali/ aha/ dinaki bu’th a’di ’peni wathi/ en’thiŋ kamu/ mo, walla si’da/ aha/ dinuki ṯor a’di mo, hili a’di p̱u’dki’d mo ki gwo jin ’ceen ma Yesus Ḵrisṯẖos mo be. 13 Haali/ um ciḵki gwo mo gom mondiki/em pem jin ta jin dhamo/ jin ta ji gi mii gi ’Kwani Yahuuda/ mo, a’di iṯo’ckika/ ḵaniisa ma Arumgimis bwa mo ki mombujur mo dhali pal mii mo mmo’ce’d a’di sho’k mo be. 14 Dhali aha/ bolkina uni e mo ki miiŋ ’Kwani Yahuuda/ mo, mmo’ce’d uni ka ris ap̱o/ mo uni gun ta ku gi yil pem gana/ mo e bwaman ’kwanim pem mo haali/ aha/ shwakina nyor ki thiṯẖ mo gom gwon dhamo/ gun luḵu ’peni ’kwani gwanyjaḵam pem mo be. 15 Hili ki a’di jin karki aha/ ki she/ mo nṯwa/a/ ki aha/ dinuki dho’th mo dhali yuḵ aha/ mo goma ’them piti mo tani, 16 a’di ’borkina bwa mo mmoṯor Ya/m piti eya tente/ e aha/ mo. Ki mii gi wakan mo tani ki aha/ mina c̱i gwo gom a’di e bwaman ’kwani kun ’koki ta ’Kwani Yahuuda/ mo. Ki a’di wakan mo tani aha/ dinaki ṯora ṯor ki a’diŋ kamu/ jin ta buŋgwar is mo walla abas mo, 17 walla aha/ si’da/ dinaki ya ka gagamis e Pa Urushaliim mo e uni gwansan kun ’kokunu mo mmodhu ki she/ mo nṯwa/a/ ki aha/ mo, hili aha/ yakina mo e Bampa/ gi Pa Arabiyya mo be dhali doḵ/e aha/ doḵkina ka nyaŋ’ko’d mo e Pan Dimashk mo be.

18 Dhali yan’ko’d ’ko’di yili kwara mo tani aha/ yakina ka gagamis e Pa Urushaliim mo mmobuṯa Sap̱a mo dhali nyaḵ c̱a’b ki a’di ka cim ma ḵarpa’c mo be. 19 Hili aha/ dinaki p̱ar unin tiya e kun dhunu ki she/ mo isi ciki/ jasa Yakuub jin ta’da kam gi Tap̱a mo be. 20 (Dhali gwo jin ’kwarkika/ e um mo tani ibwambor ma Arumgimis mo aha/ dinaki ta aṯor mo be.) 21 Dhali yan’ko’d aha/ yakina e Bampa/ gi Pan Suriyya mo dhali Paŋ Kilikiyya mo be. 22 Dhali aha/ ’konu mo mmomol mo naskinayi ki jis/e ma risa ḵaniisa ma Ḵrisṯẖos e Bampa/ Yahuudiyya mo be. 23 Uni ciḵki jasi gwo jin onu mo ki: A’di jin ṯo’cki ana bwa mo ’thissa/ a’di di’d shwane/ mmoc̱i gwo gi moŋgam gwo is mo, a’di jin palkina a’di mmo’ce’d sho’k mo be. 24 Dhali uni karkina Arumgimis ki ca mo gom aha/ mo be.