1-4 Ohan algo ya datuwen binabain imbabalen Selophehad an hi Mahlah, hi Noah, hi Hoglah, hi Milkah ya hi Tirsah ya imme da nah hogpan hi Tabernacle hi kad-an da Moses, hi Eleasar an padi, nadan mangipangpangulu ya nadan ibba dan bimmoble ot kanan day “Nateh amami nah adi maboblayan yaden maid di tulang mih lalaki. Mu hiya ya nate pe gapuh liwat na, bokon gapuh nakid-umana nadah naki-unnud ke Korah an nungngohe ke APU DIOS. Yaden tipet nakaan di ngadana nah listaan di nahlagana gapu te maid di imbabalenah lalaki? Daan mo anhan ta pakidat dakami nah lutan indat yu nadah iiban amami?” Hi Selophehad ya imbabalen Hepher an imbabalen Gilead an imbabalen Makir an imbabalen Manasseh an imbabalen Joseph.

5 Nakihummangan hi Moses ke APU DIOS mipanggep kediye ya 6 kanan APU DIOS ke hiyay 7 “Ustu peman hidiyen ibagan nadan imbabalen Selophehad an waday kalebbengan da, kinali idatam dida nah lutan nidat hi iiban amada. Ta nan tawid amada ya hidiyey idat mun dida.

8 Kalyom hanadah holag Israel an deket natey ohan lalaki yaden maid di lalakin imbabalena ya midat di tawid na nadah binabain imbabalena. 9 Deket maid di imbabalena ya midat di tawid na nah lalakin tulang na. 10 Deket maid di lalakin tulang na ya midat di tawid na nadah linalakin tulang amana. 11 Deket maid di linalakin tulang amana ya midat moy tawid nah kumpulmin naka-ih-up an iibanat ibagi da. Mahapul an un-unudon nadan holag Israel hituwe mipuun nah Tugun APU DIOS an indat nan Moses.”

12 Ohan algo ya kanan APU DIOS ke Moses di “Tumikid ka nah tap-on nan Bilid an Abarim nah nangappit hi timilan di algot tibom nan boblen idat ku nadah holag Israel. 13 Nagibbu ken tinibom ya mate ka, umat ke tulang mun hi Aaron 14 te nginohe yu damdamay tugun ku handih nundiklamu nadan tatagu ke ha-on handih wada kayud Meriba nah adi maboblayan ad Sin. Man-uke ya uggem impatibo ke diday ongal an kabaelak.” (Hay Meribah ya hidiye nan ob-ob ad Kades.)

15 Nundasal hi Moses ke APU DIOS an kananah dasal nay 16-17 “Daan anhan APU DIOS an kalpuwan di biyag, ta tudduwom di ohan kabaelanan mangipangulu hantudah tatagum ta adida umat nadah kalneron maid di mumpattol ke dida ya kabaelanan mangipangulun didan makigubat.”

18 Kanan APU DIOS ke Moses di “Hi Joshua an imbabalen Nun di waday kabaelana. Ayagam ta ihakmom di taklem hi uluna. 19 Ipataddog muh hinangngab Eleasar an padi ya am-in nadan ibba yun holag Israel ta kalyom ke didan hiyay mihannot ke he-an mangipangulun dida. 20 Ya ipaboltan mun hiyay kabaelam ta mangun-unud am-in nadan tatagun Israel ke hiya. 21 Deket waday pinhod dan ibagan ha-on ya tumaddog hi Joshua hi hinangngab Eleasar an padi ta inilaona hin nganney inhumang ku mipuun nah bunut an Urim ya Tummim. Athituy panginilaan Eleasar hi kalyonan Joshua ya nadan tatagu ten nganney aton da.”

22 Inun-unud Moses hituwen intugun APU DIOS ot pataddogonah Joshuah hinangngab Eleasar an padi ya am-in nadan tatagu. 23 Ot ihakmon Moses di taklenah ulun Joshua ot kalyonan hiyay mihannot ke hiya. Inat Moses hituwen inun-unud nay kinalin APU DIOS an atona.