1 Datuwe nadan pamilyan da Aaron ke Moses an nitudok handih kimmaliyan APU DIOS ke Moses nah Bilid an Sinai.

2 Hanadan linalakin imbabalen Aaron ya hi Nadab an panguluwan, hi Abihu, hi Eleasar, ya hi Itamar. 3 Natuddu da ya niong-ong dan mumpadi, 4 mu nate da Nadab ke Abihu hi hinangngab APU DIOS handih nun-appit dan hiyah ugge nangilinan an apuy nah adi maboblayan ad Sinai. Maid di linalakin imbabale da ot ammuna mo da Eleasar ke Itamar an numpadi an didan am-in ke da ama dan hi Aaron.

5 Kanan APU DIOS ke Moses di 6 “Ayagam hitu nadan holag Libay ta tudduwom didan bumaddang ke Aaron an padi. 7 Diday mangiat nadah mahapul an mingunu nah Tabernacle an kawad-ak ta munhilbi da nadah padi ya nadan ibba dan bimmoble. 8 Mahapul bon ipaptok da nadan ngunut nah Tabernacle ya munhilbi dah din itakdog da nadan ibba dan holag Israel. 9 Tudduwom nimpe didan bumaddang ke da Aaron an hin-am-a. 10 Ammunah Aaron ya nadan linalakin imbabalenay tudduwom an mumpadi. Deket waday kumpulmin tagun e mih-up nah Tabernacle ta ena aton di ngunun di padi ya mipipate.”

11 Kanan bon APU DIOS ke Moses di 12-13 “Hanadan holag Libay di pinilik nadah holag Israel an miong-ong ke ha-on ta diday mihannot hi am-in hanadah linalakin panguluwan an imbabalen di holag Israel te bagik am-in di linalakin panguluwan an imbabalen di holag Israel. Handih pinatek nadan panguluwan an linalakin imbabalen nadan iEgypt ya niong-ong ke ha-on nadan panguluwan an linalakin imbabalen di holag Israel takon nadan namangulun impan di aggayam da. Ha-oy di AP-APU an Dios yu.” 14 Kanan bon APU DIOS ke Moses hidi nah adi maboblayan ad Sinai di 15 “Bilangom nadan linalakin holag Libay mipuun hi puun da ya pamilya da an ohay bulana ya nahawwal.” 16 Ot bilangon Moses didan inun-unud nay intugun APU DIOS an atona. 17 Datuwey ngadan nadan linalakin imbabalen Libay: hi Gershon, hi Kohat ya hi Merari. 18 Hi Gershon ya duway linalakin imbabalena: hi Libni ya hi Simei. 19 Hi Kohat ya opat di linalakin imbabalena: hi Amram, hi Ishar, hi Hebron ya hi Ussiel. 20 Hi Merari ya duwa boy linalakin imbabalena: da Mahli ke Mushi. Datuwey nahlag ke Libay an nitudok mipuun hi pamilya da.

21 Hanadan nahlag ke Gershon ya dadiye nadan pamilyan Libni ya pamilyan Simei. 22 Hay bilang am-in di linalakin holag dan nilista an ohay bulana ya nahawwal ya 7,500. 23 Dadiyen nahlag ke Gershon di mungkampuh indoggan nan Tabernacle hi nangappit hi kalin-oban di algo. 24 Hay mangipangpangulun dida ya hi Eliasap an imbabalen Lael. 25-26 Diday nangamung an mangipaptok nah Tabernacle takon nadan ngunut ya nadan kurtinan mihanih hogpan hi bohongna ya nah dola ya nah nunlinikkod hi Tabernacle takon nan altar. Ya diday nangamung an mangipaptok nadah linubid ya nadan udum an ngunut an mausal hidi.

27 Hanadan nahlag ke Kohat ya dadiye nadan holag Amram, hi Ishar, hi Hebron ya hi Ussiel. 28 Hay bilang am-in di linalakin holag dan nilista an ohay bulana ya nahawwal ya 8,600. Diday mangipaptok nadah nangilinan an ngunut 29 ya mungkampu dah nangappit hi south. 30 Hay mangipangpangulun dida ya hi Elisaphan an imbabalen Ussiel. 31 Datuwe nadan ipaptok da: nan Kahon APU DIOS, nan lamesaan, nan pangipattukan hi dilag, nadan altar, nadan udum an ngunut an usalon di padi nah bohongnan di Tabernacle ya nan kurtinan nihanih hogpan nah kawad-an APU DIOS. 32 Hi Eleasar an padin imbabalen Aaron di mangipangpangulun am-in hanadah holag Libay. Ya hiyay ingkalgadun hanadah mungngunu nah Tabernacle.

33 Hanadan nahlag ke Merari ya dadiye nadan pamilyan da Mahli ke Mushi. 34 Hay bilang am-in di linalakin holag dan nilistan ohay bulana ya nahawwal ya 6,200. 35 Diday mungkampu nah north nan Tabernacle. Ya hi Suriel an imbabalen Abihail di mangipangpangulun dida. 36 Diday nangamung an mangipaptok nah kalkalimangngan nan Tabernacle: nadan miballabag, nadan tukud, nadan pangipataddogan da nadah tukud, ya am-in nadan mausal hi pangipataddogan. 37 Dida boy nangamung an mangipaptok nadan wadah dolan nan Tabernacle: nadan tukud, nadan pangipataddogan hi tukud, nadan paghok ya nadan mahapul an linubid.

38 Ya hay mungkampu nah hinangngab nan Tabernacle nah nangappit hi timilan di algo ya nituddu ke da Moses ke Aaron ya nadan imbabalena. Diday mangingunu nadah nganneh diyen miat hidi nah Tabernacle ta munhilbi da nadah holag Israel. Hanan kumpulmin tagun mangipatnan mangiat ke dadiye ya mipipate.

39 Hay bilang am-in nadan linalakin holag Libay an nilistan ohay bulana ya nahawwal ya 22,000. Inat da Aaron ke Moses hinae mipuun hi intugun APU DIOS an aton da.

40-41 Kanan APU DIOS ke Moses di “Am-in di linalakin panguluwan an holag Israel ya miong-ong ke ha-on. Kinali mahapul an ilista yuy ngadan nadan ohay bulan da ya nahawwal. Muden hay mangitakdog ke didan miong-ong ke ha-on ya nadan holag Libay. Ha-oy di AP-APU. Kalyok an miong-ong pay ke ha-on am-in di aggayam di holag Libay ta mihannot nadah mamangulun iimpan di aggayam di holag Israel.”

42 Inun-unud Moses ot bilangonan am-in nadan panguluwan an linalakin holag Israel mipuun hi tugun APU DIOS. 43 Ya hay bilang dan am-in an panguluwan an linalakin holag Israel ya 22,273.

44 Kanan bon APU DIOS ke Moses di 45 “Iong-ong mun ha-on nadan holag Libay ta mihannot dan am-in hanadah panguluwan an linalakin holag Israel. Ya iong-ong mun ha-on am-in di aggayam dat mihannot nadah mamangulun iimpan di aggayam di holag Israel. Ha-oy di AP-APU. 46 Ya nadan duwan gatut ta napitut tulun panguluwan an linalakin holag Israel an nahawwal hi bilang nadan holag Libay ya mahapul an mabayadan da. 47 Hay bayad di oha mipuun nah maunud an pumbayad ya liman kalang. 48 Hidiyen pihhun bayad da ya midat ke Aaron ya nadan imbabalena.”

49 Ot amungon Moses di bayad dadiyen nahawwal an nihannotan nadan holag Libay 50 ya 1,365 kalang. 51 Ot idat nan Aaron ya nadan linalakin imbabalena mipuun hi tugun APU DIOS.